މަކަރާއި ހީލަތުން އޮޅުވާލައިގެން އެކައުންޓުގައި ހުންނަ ފައިސާ ހޯދުމުގައި ބޭންކުގެ އެއްވެސް މުވައްޒަފެއްގެ ދައުރެއް ނޯންނާނެ ކަމުގެ ޔަގީންކަން ބޭންކް އޮފް މޯލްޑިވްސް (ބީއެމްއެލް)އިން ދީފި އެވެ.
ރައްޔިތުންގެ މަޖިލީހުގެ އެސްއޯއީ ކޮމިޓީއަށް ބޭންކުގެ ބޭފުޅުން މިއަދު ހާޒިރުކޮށް ސުވާލުކުރުމުގައި، ފެލިދޫ ދާއިރާގެ މެންބަރު އިބްރާހިމް ފަޒުލް ރަޝީދު ވަނީ މިފަދަ މައްސަލަތައް ފެންމަތިވަނީ ހަމައެކަނި ބީއެމްއެލްގެ ކަސްޓަމަރުންނަށް ކަން ފާހަގަކުރައްވައި ބޭންކަށް ގިނަ ބަޔަކު ތުހުމަތު ކުރާ ކަން ފާހަގަކުރައްވާފަ އެވެ.
"ސްކޭމް ރިލޭޓެޑް ކަމެއްގައި އަޅުގަނޑު 100 ކޮންފިޑެންސްއާއެކީ ދަންނަވާލަން އަޅުގަނޑުމެންގެ ސްޓާފުންގެ އިންވޯލްމެންޓެއް ނެތް، މި ވީހާ ތަނަށް ރިޕޯޓުކުރެވިފައިވާ އެއްވެސް ސްކޭމެއްގައި ނެތް،" ތުހުމަތުތަކަށް ޖަވާބު ދެއްވަމުން ބީއެމްއެލްގެ ޗީފް ކޮމްޕްލައިންޓްސް އޮފިސަރު މަރިޔަމް ހަމީދު ވިދާޅުވި އެވެ.
ކޮންމެ މައްސަލައެއް ރިޕޯޓުކުރުމުގެ ކުރިން ވެސް މުވައްޒަފެއްގެ ބައިވެރިވުން އޮތްތޯ ބަލައި ބީއެމްއެލުން އެެކަން ޔަގީން ކުރާ ކަމަށް ވެސް އޭނާ ވިދާޅުވި އެވެ.
މަރިޔަމް ވިދާޅުވީ އެހެން ބޭންކުތަކުން ވެސް ސްކޭމް ހިނގައި އެކަންކަން ރިޕޯޓު ވެސް ކުރެވޭ ކަމަށެވެ.
އެހެން ބޭންކުތަކާ އަޅާ ބަލާއިރު ރާއްޖޭގައި ބީއެމްއެލްގެ ބްރާންޗުތަކާއި ވަސީލަތްތައް ވެސް ގިނަ ކަން ފާހަގަކުރައްވައި އޭނާ ވިދާޅުވީ މާކެޓުގެ 80 ޕަސެންޓު ޑޮމިނޭޓު ކުރަމުން އަންނަނީ ބީއެމްއެެލުން ކަމަށެވެ. އެހެންކަމުން މިފަދަ މައްސަލަތައް ބީއެމްއެލްގައި ގިނަ ކަމަށް ދައްކަނީ ވެސް އެ ސަބަބާ ހުރެ ކަމަށް ވިދާޅުވި އެވެ.
"ބޭންކް އޮފް މޯލްޑިވްސްގެ އަޑު މިހާ ގަދައަށް މީޑިއާގައި މިއުޅެނީ، އަޅުގަނޑުމެންގެ އެކައުންޓުތައް ގިނަވެފައި އަޅުގަނޑުމެންގެ ކަސްޓަމަރުން ގިނަވެފައި އަޅުގަނޑުމެންގެ ޗެނަލްސްތައް ގިނަވެފައި،" މަރިޔަމް ވިދާޅުވި އެވެ.
މިގޮތުން ފަސް ލައްކަ އަށް ވުރެ ގިނަ އެކައުންޓު ހުރިއިރު، ސްކޭމް ރިޕޯޓުކުރުމާއެކު އެކައުންޓު ބްލޮކް ކުރުމުން ބޭނުން ކުރަނީ ވަކި އެކައުންޓެއް ކަން އޭނާ ފާހަގަކުރެއްވި އެވެ.
ކޮމިޓީއަށް ހާޒިރުވި ބީއެމްއެލްގެ ބޭފުޅުން ވަނީ މިފަދަ ކަންކަމުން ރައްކާތެރިވުމަށް އެޅެން އޮތް އެންމެ މުހިންމު ފިޔަވަޅަނީ އާންމުން ހޭލުންތެރިވުން ކަން ފާހަގަކޮށްފަ އެވެ. އަދި އެކަމަށް ގިނަ މަސައްކަތްތަކެއް ކުރަމުން އަންނަ ކަމަށް ވެސް ބުނެފައިވެ އެވެ.
