މިދިޔަ އަހަރުގެ ޑިސެމްބަރު މަހުގެ ތެރޭގައި ފުލުހުން ހިންގި ހާއްސަ ޑްރަގު އޮޕަރޭޝަނެއްގައި އަތުލައިގަތް 119 ކިލޯގެ މަސްތުވާތަކެތީގެ މައްސަލައިގައި ހައްޔަރުކޮށް ދައުވާ ކޮށްފައިވާ ގދ. ހޯނޑެއްދޫ، އަލޯރާ، އަހުމަދު މުޖާހިދުގެ ބަންދުން ދޫކޮށްލި މައްސަލަ ހައިކޯޓުގައި އިސްތިއުނާފުކޮށްފި އެވެ.
އެ މައްސަލައިގައި ތުހުމަތު ކުރެވޭ ތިން މީހުން ޝަރީއަތް ނިމެންދެން ބަންދުކުރަން ނިންމީ މާޗް، 2021 ގަ އެވެ. ޑައިފޯމިން ޓްރެކް ކުރުމުގެ ދައުވާ ދައުލަތުން އުފުލާފައިވާ މުޖާހިދުގެ ޝަރީއަތް ނިމެންދެން ބަންދުގައި ހުއްޓާ ކްރިމިނަލް ކޯޓުން ދޫކޮށްލީ މި ހިނގާ ނޮވެމްބަރު 23، ގަ އެވެ.
މިދިޔަ އަހަރު ހިންގި އޮޕަރޭޝަނުގައި 'ބަންގާ' ނަމަކަށް ކިޔާ ލޯންޗަކުން މާލެއަށް ގެނައި މަސްތުވާތަކެތި އަތުލައިގަތުމަށް ފުލުހުން ހިންގި އޮޕަރޭޝަނެއްގައި ގިނަ ތަންތަން ބަލާ ފާސްކޮށް މަސްތުވާތަކެތި އަތުލައިގެންފައިވެ އެވެ. އެގޮތުން އަމިއްލަ ކާރަކުންނާއި ސައިކަލަކުން ޖުމްލަ 91 ޕެކެޓުގެ ޑްރަގް ހޯދައި 119 ކިލޯގެ ޑްރަގް އަތުލައިގަތެވެ.
އެ މައްސަލައިގައި އަތުލައިގަތް މަސްތުވާތަކެއްޗަކީ ހއ. ހޯނޑެއްދޫއަށް ނިސްބަތްވާ އަރުޝަދު ހާލިދު ކަމަށް ފުލުހުން ބުނެ އެވެ. މަސްތުވާތަކެތި އަތުލައިގަތް އިރު އޭނާ ހުރީ ސްރީ ލަންކާގަ އެވެ. ނަމަވެސް ފަހުން އޭނާ މާލެ އައުމުން ވަނީ ހައްޔަރުކޮށްފަ އެވެ. އެކަމަކު ބަންދުގައި ބެހެއްޓޭނެވަރުގެ ހެއްކެއް ފުލުހުންނަކަށް ނުހޯދުނެވެ.
