އަންނަ އަހަރު ބާއްވާ ރިޔާސީ އިންތިހާބުގެ ސެކިއުރިޓީ ބެލެހެއްޓުމާ ގުޅޭގޮތުން އިލެކްޝަންސް ކޮމިޝަން (އީސީ) އިން ފުލުހުންގެ އިސް އޮފިޝަލުންނާ މަޝްވަރާކޮށްފި އެވެ.
އެ މަޝްވަރާގައި ކޮމިޝަނާ އޮފް ޕޮލިސް މުހައްމަދު ހަމީދުގެ އިތުރުން އެ އިދާރާގެ ގިނަ އިސް އޮފިޝަލުން ވަނީ ބައިވެރިވެފަ އެވެ.
އެ ބައްދަލުވުމަކީ އަންނަ އަހަރުގެ ރިޔާސީ އިންތިހާބުގެ ސެކިއުރިޓީއާ ގުޅުންހުރި ކަންކަމާއި ބެހޭގޮތުން ފުލުހުންނާ ދެމެދު ކުރެވޭ މަޝްވަރާތަކުގެ ފުރަތަމަ ބައްދަލުވުންކަމަށް އީސީގެ އޮފިޝަލަކު "އަދަދު" އަށް ވަނީ މައުލޫމާތު ދީފަ އެވެ.
"ކުރިއަށް އޮތް ތަނުގައި ސެކިއުރިޓީގެ ކަންކަމުގައި ފުލުހުންނާ އިތުރު މަޝްވަރާތައް ކުރެވިގެންދާނެ" އީސީގެ އޮފިޝަލް ވިދާޅުވި އެވެ.
ރިޔާސީ އިންތިހާބުގައި ވާދަކުރާ ޕާޓީތައް
ރިޔާސީ އިންތިހާބަށް މިހާތަނަށް ޝައުގުވެރިކަން ފާޅުކުރި ޕާޓީތަކުގެ ތެރޭގައި ވެރިކަން ކުރާ މައި ޕާޓީ އެމްޑީޕީ، އިދިކޮޅު ޕީޕީއެމް، އަލަށް އުފެއްދި އެމްއެންޕީގެ އިތުރަށް އެމްޑީއޭ ހިމެނެ އެވެ.
ޕީޕީއެމްގެ ރިޔާސީ ކެންޑިޑޭޓަކީ ކުރީގެ ރައީސް އަބްދުﷲ ޔާމީނެވެ. އެމްޑީއޭއިން ވާދަކުރައްވަނީ އެ ޕާޓީގެ ލީޑަރު އަހުމަދު ސިޔާމް މުހައްމަދެވެ.
އެމްޑީޕީއާއި އެމްއެންޕީގެ ކެންޑިޑޭޓް ކަނޑައަޅަނީ ޕްރައިމަރީއަކަށް ފަހުގަ އެވެ. އެމްއެންޕީގެ ޕްރައިމަރީ އަންނަ ޖެނުއަރީ މަހު އޮންނާނެ އެވެ. އެމްޑީޕީގެ ޕްރައިމަރީ ބާއްވާނެ ތާރީހެއް އަދި ނުނިންމަ އެވެ.
އެމްޑީޕީގެ ޕްރައިމަރީގައި ރައީސް އިބްރާހީމް މުހައްމަދު ސޯލިހް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވާދަކުރައްވާނެ ކަމަށް ބެލެވެ އެވެ. އެމްއެންޕީގެ ޕްރައިމަރީއަށް އަދި ޝައުގުވެރިކަން ފާޅުކުރެއްވީ އެ ޕާޓީގެ ރައީސް، މަޖިލީހުގެ ދަނގެތި ދާއިރާގެ މެންބަރު މުހައްމަދު ނާޒިމް އެކަންޏެވެ.
އޭގެ އިތުރަށް، ކުރީގެ ހޯމް މިނިސްޓަރު އުމަރު ނަސީރު ވެސް ވަނީ އަމިއްލަ ކެންޑިޑޭޓެއްގެ ގޮތުގައި ރިޔާސީ އިންތިހާބުގައި ވާދަކުރައްވާނެ ކަމަށް ވިދާޅުވެފަ އެވެ.
