މަސްވެރިންނަށް ލިބެން ޖެހޭ ފައިސާ ނުލިބި ލަސްވާތީ، މިއަދު ލ. މާންދޫގައި ކުރިއަށް ގެންދިޔަ މުޒާހަރާ ހޫނުވެ، މަސްވެރިންނާއި ފުލުހުންގެ ކުރިމަތިލުމެއް ހިނގައިފި އެވެ.
މާންދޫގައި ހަރަކާތްތެރިވާ މަސްވެރިންގެ ޖަމްއިއްޔާގެ އޮފިޝަލެއް ކަމަށްވާ އާދަމް ފާރިޝް 'އަދަދު' އަށް ބުނީ، މުޒާހަރާގެ ތެރެއިން ބައިވެރިއަކު އެއްލި ގާބުރިއަކުން ޖެހި ފުލުހެއްގެ ބޯ ފަޅައިގެން ގޮސްފައިވާ ކަމަށެވެ. އަދި ޕެޕާ ސްޕްރޭ ބޭނުން ކުރުމުގެ ސަބަބުން މުޒާހަރާގެ ބައިވެރިންގެ ތެރެއިން ތިން މީހަކަށް އަނިޔާވެފައިވާ ކަމަށް ވެސް އޭނާ ބުންޏެވެ.
ފާރިޝް ބުނީ މުޒާހަރާ ހޫނުވީ މާންދޫގެ މެނޭޖްމަންޓާ ހަވާލުވެ ހުރި މީހަކު މަސްވެރިންގެ ކުރިމައްޗަށް ގެންނަން އެދުމުން، އެކަން ނުކުރުމުން، މަސްވެރިން، ފުލުހުން ދަމާފައިވާ ޓޭޕަށް ވުރެ އެތެރެއަށް ގޮސް، މާންދޫ އޮފީހުގެ ދޮރާ ދިމާލަށް ދިއުމުންނެވެ. އެ ހިސާބުން ފުލުހުން ޕެޕާ ސްޕްރޭ ބޭނުންކޮށްގެން މުޒާހަރާ ކޮންޓްރޯލް ކުރުމަށް މަސައްކަތްކުރިއިރު، މަސްވެރިންގެ ބަޔަކު ވަނީ ވެއްޔާއި ގާ ވެސް އުކާފައި ކަމަށް އޭނާ ބުންޏެވެ.
މި ކުރިމަތިލުމުގައި ފުލުހެއްގެ އިތުރުން ތިން މަސްވެރިއަކަށް އަނިޔާވިއިރު، މިވަގުތު މުޒާހަރާ އޮތީ މަޑުޖައްސާލަފަ އެވެ. މުޒާހަރާ މަޑުޖައްސާލާފައި ވަނީ، މަސްވެރިންގެ ކަންބޮޑުވުންތަކާ މެދު މަޝްވަރާ ކުރުމަށް ބައްދަލުވުންތަކެއް ކުރިއަށް ދާތީ އެވެ.
މިއަދު މަސްވެރިން މުޒާހަރާއަށް ނުކުތީ، އެމީހުންނަށް ލިބެންވާ ފައިސާ ނުލިބި ގިނަ ދުވަސްވަމުންދާތީ އެވެ. ލ. ގަމު މަސްވެރިންގެ އަނބިދަރިން ވެސް މިއަދުގެ މުޒާހަރާގައި ބައިވެރިވެ، އެމީހުންގެ ޝުއޫރު ފާޅުކޮށްފައިވެ އެވެ. ނަމަވެސް ހަމަނުޖެހުން ހިނގި ވަގުތު އެމީހުން އެތަނުގައި ނެތް ކަމަށް މައުލޫމާތު ލިބެ އެވެ.
