މަޝްހޫރު ދީނީ އިލްމުވެރިޔާ މުފްތީ މެންކް ރާއްޖެއަށް ކުރައްވާ ދަތުރުގައި ހަތަރު ދަރުހެއް ދެއްވާނެ ކަމަށް އިސްލާމިކް މިނިސްޓްރީން ބުނެފި އެވެ.
މިފަހަރުގެ ދަތުރުގައި މެންކް ދަރުސް ދެއްވާނީ މާލެ، ހުޅުމާލެ، ފުވައްމުލައް ސިޓީ އަދި އައްޑޫ ސިޓީގަ އެވެ.
އިސްލާމިކް މިނިސްޓްރީން ބުނީ ފުރަތަމަ ދަރުސް ދެއްވާނީ މި އޮކްޓޯބަރު 28، ވަނަ ދުވަހުގެ ރޭ 20:45 ގައި މާލޭ އަލިމަސް ކާނިވަލުގަ ކަމަށެވެ. އެ ދަރުސް ބިނާ ކުރައްވާނީ ޑިޕްރެޝަން، އެންޒައިޓީ އަދި ނަފުސާނީ ބަލިތަކާ ގުޅޭ ގޮތުންނެވެ.
ދެ ވަނަ ދަރުސް ދެއްވާނީ އޮކްޓޯބަރު 29، ވަނަ ދުވަހުގެ ރޭ 20:45 ގައި ފުވައްމުލައް ސިޓީގެ ރަސްމީ ސްޓޭޑިއަމްގަ އެވެ. އެ ދަރުހުގެ މައުލޫއަކީ އިސްލާމް ދީނާއި ކުލުނުގެ މައްޗަށް ދެއްވާ ދަރުހެކެވެ.
ތިން ވަނަ ދަރުސް އައްޑޫ ސިޓީގައި ބޭއްވުމަށް ހަމަޖެހިފައި ވާއިރު މަސައްކަތްތެރި މުސްލިމަކަށް ވުމާބެހޭ ގޮތުން ދަރުސް ދެއްވާނީ އޮކްޓޯބަރު 30، ވަނަ ދުވަހުގެ ރޭ 20:45 ގައި އައްޑޫ ސިޓީގެ ސިޓީ ސްކޮޔާގަ އެވެ.
މި ފަހަރު ދަތުރުގެ ފަހު ދަރުސް މުފްތީ މެންކް ދެއްވުމަށް ހަމަޖެހިފައިވަނީ އޮކްޓޯބަރު 31، ވަނަ ދުވަހުގެ ރޭ ހުޅުމާލެ ސިންތެޓިކް ޓްރެކުގަ އެވެ. އެ ދަރުހަކީ އާއިލީ މައްސަލަތަކާ ކުރިމަތިލާނެ ގޮތުގެ މައްޗަށެވެ.
އޭގެ އިތުރުން އަންނަ ހުކުރު ދުވަހު އިސްލާމިކް މަރުކަޒުގައި މުފްތީ މެންކް އިމާމުވެ ހުކުރު ކުރެއްވުމަށް ވެސް ވަނީ ހަމަޖެހިފަ އެވެ.
މުފްތީ މެންކު މީގެ ކުރިން ވެސް ވަނީ ދެ ފަހަރަކު ރާއްޖެ ވަޑައިގެންފަ އެވެ. އެގޮތުން 2020 ވަނަ އަހަރު މެންކް ވަނީ މާލެ އަދި އައްޑޫ ސިޓީގައި ދަރުސް ދެއްވާފަ އެވެ.
