ފުލުހުންގެ ބެލުމުގެ ދަށުގައި ހުއްޓާ މަރުވި ގދ. ހޯނޑެއްދޫ، ސާވެން، އަބްދުﷲ ރަޝީދުގެ ހަށިގަނޑު ޕޯސްޓްމޯޓަމަށް ފޮނުވުން ހުއްޓުވައި އާއިލާއާ ހަށިގަނޑު ހަވާލުކޮށްދިނުމަށް އެދި ހުށަހަޅާފައިވާ މައްސަލާގައި އެފަދަ އަމުރެއް ނެރެދެވެން ނެތް ކަމަށް ސިވިލް ކޯޓުން މިއަދު ނިންމައިފި އެވެ.
ހޯނޑެއްދޫއިން ރަޝީދު ހައްޔަރުކޮށްގެން ލޯންޗަކަށް އަރުވަނިކޮށް އޭނާގެ މެއަށް ވަރަށް ބޮޑު ތަދުވާ ކަމަށް ރަޝީދު ބުނަމުންދިޔަ ކަމަށް އެ ވަގުތު ބަނދަރު ސަރަހައްދުގައި ތިބި މީހުން ވަނީ ބުނެފަ އެވެ. ނަމަވެސ،ް އޭނާ ވަގުތުން ފަރުވާއަށް ގެންދަން ފުލުހުން ނޫޅުނު ކަމަށް ތުހުމަތު ކުރާއިރު، އޭނާ ގެންދިޔައީ މާ ދުރު ރަށެއްގެ ހޮސްޕިޓަލަކަށެވެ.
އޭނާގެ ހަށިގަނޑު ހަވާލު ކުރުމަށް އާއިލާއިން އެދި ސިވިލް ކޯޓަށް ހުށަހެޅި މައްސަލާގައި އެ ކޯޓުން ކުރި ހުކުމުގައި ވަނީ އެ މަރާ ގުޅިގެން ހިންގާ ތަހުގީގު އެންމެ ފުރިހަމަ ގޮތެއްގައި ކުރިއަށް ގެންދިޔުމަށް ހަށިގަނޑުގެ ޕޯސްމޯޓަމެއް ހެދުން މުހިންމު ކަން ފާހަގަ ކުރެވޭ ކަމަށެވެ.
މަރުގެ މައްސަލަތައް ތަހުގީގު ކުރުމުގައި ޕޯސްޓްމޯޓަމް ހެދުމުގެ ގަވާއިދެއް އޮންނަ އިރު، އެ ގަވާއިދުގެ ދަށުން ފުލުހުން އަމަލުކޮށްފައިވާއިރު، ހަށިގަނޑު އަނބުރާ އާއިލާއަށް ރައްދު ކޮށްދިނުމަށް އަންގައި އަމުރެއް ނެރެންވީ ގާނޫނީ އަދި ޝަރުއީ ސަބަބެއް ނެތް ކަމަށް ސިވިލް ކޯޓުގެ ހުކުމުގައިވެ އެވެ.
ސިވިލް ކޯޓުގެ ގާޒީ ހަސަން ފަހީމް އިބްރާހީމް އެ ގޮތަށް ހުކުމް ކުރެއްވިއިރު، މާދަމާގެ ވަގުތެއްގައި ޕޯސްޓްމޯޓަމް ހެދުމަށް އަބްދުﷲ ރަޝީދުގެ ހަށިގަނޑު ރާއްޖޭން ބޭރަށް ފޮނުވާނެ ކަމަށް ދައުލަތުގެ ވަކީލުން އިއްޔެ ބޭއްވި ޝަރީއަތުގައި ވަނީ ބުނެފަ އެވެ.
އަބްދުﷲ ރަޝީދުގެ ޕޯސްޓްމޯޓަށް ހެދުމަށް އޭނާގެ އާއިލާއިން ދެކޮޅު ހަދަނީ، ޕޯސްޓްމޯޓެމް ހެދިޔަސް، އަބްދުﷲ މަރުވިއިރު ފުލުހުން ވެފައިވާ އިހުމާލެއް އެނގެން ނޯންނާނެތީ ކަމަށް ބުނެ އެވެ.
މި މަރުގައި ފުލުހުންގެ އިހުމާލެއް އޮތް ކަމަށް ބެލެވޭތީ ނޭޝަނަލް އިންޓެގްރިޓީ ކޮމިޝަން (އެންއައިސީ) އާއި ހިއުމަން ރައިޓްސް ކޮމިޝަން (އެޗްއާރުސީއެމް) އިން ވެސް ދަނީ މައްސަލަ ތަހުގީގު ކުރަމުންނެވެ. އަދި ހަށިގަނޑުގެ ޕޯސްޓްމޯޓަމް ހަދާނެ ކަމަށް ބުނެ އެންއައިސީން ބަޔާނެއް ވެސް ނެރެފައިވެ އެވެ.
ކޮމިޝަނާ އޮފް ޕޮލިސް މުހައްމަދު ހަމީދު ވެސް ވަނީ މި މައްސަލާގައި ޓްވީޓެއް ކުރައްވާފަ އެވެ. އޭނާ ވެސް ވިދާޅުވީ މަރުގެ ތަހުގީގެއް ހިންގަން ޖެހޭތީ ހަށިގަނޑުގެ ޕޯސްޓްމޯޓަމްއެއް ހަދަން ޖެހޭ ކަމަށެވެ.
