ރާއްޖޭން ޔޫރަޕަށާއި އިނގިރޭސިވިލާތަށް ބޭރުކުރާ މަހުގެ އުފެއްދުންތަކުން މިހާރު ނަގާ ޑިއުޓީއަށް ލުއި ހޯދުމަށް ސަރުކާރުން ގިނަ މަޝްވަރާތަކެއް ކުރަމުން އަންނަ ކަމަށާއި، ކައިރި މުސްތަގުބަލެއްގައި އެކަމަށް ހައްލެއް ލިބިގެންދާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވީ އިއްޔެ އެވެ.
މިއަހަރުގެ މަސްވެރިންގެ ދުވަސް ފާހަގަކުރަން ގދ. ފަރެސްމާތޮޑާގައި ބޭއްވި ހަފްލާގައި ވާހަކަ ދައްކަވަމުން ރައީސް ވިދާޅުވީ ބަނާ މަހަށް ހަމަ އަގު ނުލިބޭ ކަމުގެ ޝަކުވާ މަސްވެރިން ތަކުރާރުކޮށް ކުރަމުން އަންނަ ކަމަށެވެ.
އެމަނިކުފާނު ވިދާޅުވި ގޮތުގައި މިފްކޯއަށް މިހާރު މަސް މި ގަންނަނީ ކިލޯއެއް 17ރ. ރޭޓުން ނަމަވެސް، ބޭރުގެ ބާޒާރުތަކުގައި ރާއްޖޭގެ ރޯމަސް ވިއްކަން މި ޖެހެނީ މިއަށް ވުރެ އަގު ހެޔޮކޮށެވެ.
"މިދެންނެވި ރޭޓުން ގަނެގެން އެއަށް ވުރެ ކުޑަ އަގެއްގައި ވިއްކަން ޖެހުމުން، މިފްކޯއަށް އެތައް ރުފިޔާގެ ގެއްލުން އެބަވޭ. އެ ގެއްލުން މި ފޫބައްދަނީ، ސަރުކާރުން މިފްކޯއަށް ފައިސާ ދީގެން،" ރައީސް ފާހަގަކުރެއްވި އެވެ.
މިއީ ވިޔަފާރު އުސޫލުން ބަލާނަމަ ދެމެހެއްޓެނިވި ކަމަކަށް ނުވާނެ ކަން ފާހަގަކުރައްވަމުން ރައީސް ސޯލިހު މިރޭ ވެސް ވަނީ މަހުގެ އުފެއްދުންތަކަށް ވެލިއު އެޑްކޮށްގެން ލިބޭ ނަފާ އިތުރުކުރަންޖެހޭ ކަމަށް ވިދާޅުވެފަ އެވެ.
އެގޮތުން، ރާއްޖޭގެ މަހުގެ ބާވަތްތައް އެކްސްޕޯޓްކުރާ އެންމެ ބޮޑު މާކެޓްތަކުގެ ތެރޭގައި ޔޫރަޕުގެ ގައުމުތަކާއި އިނގިރޭސިވިލާތް ހިމެނޭއިރު އެ ހުރިހާ ގައުމަކުން 24 ޕަސަންޓުގެ ބޮޑު ޑިޔުޓީއެއް ނަގަމުންދާކަން އެމަނިކުފާނު ފާހަގަކުރެއްވި އެވެ.
ނަމަވެސް، އެކަމަށް ލުއި ލިބޭނެ ގޮތެއް ހޯދުމަށް ސަރުކާރުން ގިނަ މަސައްކަތްތަކެއް ކުރަމުންދާ ކަމަށް ރައީސް ވިދާޅުވި އެވެ.
"ސަރުކާރުން މިއަންނަނީ އިނގިރޭސިވިލާތާއި އީޔޫއާ އެކުގައި މިކަމާ މެދު މަޝްވަރާ ކުރަމުން. މިކަމަށް މާ ދުރު ނޫން މުސްތަގުބަލެއްގައި ހައްލެއް ލިބޭނެ ކަމުގެ އުންމީދު ވަރަށް ބޮޑު،" އެމަނިކުފާނު ހާމަކުރެއްވި އެވެ.
އެ ކަމެއް ހައްލެއް ލިބުމުން، ދިވެހި މަސްވެރިން ބަނާ މަހަށް ހަމަ އަގު ލިބިގެންދާނެ ކަމަށް ވެސް ރައީސް މިރޭ ވިދާޅުވި އެވެ.
ބައެއް މުހިންމު ހަބަރުތައް
ހދ. ނޮޅިވަރަމުގައި މަރުވެފައި އޮއްވާ ފެނުނު މީހާގެ ފިރިމީހާގެ ބަންދަށް 15 ދުވަސް ޖަހާފައި ވަނީ އިއްޔެ އެވެ.
ފޮޓޯތަކެއް ލީކުކޮށްލާނެ ކަމަށް ބުނެ ބިރު ދައްކައިގެން އަންހެނަކު ރޭޕް ކުރި ފިރިހެނަކު 20 އަހަރަށް ޖަލަށް ލުމަށް ކްރިމިނަލް ކޯޓުން ހުކުމް ކުރީ އިއްޔެ އެވެ.
ފުޅާދާއިރާއެއްގައި ސުޕަމާކެޓުގެ ވިޔަފާރި ރާއްޖޭގައި އެންމެ ފުރަތަމަ ފެށި ކުންފުނިތަކުގެ ތެރެއިން އެއް ކުންފުނި، ބްރައިޓު ބުރަދާސް އިން ހިންގާ އަގޯރާގެ އެންމެ ބޮޑު ދެ ފިހާރަ ބަންދު ކުރަން ނިންފައިވާކަން ރިޕޯޓުކުރީ އިއްޔެ އެވެ.
ދުވަހުގެ ކޯޓޭޝަން
މަސްވެރިންނަށް ތެޔޮ ލިބުމުގައި ކުރިމަތިވާ ދަތިތަކާ ގުޅޭގޮތުން މަސްވެރިންގެ ދުވަހުގެ ޖަލްސާގައި ވާހަކަފުޅު ދައްކަވަމުން ރައީސް އިބްރާހިމް މުހައްމަދު ސޯލިހު ވިދާޅުވީ:
އަޅުގަނޑުމެންގެ ވިސްނުމަކީ ތިޔަބޭފުޅުން އެދިވަޑައިގެންނެވި ގޮތަށް ތިޔަބޭފުޅުން ބޭނުންވާ ގޮތަށް ޑިސްކައުންޓު ރޭޓުގައި އެސްޓީއޯއީން ތެޔޮ ހަމަޖައްސައިދިނުން. އަޅުގަނޑު ޔަގީންކޮށް ތިބޭފުޅުންނަށް ކުރިމަތިވެފައިމިވާ ދަތި އިރާދަކުރެއްވިއްޔާ ވަރަށް އަވަހަށް ހައްލު ކޮށްދޭނެ ކަމުގެ ޔަގީންކަން.
ދުވަހުގެ ފޮޓޯ
މަސްވެރިން ދުވަސް ފާހަގަކުރުމުގެ ހަރަކާތްތަކުގެ ތެރެއިން ފަރެސްމާތޮޑާގައި ބޭއްވި ކާބޯތަކެތޯގެ މައުރަޒުގައި ބަހައްޓާފައި ހުރި ރިހާކުރު ފުޅިއެއް ރައީސް އިބްރާހިމް މުހައްމަދު ސޯލިހު ބައްލަވަނީ. -- ފޮޓޯ: ރައީސް އޮފީސް
