ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރު ޝިމާޒު އަލީއަށް ހަމަލާ ދިން ކަމުގެ ތުހުމަތުގައި މީހަކު ހައްޔަރުކޮށް ބަންދަށް 10 ދުވަސް ޖަހައިފި އެވެ.
"އަދަދު"އިން ސުވާލުކުރުމުން ފުލުހުންގެ މީޑިއާ އޮފިޝަލް މިއަދު ވިދާޅުވީ އޭނާ ހައްޔަރުކުރީ މި މަހުގެ 22 ވަނަ ދުވަހު ކަމަށެވެ.
ކްރިމިނަލް ކޯޓުން ނެރެފައިވާ ބަންދު އަމުރުގައިވާ ގޮތުން ހައްޔަރުކޮށްފައިވަނީ ހ. ހިޔާކޯޅި، އުމުރުން 21 އަހަރުގެ މުހައްމަދު ޝާވީ އެވެ.
ޝިމާޒު "އަދަދު" އަށް ވިދާޅުވި ގޮތުގައި އެ ހަމަލާ ދިނީ އެ ރޭ 9:30 ހާއިރު، އޭނާ ދިރިއުޅޭ ގެއިން ނުކުމެގެން ސައިކަލަށް އެރި ވަގުތު އެވެ. ހަމަލާ ދިނީ އޭނާގެ ސައިކަލާ ޖެހިގެން ހުރި ސައިކަލްގެ މަތީގައި ތިބި ދެ ޒުވާނެކެވެ. ނަމަވެސް އެއީ ކޮންބައެއްކަން ޝިމާޒު އަށް ނޭނގެ އެވެ.
މީހެއްގެ ނަން ވިދާޅުނުވިޔަސް، ޝިމާޒު ތުހުމަތު ކުރައްވާ ގޮތުގައި އޭނާއަށް ދިން ހަމަލާތަކާއި މިނިސްޓްރީގެ މައްސަލަގަނޑާ ގުޅުމެއް އޮތުން އެކަށީގެންވެ އެވެ. އިޝާރާތް އެ ކުރެއްވީ އޭނާގެ މައްޗަށް ކުރާ ތުހުމަތުތަކާއި މަގާމުން ވަކިކުރަން ފޮނުވާފައިވާ ކަމަށް ބުނާ ސިޓީއާ އެވެ.
ޓްރާންސްޕޯޓް މިނިސްޓްރީގެ ކޮރަޕްޝަން މައްސަލަތަކެއްގެ ވާހަކަ ފެންމަތިވެފައި އޮއްވައި، ޝިމާޒު މަގާމުން ވަކިކޮށްދެއްވުމަށް ރައީސް އޮފީހުގައި މިނިސްޓަރު ނަހުލާ އެދިވަޑައިގެންފައިވާ ކަމަށް ދާދި ފަހުން ބައެއް މީޑިއާތަކުގައި ރިޕޯޓުކުރި އެވެ.
ނަމަވެސް ފޮނުއްވި ސިޓީގައި ޝިމާޒު ވަކިކުރައްވަން އެދިވަޑައިގެންފައި ނުވާނެ ކަމަށް މިނިސްޓަރު ނަހުލާ ވިދާޅުވި އެވެ.
ނަހުލާ ވަނީ ޝިމާޒަށް ދިން ހަމަލާ ކުށްވެރި ކުރާ ކަމަށް ވިދާޅުވެ ޓްވީޓު ވެސް ކުރައްވާފަ އެވެ. އެއަށް ފަހު ވިދާޅުވެފައި ވަނީ މައްސަލަތައް ބަލަމުންދާ ދަނޑިވަޅެއްގައި ނުފޫޒު ފޯރުވަން މަސައްކަތްކޮށް، "މިކަމުގެ ތެރޭގައި އަޅުގަނޑުގެ އާއިލާ އަށް ނިސްބަތްކޮށް ދެކެވޭ ވާހަކަތަކަކީ އަބުރު ކަތިލިމުގެ ހުތުރު އަމަލުތަކެއް،" ކަމަށެވެ.
