ރާއްޖެއަށް ކުރިމަތިވެފައިވާ އިގުތިސާދީ ދަތިކަމުން އަރައިގަތުމަށްޓަކައި ބަޖެޓް ސަޕޯޓްގެ ގޮތުގައި އިންޑިއާއިން 100 މިލިއަން އެމެރިކާ ޑޮލަރު (1.5 ބިލިއަން ރުފިޔާ) ލޯނެއް ރާއްޖެއަށް މިއަދު ދީފި އެވެ.
އެ ފައިސާ އިންޑިއާ ސަރުކާރުން ހަމަޖައްސާދީފައި ވަނީ، ސްޓޭޓް ބޭންކު އޮފް އިންޑިއާ (އެސްބީއައި) މެދުވެރުކޮށް ރާއްޖޭގެ ޓްރެޒަރީ ބޮންޑު ގަނެގެންނެވެ. އެކަމަށްޓަކައި އިންޑިއާއިން ވަނީ އެސްބީއައި އަށް ސޮވެރެއިން ގެރެންޓީ ދީފަ އެވެ.
އެ ފައިސާ ހަވާލުކުރުމުގެ ރަސްމިއްޔާތު ރާއްޖޭގެ ފޮރިން މިނިސްޓްރީގައި ބޭއްވި ނަމަވެސް، ފައިސާ އަނބުރާ ދައްކަންޖެހޭ މުއްދަތާއި އިންޓްރެސްޓް ރޭޓެއް، ދެ ގައުމުން ހާމައެއް ނުކުރެ އެވެ.
ރަސްމިއްޔާތުގައި ފޮރީން މިނިސްޓަރު އަބްދުﷲ ޝާހިދު ވިދާޅުވީ އިންޑިއާއަކީ ރާއްޖެއަށް ބޭނުންޖެހޭ ކޮންމެ ވަގުތެއްގައި އެންމެ އަވަހަށް އިޖާބަދީ އެންމެ ފުރަތަމަ އެހީތެރިކަން ފޯރުކޮށްދޭ ފަރާތް ކަމަށެވެ.
ބަޖެޓު ސަޕޯޓަށް 100 މިލިއަން އެމެރިކާ ޑޮލަރު ފޯރުކޮށްދިނުމަށް ރައީސް އިބްރާހީމް މުހައްމަދު ސޯލިހު އެދިވަޑައިގަތީ މި އަހަރުގެ އޯގަސްޓްގައި އިންޑިއާއަށް ކުރެއްވި ރަސްމީ ދަތުރުފުޅުގައި ބޮޑު ވަޒީރު ނަރެންދުރަ މޯދީއާއެކު ބޭއްވި މަޝްވަރާތަކުގައި ކަމަށް، ރާއްޖޭގައި ހުންނަ އިންޑިއާ ހައި ކޮމިޝަނުން ބުނެ އެވެ.
އިންޑިއާ ހައިކޮމިޝަނުން ބުނީ ބަޖެޓް ސަޕޯޓަށް 100 މިލިއަން ޑޮލަރު ފޯރުކޮށްދެނީ އެއްވެސް ޝަރުތަކާ ނުލައި، ދިވެހި ސަރުކާރުން އިސްކަން ދޭ ގޮތަކަށް އިގުތިސާދީ ދަތިކަމުން އަރައިގަތުމަށް ކަމަށެވެ.
އަންނަ އަހަރަށް ލަފާކޮށް 42.8 ބިލިއަން ރުފިޔާ ބަޖެޓެއް މަޖިލީހުން އިއްޔެ ފާސްކޮށްފައިވާއިރު، ބަޖެޓާއި ދައުލަތުގެ ދަރަންޏާ ގުޅޭ ގިނަ ކަންބޮޑުވުންތަކެއް މެމްބަރުންގެ ހުއްޓެވެ.
ދައުލަތުގެ ސީދާ ދަރަނި އަންނަ އަހަރު 9.2 ޕަސެންޓުން އިތުރުވެ، ޖުމްލަ ދަރަނި 101 ބިލިޔަން ރުފިޔާއަށް އަރާނެ ކަމަށް ފިނޭންސް މިނިސްޓްރީން ވަނީ ލަފާކޮށްފަ އެވެ.
