ކުރިއަށް އޮތް 2023 ވަނަ އަހަރުގެ ރިޔާސީ އިންތިހާބުގައި ރާއްޖޭން ބޭރުގައި ބަހައްޓާނެ ވޯޓު ފޮށިތަކާ ގުޅޭ ގޮތުން އިލެކްޝަންސް ކޮމިޝަން (އީސީ) ގެ މެންބަރުންނާއި ފޮރިން މިނިސްޓްރީގެ ބައެއް އިސް ބޭފުޅުންނާ މަޝްވަރާކޮށްފި އެވެ.
އިލެކްޝަންސް ކޮމިޝަނުން ބުނީ ފޮރިން މިނިސްޓްރީއާއެކު ބޭއްވި ބައްދަލުވުމުގައި ރާއްޖޭން ބޭރުގައި ވޯޓު ފޮށިތައް ބެެހެއްޓުމުގެ އިންތިޒާމުތަކާއި އެކަމާ ގުޅޭ ބައެއް ކަންކަމާމެދު މަޝްވަރާކޮށްފައިވާ ކަމަށެވެ. ނަމަވެސް އެ މަޝްވަރާތަކުގެ ތަފުސީލެއް އަދި ނެތެވެ.
މީގެ ކުރިން ބޭއްވި ތިން ރިޔާސީ އިންތިހާބުގައި ވެސް ރާއްޖޭން ބޭރުގައި ވޯޓު ފޮށި ބަހައްޓާފައިވެ އެވެ. އެއީ އެ ގައުމުތަކުގައި ދިރިއުޅޭ ދިވެހީން ވޯޓު ލުމަށެވެ. އެ ގޮތަށް ގައުމެއްގައި ވޯޓު ފޮށި ބަހައްޓަން ނިންމަނީ، އެ ގައުމެއްގައި ވޯޓުލުމަށް ރަޖިސްޓްރީވާ ދިވެހީންގެ ވަކި އަދަދެއް ހަމަވުމުންނެވެ.
ރިޔާސީ އިންތިހާބުގެ ބަޖެޓަށް 90 މިލިއަން ރުފިޔާ، އަންނަ އަހަރަށް ލަފާކުރާ ދައުލަތުގެ ބަޖެޓްގައި ހިމަނާފައިވެ އެވެ. ބަޖެޓް އަދި ރައްޔިތުންގެ މަޖިލީހުން ފާސްކޮށްފައެއް ނުވެ އެވެ. ބަޖެޓް ދިރާސާކުރަން އެކުލަވާލި ކޮމިޓީން ތައްޔާރުކުރި ރިޕޯޓަށް ތަޅުމުގައި ކުރަން ޖެހޭ ބަހުސް އަދި ނުނިމެ އެވެ.
ރިޔާސީ އިންތިހާބަށް މިހާރު ވެސް ސިޔާސީ ޕާޓީތަކުން ވަނީ މަސައްކަތް ފަށައިފަ އެވެ. އިދިކޮޅު ޕީޕީއެމާއި ޕީއެންސީގެ ރިޔާސީ ކެންޑިޑޭޓަކީ ކުރީގެ ރައީސް އަބްދުﷲ ޔާމީން ކަމަށް ވަނީ ކަނޑައަޅުއްވައިފަ އެވެ. އެމަނިކުފާނުގެ މައްޗަށް ޝަރީއަތްތަކެއް ހިނގި ނަމަވެސް މި ވަގުތަށް ގާނޫނީ ހުރަހެއް ނެތެވެ.
އެމްޑީޕީގެ ރިޔާސީ ކެންޑިޑޭޓް އެތެރޭގެ ޕްރައިމަރީއަކުން ކަނޑައަޅާއިރު ޕްރައިމަރީ ބާއްވާނެ ތާރީހެއް އަދި އިއުލާން ނުކުރެ އެވެ. ވެރިކަން ކުރާ މައި ޕާޓީ ތެރޭގައި ދެ ފެކްޝަނެއް އެބަ އޮތެވެ. ދެ ފެކްޝަންގެ ލީޑަރުން، ރައީސް އިބްރާހީމް މުހައްމަދު ސޯލިހް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް އެ ޕްރައިމަރީގައި ވާދަކުރައްވާނެ ކަމަށް ބެލެވެ އެވެ.
މީގެ އިތުރުން އަލަށް އުފެއްދި މޯލްޑިވްސް ނޭޝަނަލް ޕާޓީ (އެމްއެންޕީ) ގެ ރިޔާސީ ޕްރައިމަރީ އަންނަ އަަހަރުގެ ޖެނުއަރީ މަހު ބާއްވަން ނިންމިއިރު، އޭގައި ވާދަކުރައްވާނެ ކަން އިއުލާން ކުރެއްވީ އެ ޕާޓީގެ ރައީސް އަދި ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު މުހައްމަދު ނާޒިމް އެކަންޏެވެ.
އެމްޑީއޭގެ ލީޑަރު އަދި ރައްޔިތުންގެ މަޖިލީހުގެ ދ. މީދޫ ދާއިރާގެ މެންބަރު އަހުމަދު ސިޔާމް ވެސް ރިޔާސީ އިންތިހާބުގައި ވާދަކުރައްވާނެ ކަން އިއުލާން ކުރައްވާފައިވެ އެވެ. ކުރީގެ ހޯމް މިިނިސްޓަރު އުމަރު ނަސީރު ވެސް ރިޔާސީ އިންތިހާބަށް އަމިއްލަ ގޮތުން ވާދަކުރައްވަން ކެމްޕޭންތަކެއް ކުރައްވާފައިވެ އެވެ.
