މިހާރު ފުލުހުންނާއި ސިފައިން ހިންގަމުންދާ ކައުންޓާ ޓެރަރިޒަމް އޮޕަރޭޝަނުގެ ތެރެއިން ފުލުހުންގެ ޑޯގް ސްކޮޑު ބޭނުންކޮށްގެން އައްޑޫ ސިޓީގެ ބައެއް ތަންތަން ބަލައި ފާސްކުރަން ފަށައިފި އެވެ.
މިއީ މިހާރު ކުރިއަށްދާ އޮޕަރޭޝަނުގެ ތެރެއިން ހިންގާ ހަރަކާތެއްކަން ފުލުހުންގެ މީޑިއާ އޮފިޝަލު ވަނީ "އަދަދު" އަށް ކަށަވަރު ކޮށްދީފަ އެވެ.
އައްޑޫއިން "އަދަދު" އަށް މައުލޫމާތު ދިން މީހަކު ބުނި ގޮތުގައި މިހާރު ކުރިއަށްދަނީ މި އޮޕަރޭޝަނުގައި ހައްޔަރުކުރި މީހުންގެ ގެތަކާއި އެމީހުންގެ ބައެއް ސާމާނު ބަލައި ފާސްކުރުމުގެ މަސައްކަތެވެ. އެގޮތުން، އައްޑޫގެ ބައެއް ގެތަކުގެ އިތުރުން ހިތަދޫ ފަޅުތެރޭގައި އޮތް ލޯންޗެއް ވެސް ފުލުހުން ބަލައި ފާސްކޮށްފައިވާ ކަމަށް ވަނީ މައުލޫމާތު ލިބިފަ އެވެ.
މި މައްސަލައިގައި ފުލުހުން އައްޑޫއިން ނުވަ މީހަކު ހައްޔަރުކުރި އެވެ. ހައްޔަރުކުރި ނުވަ މީހުންނަކީވެސް ދިވެހި ފިރިހެނުންކަމަށް ފުލުހުން ވަނީ މީގެ ކުރިން ބުނެފަ އެވެ.
އައްޑޫގެ އިތުރުން މި އޮޕަރޭޝަނުގައި މާލެއިން ދެ މީހުން އަދި ކ. ގުރައިދޫއިން ދެ މީހުން ވަނީ ހައްޔަރުކޮށްފަ އެވެ. މައުލޫމާތު ލިބިފައިވާ ގޮތުގައި ގުރައިދޫއިން ހައްޔަރުކުރި ދެ މީހުންނަކީ ވެސް އައްޑޫއަށް ނިސްބަތްވާ ދެ މީހުންނެވެ.
މި އޮޕަރޭޝަނާއި ގުޅޭގޮތުން ހޯމަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމެއްގައި އިންސްޕެކްޓަރް އޮފް ޕޮލިސް އުސްވަތު އަހުމަދު ވިދާޅުވީ މި އޮޕަރޭޝަނުގެ ތެރެއިން ހުއްޓުވުނީ ގިނަ ބަޔަކު މަރައިލައިގެން ދޭން އުޅުނު ހަމަލާއެއް ކަމަށެވެ.
"މިފަރާތްތަކުން ރާވަމުން ދިޔައީ ގޮވާތަކެތި ބޭނުންކޮށްގެން ދިވެހިރާއްޖޭގެ ތަންތަނަށް ހަމަލާދީ ގިނަ ބައެއްގެ ފުރާނައަށް ނުރައްކާވާ ފަދަ ހަމަލާއެއް ދިނުމަށް ކަން ފާހަގަކުރެވިފައިވޭ،" އުސްވަތު ވިދާޅުވި އެވެ.
އިއްޔެ ނޫސްވެރިންނާ ބައްދަލުކުރައްވާ ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުވީ މި ހަމަލާގެ މައުލޫމާތު ލިބި ފުލުހުން އެކަން ހުއްޓުވުމުގެ މަސައްކަތް ފަށާފައިވަނީ މި އަހަރުގެ ޖޫން މަހުގެ ތެރޭގައި ކަމަށެވެ.
ފުލުހުން ބުނަނީ އަދިވެސް އޮޕަރޭޝަން ކުރިއަށްދާ ކަމަށާއި ދެވެންހުރިވަރަކުން މައުލޫމާތު ދެމުން ދާނެ ކަމަށެވެ.
