ޅ. އަތޮޅު ހޮސްޕިޓަލުގެ އޮޕަރޭޝަން ޑޮކްޓަރު ހަބަރެއް ނުވާތާ ހަފްތާއެއް ވެފައިވާ ކަމަށް އެ ރަށު ހޮސްޕިޓަލުން ބުނެފި އެވެ.
ނައިފަރުގައި ހުންނަ އަތޮޅު ހޮސްޕިޓަލުގެ މެނޭޖަރު ޖައުފަރު އަބްދުﷲ "އަދަދު"އަށް ވިދާޅުވީ ޑޮކްޓަރު ޑިއުޓީއަށް ނުނިކުންނަތާ ހަފްތާއެއް ވެފައިވާ ކަމަށެވެ.
"ޑޮކްޓަރުންގެ ހެޑް ވެސް އަދި ހޮސްޕިޓަލުން ވެސް އެ ޑޮކްޓަރަށް ގުޅުމަށް ވަރަށް މަސައްކަތް ކުރި، އެކަމަކު މިހާތަނަށް ފޯނެއް ނަގާފައި ނުވޭ،" ޖައުފަރު ވިދާޅުވި އެވެ.
ފިލައިގެން ދިޔަ ކަމުގެ ޔަގީން ކަން ދެވެން ނެތް ކަމަށާއި އެހެންނަމަވެސް އެ ޑޮކްޓަރު ރަށުގައި ނެތް ކަން ޔަގީން ކަމަށް ވެސް ޖައުފަރު ވިދާޅުވި އެވެ.
ޅ. އަތޮޅު ހޮސްޕިޓަލަކީ އެ އަތޮޅާއި ކައިރި ބައެއް އަތޮޅުތަކުގެ ރައްޔިތުން ވެސް ހިދުމަތް ހޯދަމުން އަންނަ ތަނެކެވެ.
މީގެ ކުރިން ވެސް ބައެއް ހޮސްޕިޓަލުތަކަށް ފޮނުވާފައިވާ ޑޮކްޓަރުން ފިލާފައިވާ މައްސަލަތަކެއް ފެންމަތިވެފައިވެ އެވެ. އެގޮތުން މިދިޔަ އަހަރު ތިނަދޫ ހޮސްޕިޓަލަށް ފޮނުވި ފަސް ޑޮކްޓަރުން ފިލައިގެން ގޮސްފައިވާ ކަމަށް ހެލްތް މިނިސްޓަރު އަހުމަދު ނަސީމް ވިދާޅުވެފައިވެ އެވެ.
ނަސީމް އެ ދުވަހު މަޖިލީހުގައި ވިދާޅުވި ގޮތުގައި ޑޮކްޓަރުން މިގޮތަށް ފިލައިގެން ދިއުމަކީ އޭގެ ސަބަބުން މިނިސްޓްރީއަށް ވެސް ބޮޑެތި ގެއްލުންތަކެއްވާ ކަމެއް ކަމަށާއި މިފަދަ ކަންކަން ހިނގައިގެން ދިޔަ ނުދިނުމަށް ހޮސްޕިޓަލުތަކުން އިތުރު ސަމާލުކަމެއް ދޭން ޖެހޭ ކަމަށެވެ.
ތިނަދޫގައި އެކަން އެގޮތަށް ހިނގައި ދިއުމާ ގުޅިގެން، ޑޮކްޓަރުން ފިލައިގެން ދިއުން ހުއްޓުވުމަށް އިމިގްރޭޝަނާ ގުޅިގެން އިންތިޒާމުތަކެއް ވެސް ހަމަޖައްސައިފައިވާ ކަމަށް އެ ދުވަހު ނަސީމް ވިދާޅުވި އެވެ.
