މާލޭން ތިލަފުއްޓަށް ބަދަލު ނުކުރެވި އެއްވެސް ކެމިކަލް ގުދަނެއް ހުރެގެން ނުވާނެ ކަމަށާއި އެފަދަ ގުދަނެއް ނުހުންނާނެ ކަން ވަރަށް ޔަގީންވާ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ތޮއްޖެހިފައިވާ މާލޭގައި ހުރި ކެމިއަލް ގުދަންތައް ތިލަފުއްޓަށް ބަދަލުކުރުމުގެ މަސައްކަތް ސަރުކާރުން ފެށީ، މީގެ ތިން އަހަރު ކުރިން ހެންވޭރު އަބަދަށްހިޔާ މަގުގައި ހުރި ކެމިކަލް ގުދަނުގައި ހިނގި ބޮޑު އަލިފާނުގެ ހާދިސާއަށް ފަހު އަމާޒުވި ފާޑުކިއުންތަކަށް ފަހުގަ އެވެ.
"އެހާތަނަށް އައިރުގައި ކެމިކަލް ގުދަންތައް ހުރީ ގޭގޭގެ ތިރީގައާއި ފިހާރަތަކުގެ ތެރޭގައި، އެހެންނަމަވެސް އެ ހާދިސާއާ ގުޅިގެން ވަގުތުން ފިޔަވަޅުތަކެއް އަޅައި މާލެއިން ހުރިހާ ކެމިކަލް ގުދަންތަކެއް ބަދަލުކުރެވުނު،" ރޭގެ އަލިފާނުގެ ހާދިސާ ހިނގި ސަރަހައްދުގައި ހުންނަވައިގެން ރައީސް ވިދާޅުވި އެވެ.
ކެމިކަލް ގުދަން މާލޭގައި ނުހުންނާނެ ކަން "ޔަގީންވާ ކަމަށް" ރައީސް ވިދާޅުވިނަމަވެސް ސަރުކާރުގެ ކުންފުނި އެޗްޑީސީން "އަދަދު" އަށް ހިއްސާކުރި މައުލޫމާތުތަކުގައިވާ ގޮތުން 18 ގުދަނަކުން ތިލަފުށިން ޖާގަ ދިނުމުގެ މަސައްކަތް ކުރެވެމުންދާ ކަމަށެވެ.
ދެހާސްނަވާރަ ވަނަ އަހަރު ހިނގި ހާދިސާގައި އެކަކު މަރުވުމާ ގުޅިގެން، ކުރަން ފެށި މަސައްކަތުގެ ތެރެއިން މިހާތަނަށް ބަދަލު ކުރެވުނީ 34 ކެމިކަލް ގުދަން ކަމަށް އެޗްޑީސީން ބުންޏެވެ.
ޑިފެންސް މިނިސްޓަރު މާރިޔާ އަހުމަދު ދީދީ އޭރު ވިދާޅުވެފައިވާ ގޮތުގައި މާލޭގައި އޭރު 126 ކެމިކަލް ގުދަން ހުއްޓެވެ. އޭގެ ތެރެއިން 82 ގުދަނެއް ހުރީ މީހުން ދިރިއުޅޭ ސަރަހައްދުގައި ކަމަށް މިނިސްޓަރު ވިދާޅުވެފައިވެ އެވެ.
ރައީސް އިތުރަށް ވިދާޅުވީ ބައެއް ވޯކްޝޮޕްތައް ބަދަލުކުރުމުގެ މަސައްކަތް އަދިވެސް ކުރިއަށްދާ ކަމަށާއި މިކަމުގައި މިހާރު ވެސް ލަސްތަކެއް ވެފައިވާ ކަމަށް ގަބޫލުކުރައްވާ ކަމަށެވެ.
ރޭ ދަންވަރު މާލެ މ. ނިރުފެހިގޭގައި ހުރި ގަރާޖެއްގައި ރޯވެ މިހާތަނަށް ވަނީ 10 މީހަކު ވަނީ މަރުވެފަ އެވެ.
ރޯވި އިމާރާތުގެ ތިރީގައި ވެހިކަލް މަރާމާތުކުރާ ގަރާޖެއް ހިންގާއިރު، އެތަނުގެ މަސައްކަތުގައި ބޭނުންކުރުމަށް ގިނަ އަދަދެއްގެ ގޭސް ސިލިންޑަރު ހުރި ކަމަށް އެމްއެންޑީއެފުން ވަނީ ބުނެފަ އެވެ.
އެކަމުގެ ސަބަބުން އަލިފާން ކޮންޓްރޯލް ކުރުމަށް ގޮންޖެހުންތައް ކުރިމަތިވި ކަމަށް ވެސް އެމްއެންޑީއެފުން މިއަދު ބުންޏެވެ.
