ދިވެހި ރައްޔިތުންގެ ޕާޓީ (ޑީއާރުޕީ) އަށް 3،000 މެންބަރުން ހަމަކުރުމަށް ދިން ތިން މަހުގެ ނޯޓިސް ހަމަވެ، އެ ޕާޓީ އުވާލުމަށް އިލެކްޝަންސް ކޮމިޝަން (އީސީ) އިން ނިންމީ އިއްޔެ އެވެ.

އީސީގެ ސެކްރެޓަރީ ޖެނެރަލް ހަސަން "އަދަދު" ނޫހަށް ވިދާޅުވީ މެންބަރުން ހަމަކުރުމަށް ނޯޓިސް ދިން މުއްދަތު ހަމަވެއްޖެ ކަމާއި ޕާޓީ އުވާލަން ނިންމިކަން ޑީއާރުޕީއަށް އަންގާފައިވާ ކަމަށެވެ.

"ޕާޓީގެ ދަރަންޏާ މެދު ޒިންމާވާނެ ފަރާތެއް އެންގުމަށް ވެސް ވާނީ އަންގައިފަ، މި މަހުގެ 30 ގެ ކުރިން އަންގަން ވާނެ ކަމަށް،" ހަސަން ވިދާޅުވި އެވެ.

ދެހާސްފަސް ވަނަ އަހަރު ވުޖޫދުކުރި ސިޔާސީ ޕާޓީތަކުގެ ގާނޫނުގެ ދަށުން ދެވަނައަށް ރަޖިސްޓްރީ ކުރި ޕާޓީއަކީ ޑީއާރުޕީ އެވެ. އެއީ އޭރު ރާއްޖޭގެ އެންމެ މަގުބޫލު ސިޔާސީ ޝަހްސިޔައްތަކަށް ހުންނެވި، އޭރުގެ ރައީސުލްޖުމްހޫރިއްޔާ މައުމޫން އަބްދުލް ގައްޔޫމް އިސްވެ އުފެއްދެވި ޕާޓީއެކެވެ.

ޖުލައި 15، 2005 ގައި ރަޖިސްޓްރީ ކުރި ޑީއާރުޕީއަކީ 2011 ވަނަ އަހަރު ޖެހެންދެކަށް އެންމެ މެންބަރުން ގިނަ ސިޔާސީ ޕާޓީ އެވެ. 2009 ވަނަ އަހަރުގެ ރައްޔިތުންގެ މަޖިލީހުގެ އިންތިހާބާއި 2011 ވަނަ އަހަރުގެ ލޯކަލް ކައުންސިލް އިންތިހާބުގައި ވެސް އެންމެ ގިނަ ގޮނޑި ކާމިޔާބުކުރީ އެ ޕާޓީންނެވެ.

ނަމަވެސް ރައީސް މައުމޫނާއި، ފަހުން އެމަނިކުފާނުގެ ވެސް ތާއީދާއެކު ޕާޓީގެ ލީޑަރަކަށް ހަމަޖެއްސެވި އަހުމަދު ތަސްމީން އަލީއާ އުފެދުނު ހިޔާލުތަފާތުވުންތަކުގެ ތެރެއިން މައުމޫން ޕާޓީ ދޫކުރެއްވުމުން އެމަނިކުފާނުގެ އެތައް ހާސް ސަޕޯޓަރުން އެ ޕާޓީ ދޫކޮށްލި އެވެ.

ދެހާސްތޭރަވަނަ އަހަރުގެ ރިޔާސީ އިންތިހާބަށް ފަހު، ތަސްމީން ވެސް ޕާޓީ ދޫކޮށް އެމްޑީޕީއާ ގުޅުނެވެ. ދެން އެ ޕާޓީގެ ލީޑަރަކު ހަވާލުވި ރައްޔިތުންގެ މަޖިލީހުގެ ކުރީގެ މެންބަރު މުހައްމަދު ނަޝީދު (ކާނަލް) ވެސް 2018 ގެ ރިޔާސީ އިންތިހާބަށް ފަހު ޕާޓީ ދޫކޮށް، ޕީޕީއެމާ ގުޅުނެވެ.

