ފުލުހުންނާއި އެމްއެންޑީއެފްއިން މިހާރު ކުރިއަށްގެންދާ ކައުންޓަ ޓެރަރިޒަމް އޮޕަރޭޝަނުގައި މިހާތަނަށް 13 މީހަކު ހައްޔަރުކޮށްފައިވާ ކަމަށް ފުލުހުން ބުނެފި އެވެ.
ފުލުހުން ބުނި ގޮތުގައި މި އޮޕަރޭޝަންގައި ހައްޔަރުކުރީ އައްޑޫ ސިޓީން ނުވަ މީހަކާއި، މާލެއިން ދެ މީހެއް އަދި ކ. ގުރައިދޫން ދެ މީހެކެވެ. މި އެންމެނަކީ ވެސް ދިވެހި ފިރިހެނުން ކަމަށް ފުލުހުން ބުނެ އެވެ.
"އަދަދު" ނޫހަށް މައުލޫމާތު ލިބިފައިވާ ގޮތުގައި އިއްޔެ ފެށި މިއީ ޓެރަރިޒަމްގެ އަމަލެއް ހިންގަން އުޅޭ ކަމުގެ މައުލޫމާތު ލިބިގެން ކުރިއަށް ގެންދާ އޮޕަރޭޝަނެކެވެ.
މައުލޫމާތު ލިބިފައިވާ ގޮތުގައި އިއްޔެ ފުލުހުންނާއި ސިފައިން ވަނީ އައްޑޫ ސިޓީ ހިތަދޫގައި ހުރި ގެޔެއް ބަލާ ފާސްކޮށްފަ އެވެ.
މި އޮޕަރޭޝާނާ ބެހޭ ނުވަތަ ހައްޔަރުކުރި ފަރާތްތަކުން ކުރަން އުޅުނު ޓެރަރިޒަމްގެ އަމަލާބެހޭ އިތުރު ތަފުސީލެއް ފުލުހުން ހާމައެއް ނުކުރެ އެވެ.
ފުލުހުން ބުނީ އަދިވެސް މި އޮޕަރޭޝަން ކުރިއަށްދާ ކަމަށެވެ.
