ވިޔަފާރިއަށް އައިސްފައިވާ ބަދަލުތަކާއި ތަރައްގީގެ ބިންގާ އެޅި، އެކަން ފެށިގެންދިޔަ ދުވަސްވަރުގެ "ދިވެހިރާއްޖޭގެ އެހާރުގެ ބައެއް ހަނދާން" ތައް ނިޝާން އިއްޒަތުގެ ވެރިޔާ، އަބްދުއްރަޝީދު ހުސެއިން (އަބްސީ) ގެ ގަލަންކޮޅުން ލިޔުއްވައި ނެރެދެއްވައިފި އެވެ.
އެކަމަށް ހާއްސަކޮށް މިއަދު ބޭއްވި ރަސްމިއްޔާތެއްގައި މި ފޮތް ނެރެދެއްވީ ލިޔުންތެރިންގެ ގުޅުމުގެ ރައީސް އަދި ނިޝާން އިއްޒުއްދީންގެ ވެރިޔާ އައްބާސް އިބްރާހިމް އެވެ.
ލިޔުންތެރިންގެ ގުޅުމުން ބުނީ މި ފޮތަކީ ތާރީހަށް ލޯބިކުރާ ފަރާތްތަކާއި ކިޔަވާ ކުދީންނަށް ވަރަށް މުހިންމު ފޮތަކަށް ވާނެ ކަމަށެވެ. މި ފޮތުގައި ސާކު ސަރަހައްދުގެ ތާރީހާއި ރާއްޖޭގައި އެކި ދުވަސްވަރު ހިނގާފައިވާ ކަންކަމުގެ އިތުރުން 19 ވަނަ ގަރުނުގައި އެކިފަހަރުމަތީން ރާއްޖެ ޒިޔާރަތް ކުރި މީހުން ލިޔެފައިވާ ލިޔުންތަކާ ހަވާލާދީ އަގުހުރި މައުލޫމާތުތަކެއް ހިމަނުއްވާފައިވެ އެވެ.
މި ރަސްމިއްޔާތުގައި ވާހަކަފުޅު ދައްކަވަމުން އައްބާސް ވިދާޅުވީ ތަޖުރިބާ ހުރި ކޮންމެ ލިޔުންތެރިއަކު ވެސް ރާއްޖެއާ ގުޅޭގޮތުން އެ ބޭފުޅެއްގެ ހުރި ދުރު ހަނދާންތައް ލިޔުއްވުމަކީ ވަރަށް މުހިންމު ކަމެއް ކަމަށާއި މިހާރުގެ ޒުވާނުންނަށް ދިވެހިންނަކީ ކޮން ބައެއްކަމާއި ކިހިނެއް އުޅުނު ބައެއްކަން އެނގޭނީ އޭރުން ކަމަށެވެ.
އޭގެއިތުރުން އޭނާ ވިދާޅުވީ މި ފޮތް ލިޔުއްވި އަބްދުއްރަޝީދަކީ ރާއްޖޭގައި ކަންކަން ރޭވި ހިންގަން ފެށުނު ދުވަސްވަރު އެ މަންޒަރު ވަރަށް ގާތުން ދެކި ތަޖުރިބާ ކުރެއްވި ބޭފުޅެއްކަމަށާއި މި ފޮތުގައި އެ ހަނދާންތައް ވަރަށް ފުރިހަމައަށް ގެނެސްދެއްވާފައިވާ ކަމަށެވެ.
އަބްދުއްރަޝީދު ހުސެއިންއަކީ ގިނަ ދުވަސްތަކެއް ވަންދެން ސަރުކާރަށް ހިދުމަތް ކޮށްދެއްވާފައިވާ ބޭފުޅެކެވެ. އޭގެެެއިތުރުން އަދަބިއްޔާތަށް ހިދުމަތް ކުރުމުގެ އާންމު ހިދުމަތުގެ އިނާމު 2006 ވަނަ އަހަރު އެ މަނިކުފާނަށް ލިބިފައިވެ އެވެ. ނިޝާން އިއްޒުންދީންގެ ލަގަބު އެ މަނިކުފާނަށް އަރުވާފައިވަނީ 2013 ވަނަ އަހަރު އެވެ.
