ނަސްރުގެ ދުވަހުގެ ހަނދާންތަކުން ލިބޭ އެއް އިބުރަތަަކީ ދުޝްމަނުންގެ މަކަރުވެރި ރޭވުންތަކާއި ޓެރަރިޒަމްގެ ނުރައްކާތެރި އަމަލުތަކާ މެދު އަބަދުމެ ހޭލައި ތައްޔާރުވެ ތިބެން ޖެހޭކަމުގެ ފިލާޅުކަމަށް ރައީސް އިބްރާހީމް މުހައްމަދު ސޯލިހު ވިދާޅުވީ އިއްޔެ އެވެ.

ނޮވެމްބަރު މަހުގެ ތިން ވަނަ ދުވަސް ރާއްޖޭގައި ނަސްރުގެ ދުވަހުގެ ގޮތުގައި ފާހަގަކުރަން ފެށީ 1988 ވަަނަ އަހަރުގެ ނޮވެމްބަރު މަހުގެ ތިން ވަނަ ހަނގުރާމަވެރިންގެ ބަޔަކު ރާއްޖެއަށް ދިން ހަމަލާއެއް ނާކާމިޔާބުކޮށްލުމުގައި ލިބުނު ނަސްރުގެ އުފާފާޅުކުރުމަށެވެ. ދިވެހިންގެ ބަޔަކު އިސްވެ ތިބެ ދިން އެހަމަލާގައި ބައިވެރިރިވީ އަވަށްޓެރި ސްރީލަންކާގެ ތަމަޅަ ހަނގުރާމަވެރިންގެ ބައެކެވެ.

މިއަހަރުގެ ނަސްރުގެ ދުވަހުގެ މުނާސަބާގައި ރައީސް އާއްމުކުރެއްވި ހިތާބުގައި ވިދާޅުވީ ނަސްރުގެ ދުވަހުގެ ހަނދާންތަކުން ގިނަ އިބުރަތްތަކެއް ލިބޭ ކަމަށެވެ.

"...އެންމެ ފުރަތަމަ ކަމަކީ، ފުރިހަމަ އީމާންތެރިކަމާއި ހިތްވަރާއި ސާބިތުކަމާއެކު މާތް ނިޔަތެއްގައި ޖިހާދުކުރާ ކޮންމެ މީހަކަށްވެސް، މާތް ﷲގެ މަދަދާއި ނަޞްރުން ކާމިޔާބު ދެއްވާނެ ކަމެވެ. އަނެއް ކަމަކީ، ދުޝްމަނުންގެ މަކަރުވެރި ރޭވުންތަކާއި ޓެރަރިޒަމްގެ ނުރައްކާތެރި ޢަމަލުތަކާ މެދު، އަބަދުވެސް ހޭލައި ތައްޔާރުވެ ތިބެންޖެހޭނެ ކަމެވެ. ހަމައެފަދައިން، ގައުމުގެ މިނިވަންކަމާއި ސިޔާދަތު ދިފާއުކުރުމުގެ ގާބިލުކަމާއި ހިތްވަރާއި ކެރުން ހުރި ދިވެހި ޒުވާނުންތަކަކަށް ގައުމު ބޭނުންވާ ކަމެވެ. އަދި، ރައްޔިތުންގެ އެކުވެރިކަމާއި އެއްބައިވަންތަކަމަކީ، ދުޝްމަނުންގެ ނުބައި ރޭވުންތައް ނާކާމިޔާބުކޮށްލެވޭނެ އެންމެ ވަރުގަދަ ހަތިޔާރުކަން،" ހިތާބުގައި ރައީސް ވިދާޅުވި އެވެ.

މީގެ 34 އަހަރު ކުރިން ދިން އުދުވާނީ ހަމަލާގެ ހަނދާން އާކުރައްވަމުން ހިތާބުގައި ރައީސް ވިދާޅުވީ އެ ހަމަލަޔާއެކު ބިރުވެރިކަމާއި ނާމާންކަމުން ދިވެހި ޖައްވު ބަނަކޮށްލި ކަމަށެވެ. އެދުވަހު ކުށެއް ނެތް ދިވެހިންތަކެއް ޝަހީދުކޮށްލުމުން ހިތްތައް ކުދިކުދިވެގެން ދިޔަކަމަށާއި އެެހެން ނަމަވެސް މާތް ﷲގެ ނަސްރާއި މެދު ދިވެހިންގެ ހިތްތަކުގައި އޮތް އިތުބާރާއި ޔަގީންކަން ފަނޑުނުވާ ކަމަށް ވެސް އެމަނިކުފާނު ވިދާޅުވި އެވެ.

"...އެ ދުވަހު ދިވެހިންނަށް އެކަލާނގެ ދެއްވި މަތިވެރި ނަސްރުގެ ހަނދާންތައް އައުކުރުމުގެ އެންމެ މުހިންމު ބޭނުމަކީ، އެ މަތިވެރި ނަސްރު ލިބުމަށް މެދުވެރިވި ސަބަބުތަކުގައި ހިފައި އެގޮތުގައި ސާބިތުވެ ތިބުމުގެ އަޒުމް އައުކުރުން،" ރައީސް ވިދާޅުވި އެވެ.

އެމަނިކުފާނު ވިދާޅުވި ގޮތުގައި ދިވެހި ސިފައިންގެ ސަފުތަކުގެ ބަދަހިކަން އިތުރުކުރުމުގެ ވަރުގަދަ ރޫހު މުޅި އަސްކަރިއްޔާގައި ދެމެހެއްޓުމަށް، ސިފައިންގެ ކޮންމެ މީހަކު ފަރުދީ ގޮތުންވެސް މަސައްކަތް ކުރުމަކީ ނަސްރުގެ ދުވަސް ފާހަގަކުރުުމުގެ މުހިއްމު އެއް ބޭނުމެވެ.

