ފުލުހުންގެ ބެލުމުގެ ދަށުގައި ހުއްޓައި މިދިޔަ މަހުގެ 25 ވަނަ ދުވަހު މަރުވި ގދ. ހޯނޑެއްދޫ އަބްދުﷲ ރަޝީދުގެ ހަށިގަނޑު މާލެ ގެނެސް، މިރޭ އޭނާގެ މައްޗަށް ކަށު ނަމާދު ކުރާ ގޮތަށް ހަމަޖައްސައިފި އެވެ.
މަސްތުވާތަކެތީގެ މައްސަލައެއްގައި، ފުލުހުންގެ ބެލުމުގެ ދަށަށް ގެންދިޔަ އަބްދުﷲ ރަޝީދު މަރުވީ ފުލުހުންގެ އިހުމާލުން ކަމަށް ތުހުމަތުކޮށްފައިވަނިކޮށް އޭނާގެ ހަށިގަނޑު ވަނީ މިދިޔަ ހޯމަ ދުވަހު އިންޑިއާއަށް ގެންގޮސްފަ އެވެ. ޕޯސްޓްމޯޓަމް ހެދުމަށް ފަހު މިހާރު ވަނީ މާލެ ގެނެސްފަ އެވެ.
އެނގިފައިވާ ގޮތުގައި، މިއަދު މަޣުރިބް ނަމާދަށް ފަހު އަބްދުﷲ ރަޝީދުގެ މައްޗަށް ކުރާ ކަށު ނަމާދު މާލޭގެ އާސަހާ މިސްކިތުގައި އޮންނާނެ އެވެ.
ހޯނޑެއްދޫން އޭނާ ހައްޔަރުކޮށްގެން ލޯންޗަކަށް އަރުވަނިކޮށް އޭނާގެ މެއަށް ވަރަށް ބޮޑު ތަދުވާ ކަމަށް ރަޝީދު ބުނަމުންދިޔަ ކަމަށް އެ ވަގުތު ބަނދަރު ސަރަހައްދުގައި ތިބި މީހުން ވަނީ ބުނެފަ އެވެ. ނަމަވެސް އޭނާ ގެންދިޔައީ ވެސް މާ ދުރު ރަށެއްގެ ހޮސްޕިޓަލަކަށެވެ.
ފުލުހުންގެ އިހުމާލު އޮތް ކަމަށް ތުހުމަތު ކުރެވޭ މައްސަލައަކަށް ވާތީވެ މައްސަލަ ތަހުގީގު ކުރަމުން ދަނީ ނެޝަނަލް އިންޓެގްރޭޝަން ކޮމިޝަން (އެންއައިސީ) އަދި ހިއުމަން ރައިޓްސް ކޮމިޝަން (އެޗްއާރުސީއެމް) އިންނެވެ. ހަށިގަނޑުގެ ޕޯސްޓްމޯޓަށް ހެދުމަށް ނިންމީ އެންއައިސީންނެވެ.
ނަމަވެސް އާއިލާއިން ދިޔައީ ޕޯސްޓްމޯޓަމް ނުހަދައި ހަށިގަނޑު ވީހާވެސް އަވަހަކަށް އާއިލާއަށް ހަވާލުކޮށްދިނުމަށް އެދެމުންނެވެ. އެ ކަމަށް އަމުރުކޮށްދިނުމަށް އެދި ސިވިލް ކޯޓަށް އާއިލާއިން މައްސަލައެއް ވެސް ހުށަހެޅި އެވެ.
އެކަމަކު ސިވިލް ކޯޓުން ހުކުމް ކުރީ އެފަދަ އަމުރެއް ނެރެން ޖެހޭ ގާނޫނީ އަދި ޝަރުއީ ސަބަބެއް ވެސް ނެތް ކަމަށެވެ. ޕޯސްޓްމޯޓަމް ހެދުމުގެ އިހުތިޔާރު ފުލުހުންނަށް އޭގެ ގަވާއިދުގެ ދަށުން ލިބިދެ އެވެ.
ހޯނޑެއްދޫގައި ފުލުހުން ހިންގި އޮޕަރޭޝަންގައި އިތުރު ދެ މީހަކު ވެސް ހައްޔަރުކުރި އެވެ. އަދި ހޯނޑެއްދޫންނާއި އެ ރަށް ކައިރީ އޮންނަ ފަޅު ރަށަކުން، ބިން ކޮނެގެން 82 ކިލޯއަށް ވުރެ ގިނަ މަސްތުވާތަކެތި ވެސް ފުލުހުން ހޯދާފައިވެ އެވެ.
