ހުޅުމާލޭ ސްކޭޓު ޕާކު ސަރަހައްދުން ދުވާ ކުނި ވަހަކީ، އެ ސަރަހައްދުގައި ހުރި އެންސިސްގެ ގުރީން ޕުލާންޓަކުން ބޭރުވާ ވަހެއް ކަމަށާއި އޭގައި ކަންބޮޑުވާންޖެހޭ ވަރުގެ ކަމެއް ނެތް ކަމަށް އެޗްޑީސީން ބުނެފި އެވެ.
އެ ސަރަހައްދުން ކުނިވަސް ދުވާކަން ފުލުހުންގެ ސަމާލުކަމަށް އައިސްގެން އެ މުއައްސަސާއިން ވަނީ މިއަދު އެ ސަރަހައްދު ބަލައި ފާސްވެސް ކޮށްފަ އެވެ. އެ ސަރަހައްދުން ކުނިވަސް ދުވާތީ ބައެއް މީހުން ދަނީ ކަންބޮޑުވުން ފާޅުކުރަމުންނެވެ.
އެކަމާ ގުޅިގެން އެޗްޑީސީން މިއަދު 'އަދަދު' ނޫހަށް ބުނީ އެ ހުސްބިމުގެ ފުރަގަހަށް އޮންނަ ހުޅުމާލޭ އިންޑަސްޓްރިއަލް ޒޯނަކީ ތަފާތު އެކި މަސައްކަތްތައް ކުރާ ތަންތަން ހުންނަ ސަރަހައްދެއް ކަމުން އެކަން އެގޮތަށް މެދުވެރިވެދާނެ ކަމަށެވެ.
"އެފަދަ ކަންބޮޑުވުންތަކެއް އުޅޭތީ އަޅުގަނޑުމެންގެ އިންސްޕެކްޝަން ޓީމުން އެތަނަށް ގޮސް ބެލިބެލުމުން އެއީ އެ ސަރަހައްދުގައި ހުރި އެންސިސްގެ ގްރީން ޕްލާންޓަކުން ދުވާ ވަހެއްކަން އެނގުނު، އެކަން ރަނގަޅު ކުރަން އެންސިސްއަށް އަނގާފައި މިހާރު ވާނީ،" އެޗްޑީސީގެ ޕަބްލިކް ރިލޭޝަންސް އޮފިސަރު އަލީ މަޝާރު ވިދާޅުވި އެވެ.
ގްރީން ޕުލާންޓަކީ ގަސްކާނާ އުފެއްދުމަށް ހާއްސަކޮށްފައި ހުންނަ ތަނެކެވެ.
ހުޅުމާލޭ ސްކޭޓު ޕާކު ސަރަހައްދު ކުރިމަތިން އޮންނަ ހުސްބިމަކީ ވާ ބޯ، މީހުން ނޫޅޭ ތަނެކެވެ. އެ ސަރަހައްދުން މީގެ ކުރިންވެސް ކުނިވަސްދުވާ ކަމަށް ބައެއް މީހުން ބުނެ އެވެ. އެހެންނަމަވެސް، މިފަހަރު އެ ސަރަހައްދުން ކުނިވަސް ދުވުމުން އާމްމުންގެ ތެރޭގައި ނުތަނަވަސްކަމެއް އުފެދުނީ މިދިޔަ ސެޕްޓެމްބަރު، މަހު ގެއްލިގެން ހޯދަމުންދިޔަ މުހައްމަދު އަޒްހާންގެ ހަށިގަނޑު އެ ސަރަހައްދުން ފެނުމާ ގުޅިގެންނެވެ.
އެކަމާ ގުޅިގެން އެންސިސްއަށް ގުޅާލުމުން ބުނީ، އެކަން ރަނގަޅުކޮށް މީހުންނަށް އުނދަގޫ ނުވާނެ ގޮތަކަށް އެކަން ކުރުމުގެ މަސައްކަތް އެޗްޑީސީއާ ގުޅިގެން ކުރަމުންދާ ކަމަށެވެ.