ނޮވެންބަރު ތިނެއްގެ އުދުވާނީ ޙަމަލާއިން ދިވެހި ގައުމު ދިފާޢުކުރުމަށް، ދިވެހި އުންމަތް ތެދުވީ އެއް ހަށިގަނޑެއް ފަދައިން ކަމަށާއި މާތް ﷲ ދިވެހިންނަށް އެ ދުވަހު ދެއްވި ސާބިތުކަމުގެ އަސްލަކީ ދިވެހިންގެ ހިތްތަކުގައި އޮތް އިސްލާމްދީނުގެ ސައްހަ އަގީދާ ކަމަށް ވެސް އެމަނިކުފާނު ވިދާޅުވި އެވެ. އެ ދުވަހު ދިވެހިންނަށް ދެއްވި ހިތްވަރުގެ ސިއްރަކީ، ދިވެހިންގެ ހިތްތަކުގައި އޮތް ގައުމީ ލޯބި ކަމަށް ވެސް ރައީސް ވިދާޅުވި އެވެ.

ދިވެހި ސިފައިންގެ ހަކަތައަކީ، އަސްކަރިއްޔާއާ މެދު ދިވެހިންގެ ހިތްތަކުގައި އޮތް އިތުބާރާއި ޔަގީންކަން ކަމަށާއި ދުޝްމަނުންނަށް ލިބުނު އެންމެ ބޮޑު ބިރާއި ސިހުމަކީ، ދިވެހިންގެ ކިބައިން ފެނުނު އެއްބައިވަންތަކަމާއި އެކުވެރިކަން ކަމަށް ވެސް އެމަނިކުފާނު ވިދާޅުވި އެވެ.

ނަސްރުގެ ދުވަސް ފާހަގަކުރަނީ 3 ނޮވެމްބަރު، 1988 ގައި ލަންކާގެ ކުލީ ސިފައިންގެ ބަޔަކު ގޮވައިގެން ދިވެހީންގެ ބަޔަކު މާލެއަށް ހަމަލާދިން ދުވަހާ ގުޅުވައިގެންނެވެ. އެ ހާދިސާއަށް މިއަދު 33 އަހަރު ވަނީ ފުރިފަ އެވެ. އެދުވަހުގެ އުދުވާނީ ހަމަލާގައި ސިފައިންގެ 8 ބޭކަލަކާއި އާންމުންގެ 11 މީހުން ހިމެނޭހެން 19 ދިވެއްސަކު ޝަހީދުވި އެވެ.

ބައެއް މުހިންމު ހަބަރުތައް

• މި އަހަރު ލަފާކުރި މިންވަރާ ގާތަށް ވެސް ހިލޭ އެހީގެ ގޮތުގައި ފައިސާ ލިބިފައިނުވާއިރު، އަންނަ އަހަރު 2.46 ބިލިއަން ރުފިޔާ ލިބޭނެ ކަމަށް އަންދާޒާކޮށް 2023 ގެ ބަޖެޓުގައި ހިމަނާފައިވާކަން ރިޕޯޓުކުރީ އިއްޔެ އެވެ.

• ސަރުކާރު ހިންގާ ކޯލިޝަންގެ މައި ޕާޓީ, އެމްޑީޕީގެ ތަރުޖަމާނަކަށް އަނަސް އަބްދުއްސައްތާރު އައްޔަނުކުރީ އިއްޔެ އެވެ.

• ޖުޑީޝަލް ސާވިސް ކޮމިޝަންގެ މައްސަލަ ބަލާ ކޮމިޓީއަށް ލިޔުމުން ޖަވާބުދާރީވާން ފުރުސަތު ލިބޭ ގޮތަށް ގާނޫނަށް ގެނައި އިސްލާހު ރައީސް އިބްރާހިމް މުހައްމަދު ސޯލިހް ތަސްދީގުކުރެއްވީ އިއްޔެ އެވެ.

ދުވަހުގެ ކޯޓޭޝަން

ނަސްރުގެ ދުވަހުގެ މުނާސަބަތުގައި ރައީސް ސޯލިހު ދެއްވި ހިތާބުގައި އިއްޔެ ވިދާޅުވީ:

އެ ދުވަހު ދިވެހިންނަށް އެކަލާނގެ ދެއްވި މަތިވެރި ނަސްރުގެ ހަނދާންތައް އައުކުރުމުގެ އެންމެ މުހިންމު ބޭނުމަކީ، އެ މަތިވެރި ނަސްރު ލިބުމަށް މެދުވެރިވި ސަބަބުތަކުގައި ހިފައި އެގޮތުގައި ސާބިތުވެ ތިބުމުގެ އަޒުމް އައުކުރުން

ދުވަހުގެ ފޮޓޯ

ނަޞްރުގެ ދުވަހުގެ މުނާސަބަތުގައި އެމްއެންޑީއެފުން ކުރިއަށްގެންދާ ހަރަކާތްތަކުގެ ތެރޭގައި ހިމެނޭ "ވިކްޓްރީ ލެޕް" ގެ ތެރެއިން. ވިކްޓްރީ ލެޕްއަކީ އަސްކަރިއްޔާތަކުގައި ކާމިޔާބީ ފާހަގަ ކުރުމަށާއި އަސްކަރީ ސަފުތަކުގެ ބަދަހިކަން ދައްކައިދީ ލަޝްކަރުގައި ގައުމީ ރޫޙާއި ޖޯޝް އަށަގެންނެވުމަށް ބާއްވާ ހަރަކާތެއް --- ފޮޓޯ: އެމްއެންޑީއެފް