ޑީއާރުޕީގެ ލީޑަރަކަށް މި ވަގުތު ހުންނެވީ ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު އަބްދުﷲ ޖާބިރެވެ. ޖާބިރުގެ ލީޑާޝިޕްގައި، އެކި ފަހަރު މަތިން 3،000 އަށް ވުރެ މެންބަރުން މަދުވެގެން މެންބަރުން ހަމަކުރުމަށް އިލެކްޝަންސް ކޮމިޝަނުން ނޯޓިސް ދީފައިވެ އެވެ.

ބައެއް މުހިންމު ހަބަރުތައް

• މާލެ އާއި ތިލަފުއްޓާ ދެމެދު އަޅާ ބުރިޖުގެ މަސައްކަތުގައި ބޭނުންކުރި ޕްލެޓްފޯމެއް ވިލިމާލެ ފަރަށް އުރި ލިބުނު ގެއްލުމުގެ ބަދަލުގައި އެ މަސައްކަތްކުރާ އިންޑިއާގެ އެފްކޮންސް ކުންފުންނީގެ މައްޗަށް ކުރި ޖޫރިމަނާ އެ ކުންފުނިން އިސްތިއުނާފުކުރީ އިއްޔެ އެވެ.

• ރާއްޖޭގައި ގޮއްވަން އުޅުނު އެންމެ ބޮޑު ބޮން ހުއްޓުވުމަށް ފުލުހުން ހިންގި އޮޕަރޭޝަންގައި ހައްޔަރުކުރި ސ. މަރަދޫ/ އާޒާ މުހައްމަދު ގައިސް ބަންދުން ދޫކޮށްލުމަށް ހައިކޯޓުން އިއްޔެ އަމުރުކޮށްފައި ވަނިކޮށް، އަލުން ހައްޔަރުކުރިކަން ރިޕޯޓުކުރީ އިއްޔެ އެވެ.

• ޕޮލިސް ބޯޑުން ހުސްވެފައިވާ ގޮނޑިއަށް ކުރީގެ ކޮމިޝަނާ އޮފް ޕޮލިސް އަހުމަދު ފަސީހު އައްޔަނުކުރީ އިއްޔެ އެވެ.

ދުވަހުގެ ކޯޓޭޝަން

ރާއްޖޭގެ މަސްވެރިކަމުގެ ހާލަތާ ގުޅޭގޮތުން ވާހަކަ ދައްކަވަމުން ފިޝަރީޒް މިނިސްޓަރު ޑރ. ހުސައިން ރަޝީދު ވިދާޅުވީ:

މިހާރު ރާއްޖޭގެ މަސް އެކްސްޕޯޓްކުރާ ގޮތަށް ބަލާއިރު، އެ މަސްވެރިކަމުގެ ބޮޑު ފައިދާއެއް ވަނީ ތައިލެންޑަށާއި، އިރުމަތީ އޭޝިއާގެ ގައުމުތަކަށް,

ދުވަހުގެ ފޮޓޯ

ރައީސް ސޯލިހުގެ ދެކަނބަލުން ގަތަރަށް ފުރާވަޑައިގަތުން. މިހާރު ކުރިއަށްދާ ފީފާ ވޯލްޑް ކަޕް 2022ގެ ސެމީ-ފައިނަލް މެޗުތައް ބައްލަވާލައްވަން ހަމަޖެހިފައިވާއިރު، މިއީ ރާއްޖެއާއި ގަތަރާއު ދެމެދު އޮތް ހަރުދަނާ ގާތް ގުޅުން ރަމްޒުކޮށްދޭ ދަތުރުފުޅެއް ކަމަށް ރައީސް އޮފީހުން ބުނޭ --- ފޮޓޯ: ރައީސް އޮފީސް