ގދ. ހޯނޑެއްދޫގެ އިތުރުން އެ ރަށް ކައިރީގައި އޮންނަ ފަޅު ރަށެއްގައި ވަޅުލާފައި ހުރި ގިނަ އަދަދެއްގެ މަސްތުވާތަކެތި އިއްޔެ ފުލުހުން ވަނީ ހޯދާފަ އެވެ.

ހޯނޑެއްދޫގައި ފުލުހުން ކުރިއަށް ގެންދާ ވަރުގަދަ އޮޕަރޭޝަނެއްގައި މީގެ ކުރިން ވެސް އެ ރަށުގެ ވަލު ތެރޭގައި ވަޅުލާފައި ހުރި 13 ކިލޯގެ މަސްތުވާތަކެތި ފުލުހުން ވަނީ ހޯދައިފަ އެވެ.

އެ އޮޕަރޭޝަން އަދިވެސް ކުރިއަށްދާއިރު، ޕޮލިސް ކޮމިޝަނަރު މުހައްމަދު ހަމީދު މިއަދު ކުރެއްވި ޓްވީޓެއްގައި ވިދާޅުވީ ހޯނޑެއްދޫގެ އިތުރުން އެ ރަށް ކައިރީގައި އޮންނަ ފަޅު ރަށެއްގައި ވަޅުލާފައި ހުރި ޖުމްލަ 69 ކިލޯގެ ޑްރަގު ފުލުހުން ހޯދާފައިވާ ކަމަށެވެ.

އެއާއެކު، އެ އޮޕަރޭޝަންގައި ފުލުހުން މިހާތަނަށް ޖުމްލަ 82 ކިލޯގެ މެތު އަދި ހެރޮއިން ހޯދާފައިވާ ކަމަށް ހަމީދު ވިދާޅުވި އެވެ.

ގިނަ އަދަދެއްގެ މަސްތުވާތަކެތި ހޯދުނު ކަމަށް ފުލުހުން ބުނިއިރު ގދ. ހޯނޑެއްދޫ އާއި އިތުރު ރަށަކުން މަސްތުވާތަކެތީގެ ބޮޑު މައްސަލައެއްގެ ތުހުމަތުގައި ފުލުހުން މިދިޔަ ހަފްތާގައި ވަނީ މީހުން ހައްޔަރުކޮށްފަ އެވެ.

އޭގެ ތެރެއިން ހައްޔަރު ކުރި އަބްދުﷲ ރަޝީދު ފުލުހުންގެ ބެލުމުގެ ދަށުގައި ހުއްޓާ ވަނީ މަރުވެފަ އެވެ. އާއިލާއިން ތުހުމަތު ކުރަނީ އަބްދުﷲއަށް ފަރުވާދޭން ފުލުހުން ވަރަށް ބޮޑަށް ލަސް ކުރި ކަމަށެވެ. އޭނާ ހޮސްޕިޓަލަށް ގެންދިޔައިރު ވެސް އޮތީ މަރުވެފަ އެވެ.

އެ އޮޕަރޭޝަން ކުރިއަށް ގެންދަނިކޮށް މަސްތުވާތަކެތީގެ ބޮޑެއް ކަމަށް ފުލުހުން ބުނާ ހޯނޑެއްދޫއަށް ނިސްބަތްވާ އަރުޝަދު ހާލިދު ވެސް ފުލުހުން ހައްޔަރު ކުރި އެވެ. ނަމަވެސް ބަންދުގައި ބެހެއްޓޭނެވަރުގެ ހެކި ނެތިގެން އޭނާ ވަނީ ދޫކޮށްލައިފަ އެވެ.

ބައެއް މުހިންމު ހަބަރުތައް

• ސުޕްރީމް ކޯޓުގެ ފަނޑިޔާރުންނަށް ފާރަލި ކަމުގެ ތުހުމަތުގައި ސަސްޕެންޑްގައި މިދިޔަ ހަތް މަސް ދުވަހު ހުންނެވި އެ ކޯޓުގެ ސެކްރެޓަރީ ޖެނެރަލް ޑރ. ހުސައިން ފާއިޒް މަގާމުން ވަކިކުރީ އިއްޔެ އެވެ.

• ފެނަކަ ކޯޕަރޭޝަން ލިމިޓެޑުން އުޞޫލުތަކާއި ހިލާފަށް ލިކުއިޑޭޓެޑް ޑެމޭޖުގެ ގޮތުގައި ކަނޑަންޖެހޭ ފައިސާ އުނިނުކޮށް ކޮންޓްރެކްޓަރުންނަށް ފައިސާ ދީފައިވާ ކަމަށް ތުހުމަތުކުރެވުނު މައްސަލަ ތަހުގީގުކޮށް، އެކުންފުނީގެ ކުރީގެ މެނޭޖިން ޑިރެކްޓަރު އަހުމަދު ނިމާލްގެ މައްޗަށް ދައުވާކޮށްދިނުމަށް އެދި ޕްރޮސިކިއުޓާ ޖެނަރަލްގެ އޮފީހަށް ފޮނުވީ އިއްޔެ އެވެ.

• އައްޑޫ ސިޓީގައި އެހެން ދީނެއްގެ ޝިއާރެއް ފާޅުކުރި މައްސަލަ އިސްލާމިކް މިނިސްޓްރީއިން ކުށްވެރިކޮށް، އެ މައްސަލަ ބަލައިދިނުމަށް އެދި ފުލުހުންނަށް ހުށަހެޅީ އިއްޔެ އެވެ.

ދުވަހުގެ ކޯޓޭޝަން

ރާއްޖޭގައި ސިއްހީ ބޮޑެތި ބަލިތައް އިތުރުވަމުންދިޔުމާ ގުޅޭގޮތުން ވާހަކަފުޅު ދައްކަވަމުން ހެލްތު މިނިސްޓަރު އަހްމަދު ނަސީމް އިއްޔެ ވިދާޅުވީ

އެ ދިރާސާތައް ބާރަށް ކުރިއަށް އެބަދޭ، ޑަބްލިއުއެޗްއޯގެ އެހީގެ ދަށުން އަޅުގަނޑުމެން މިކަންތައް ކުރިއަށް މިގެންދަނީ. ޑަބްލިއުއެޗްއޯ ޓީމެއް އައިސް ހަމަ ތިޔަ ވިދާޅުވި ގޮތަށް، މިކަންތައް ހިނގާ ގޮތް ބަލަމުން އެބަ ގެންދޭ. މިތަނުން މައުލޫމާތުތަކާއި އެއްޗިހި ހިފައިގެން ގޮސް އެބޭފުޅުންވީ,

ދުވަހުގެ ފޮޓޯ

ރައީސް އޮފީހުގެ ސްޕޯކްސްޕާސަން މިއުވާން މުހައްމަދު އިއްޔެ ނޫސްވެރިންނާ ބައްދަލުކުރައްވަނީ. ސަރުކާރުން ބުނަނީ މާލޭގައި އެއްވެ އުޅުމުގެ ފުރުސަތު އަދި ލިބޭނެ ކަމަށް އިއްޔެ ވިދާޅުވި. ސަރުކާރުގެ މި ދައުރުގައި ބާކީ އޮތީ އެންމެ އަހަރެއް --- ފޮޓޯ: ރައީސް އޮފީސް