ރާއްޖޭގައި ގޮއްވަން އުޅުނު އެންމެ ބޮޑު ބޮން ހުއްޓުވުމަށް ފުލުހުން ހިންގި އޮޕަރޭޝަންގައި ހައްޔަރުކުރި ސ. މަރަދޫ/ އާޒާ މުހައްމަދު ގައިސް ބަންދުން ދޫކޮށްލުމަށް ހައިކޯޓުން އިއްޔެ އަމުރުކޮށްފައި ވަނިކޮށް، ރޭ އަލުން ހައްޔަރުކޮށްފި އެވެ.
އެ މައްސަލާގައި 14 މީހަކު ހައްޔަރުކޮށްފައިވާ އިރު، އައްޑޫ ސިޓީ މަރަދޫފޭދޫ ކޯޓުން ނެރުނު އަމުރަކުން ޝަރީއަތް ނިމެންދެން ބަންދުކޮށްފައިވާ ގައިސް ވަނީ އެ އަމުރު އިސްތިއުނާފު ކޮށްފަ އެވެ. ހައި ކޯޓުން އެ މައްސަލާގައި އިއްޔެ ކުރި ހުކުމުގައި ވަނީ އޭނަގެ މައްޗަށް ކުރާ ތުހުމަތާ ގުޅިގެން ބަންދު ކުރުމަށް ފުލުހުންގެ އިންޓެލް ރިޕޯޓް ފިޔަވައި އިތުރު ހެއްކެއް ހުށަހަޅާފައި ނެތް ކަމަށެވެ.
ތިން ފަނޑިޔާރުންގެ ބެންޗަކުން ބަލައި، އެ ފަނޑިޔާރުންގެ އިއްތިފާގުން ނެރުނު އަމުރުގައިވަނީ އެ މިންވަރަކީ ތުހުމަތު ކުރެވޭ ވަރަށް އެކަށޭނަ ހެއްކަށް ނުވާތީ އޭނާ ބަންދުކުރި އަމުރު ބާތިލްކުރަން ޖެހޭ ކަމަށެވެ.
ނަމަވެސް އޭނާ ބަންދުން ދޫކޮށްލާފައި ހުރެއްޖެނަމަ މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް ބެލެވޭތީ ރޭގެ ވަގުތެއްގައި ވަނީ އޭނާ ހައްޔަރުކޮށްފަ އެވެ. ގައިސް ހައްޔަރުކުރީ ކްރިމިނަލް ކޯޓުން ނެރެފައިވާ އަމުރެއްގެ ދަށުން ކަމަށް ފުލުހުން ބުނެ އެވެ.
ހަމައެއާއެކު މައްސަލައިގެ ޝަރީއަތް ނިމެންދެން ގައިސް ބަންދުގައި ބެހެއްޓުމަށް ކްރިމިނަލް ކޯޓުން އަމުރުކޮށްފައިވާ ކަމަށް ވެސް ފުލުހުން ބުނެ އެވެ.
ފުލުހުން އިތުރަށް ބުނީ މި މައްސަލާގައި ގައިސްއާ ދެކޮޅަށް ހަމައެކަނި އިންޓެލިޖެންސް ރިޕޯޓު ހުށަހަޅާފައި ނުވަނީ އިތުރު ހެކި ތަހުލީލު ކުރެވިފައި ނުވާތީ ކަމަށެވެ. އެގޮތުން، އޭނާ ދިރިއުޅޭ ގެ ބަލާފާސްކޮށް މައްސަލައާ ގުޅުންހުރި ކަމަށް ބެލެވޭ ބައެއް ތަކެތި ނެގިފައިވީ ނަމަވެސް އެތަކެތި، ގައިސްގެ ބަންދަށް މުއްދަތު ޖެހި ވަގުތު ތަހުލީލު ކުރެވިފައި ނުވާތީ އެކަމާ ގުޅޭ ރިޕޯޓު ކޯޓަށް ހުށަހަޅާފައި ނުވާ ކަމަށެވެ.
މާލެ، އައްޑޫ އަދި ކ. ގުރައިދޫގައި ކުރިއަށް ގެންދިޔަ މި އޮޕަރޭޝަނުގައި ފުލުހުން ފެއިލް ކޮށްލާފައިވަނީ ރާއްޖެއަށް ދޭން އުޅުނު އެންމެ ނުރައްކާތެރި ހަމަލާ ކަމަށެވެ.
މީހުން ހައްޔަރުކުރުމަށްފަހު ފުލުހުންނާއި ސިފައިން ވަނީ ފުލުހުންގެ ޑޯގް ސްކޮޑް އަދި ބޮން ސްކޮޑް ބޭނުންކޮށްގެން އައްޑޫގެ އެކި ސަރަހައްދުތައް ބަލާ ފާސްކޮށްފަ އެވެ.
އެގޮތުން، އެ އޮޕަރޭޝަނުގައި ހައްޔަރުކުރި މީހުންގެ ގެތަކާއި، އެ މީހުންނާ ގުޅުންހުރި ވެހިކަލްތަކާއި ޑިންގީއެއް ބަލައި ފާސްކުރުމުގެ ތެރެއިން ގެއަކުން ބާރުގަދަ ގޮވުންތަކަށް ބޭނުންކުރާ ހައި އެކްސްޕޯލިސްވް ކެމިކަލް ފެނިފައިވާ ކަމަށް ފުލުހުން ވަނީ ބުނެފަ އެވެ.
އެ އޮޕަރޭޝަނުގައި އައްޑޫއިން ފުލުހުން ހޯދި ބާރުގަދަ ގޮވާތަކެއްޗަކީ ރާއްޖެއިން ބޭރުން އެތެރެކުރި ތަކެތިތޯ ސުވާލުކުރުމުން ވިދާޅުވީ މައްސަލަ މިހާރުވެސް ތަހުގީގު ކުރަމުންދާތީ އިތުރު ތަފުސީލު ދެވެން ނެތް ކަމަށެވެ.
