ދިވެހި ސަރުކާރަށް ވަރަށް ގިނަ ދުވަހު ހިދުމަތް ކުރެއްވި ސަމަރުބްލޫ އިބްރާހީމް މަނިކު އަވަހާރަވީ އިއްޔެ އެވެ.
އޭނާ އަވަހާރަވީ އިންޑިއާގެ ހޮސްޕިޓަލެއްގައި ފަރުވާދެމުން މިއަދުގެ ވަގުތެއްގައި ކަމަށްވެ އެވެ.
އެންމެ ފަހުން ބޭއްވި ބްރޯޑްކާސްޓިން އެވޯޑް ހަފުލާގައި ލައިފް ޓައިމް އެޗީވާސް އެވޯޑު ހާސިލް ކުރެއްވި އިބްރާހިމް މަނިކު ވަނީ 1976 އަހަރުން ފެށިގެން 30 އަހަރު ދިވެހިރާއްޖޭގެ ބްރޯޑްކާސްޓިންގެ ދާއިރާގައި މަސައްކަތް ކުރައްވައިފަ އެވެ.
އެގޮތުން، 1980 ވަނަ އަހަރުން ފެށިގެން 1989 ވަނަ އަހަރާ ހަމައަށް ދިވެހިރާއްޖޭގެ އަޑުގެ ޑެޕިއުޓީ ޑިރެކްޓަރު ކަމާއި ޑިރެކްޓަރު ކަން ކުރައްވާފައިވެ އެވެ. އަދި، އޭގެ ފަހުން 1993 ވަނަ އަހަރާ ހަމައަށް ދައުލަތުގެ ޓީވީއާއި ރޭޑިއޯގެ އިސްވެރިޔާކަމުގެ މަގާމު އަދާކުރެއްވި އެވެ.
އޭގެ ފަހުން އެ ބޭފުޅާ ވަނީ ސަރުކާރުގެ އިސް އެކިއެކި މަގާމުތައް ފުރުއްވާފަ އެވެ. އިބްރާހިމް މަނިކު ސަރުކާރަށް ފުރުއްވި މަގާމުތައް:
- މިނިސްޓާ އޮފް އިންފޮމޭޝަން އެންޑް ކަލްޗާ
- މިނިސްޓާ އޮފް އިންފޮމޭޝަން، އާޓްސް އެންޑް ކަލްޗާ
- މިނިސްޓާ އޮފް ޔޫތު އެންޑް ސްޕޯޓްސް
- ކޮމިއުނިޓީ އޯގަނަައިޒޭޝަން ޑިވެލޮޕްމަންޓް ކައުންސިލްގެ ޗެއާމަން
ވަޒީރު ފެންވަރުގައި 1993 ވަނަ އަހަރުން ފެށިގެން އިބްރާހިމް މަނިކު ވަނީ އެކިއެކި ވުޒާރާތަކުގައި 15 އަހަރު ހޭދަކުރައްވާފައިވެ އެވެ.
އޭނާ ވަނީ ރައްޔިތުންގެ މަޖިލީހުގެ ތިލަދުންމަތީ އުތުރުބުރީގެ މެންބަރުކަން ވެސް 2000 ވަނަ އަހަރުން ފެށިގެން ދެ ފަސް އަހަރުގެ ދެ ދައުރެއްގައި ކުރައްވާފަ އެވެ.
އިބްރާހިމް މަނިކު ވަނީ މިއުޒިކާއި ލަވަކިޔުން ކުރިއެރުވުމުގެ ރޮނގުން 1996 ގައި އާންމު ހިދުމަތުގެ ހިތްވަރު ދިނުމުގެ އިނާމު ވެސް ހާސިލް ކުރައްވާފައިވެ އެވެ.
ބައެއް މުހިންމު ހަބަރުތައް
- ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރު ޝިމާޒު އަލީއަށް ހަމަލާ ދިން ކަމުގެ ތުހުމަތުގައި މީހަކު ހައްޔަރުކޮށް ބަންދަށް 10 ދުވަސް ޖެހީ އިއްޔެ އެވެ.
- ރައްޔިތުންގެ މަޖިލީހުގެ ގަވައިދު ކޮމިޓީން ފާސްކޮށް، ޕްލޭނިން މިނިސްޓްރީއަށް ފޮނުވާފައިވާ "ހުޅުމާލެ ޕްލޭނިން އަދި އިމާރާތްކުރުމުގެ ގަވައިދު" ގެޒެޓްކުރަން ނުފޮނުވާ ބާއްވާފައި އޮތީ ގަވައިދާ ހިލާފަށް ކަމަށް ކޮމިޓީން ނިންމި ނަމަވެސް, އެކަމުގައި މިނިސްޓްރީން ދޫ ދިނުމެއް ނުގެންގުޅޭ ކަމަށް ބުނީ އިއްޔެ އެވެ.
- އެންވައިރަމެންޓް މިނިސްޓްރީން ހުއްދަ ނަގައިގެން ރާއްޖެއަށް ކުނި އެތެރެކުރެވޭ ގޮތް ހެދުމަށް ކުނި މެނޭޖުކުރުމާ ބެހޭ ގާނޫނުގައި ހިމަނާފައިވާކަން ރިޕޯޓުކުރީ އިއްޔެ އެވެ.
ދުވަހުގެ ކޯޓޭޝަން
ރ. އުނގޫފާރު ރީޖަނަލް ހޮސްޕިޓަލުގެ އާ އިމާރާތާއެކު އެ ހޮސްޕިޓަލުގެ ހިދުމަތްތަކަށް އަންނާނެ ކުރިއެރުންތަކާ ގުޅޭގޮތުން އެ ހޮސްޕިޓަލުގެ މެނޭޖަރު އިބްރާހިމް ޒަޔާން އިއްޔެ "އަދަދު" އަށް ވިދާޅުވީ:
ހޮސްޕިޓަލަށް އަންނަ ކުރިއެރުމާއެކު އެންމެ ބޮޑު އުފަލަކީ، ކޮންމެ ކަމެއްގައި މާލެއަށް ދަތުރުކުރަން ނުޖެހި، ސަރަހައްދުގެ ރައްޔިތުންނަށް ބޭނުންވާ ހިދުމަތްތައް މި ހޮސްޕިޓަލުން ފޯރުކޮށްދެވުން
ދުވަހުގެ ފޮޓޯ
އެމްބީއޭ ބާސްކެޓް ޗެމްޕިއަންޝިޕްގައި ރޭ ޓްރެކްސް އާއި ރޯޔަލްސް ބައްދަލުކުރި މެޗުގެ ތެރެއިން. -- ފޮޓޯ: މުހައްމަދު ޝާބިން
