އިނގިރޭސިވިލާތުގެ ބޮޑުވަޒީރުގެ މަގާމާ ހަވާލުވެވަޑައިގަތްތާ 45 ދުވަސް ފަހުން އެ މަގާމުން ކޮންޒަވޭޓިވް ޕާޓީގެ ލިޒް ޓްރަސް އިސްތިއުފާ ދެއްވަން ނިންމަވައިފި އެވެ.
ދާދި ދެންމެއަކު ޑައުނިން ސްޓްރީޓުގެ ބޭރުގައި ހުންނަވާ ޓްރަސް ވަނީ ކޮންޒަވޭޓިވް ޕާޓީގެ ލީޑަރުގެ މަގާމުން އިސްތިއުފާ ދެއްވަން ނިންމަވައި، ކިންގް ޗާލްސްއަށް އެކަން ދަންނަވާފައިވާކަން ހާމަކުރައްވާފަ އެވެ.
ބޮޑުވަޒީރުގެ މަގާމާ ހަވާލުވެވަޑައިގަތީ އިގްތިސާދީ ގޮތުންނާއި ބައިނަލްއަގްވާމީ ގޮތުން ގިނަ ގޮންޖެހުންތަކެއް ހުރި ދަނޑިވަޅެއްގައި ކަމަށް ޓްރަސް ވަނީ މިއަދު ވިދާޅުވެފަ އެވެ. އަދި، މި ހާލަތުގައި ކޮންޒަވޭޓިވް ޕާޓީގެ ލީޑަރުގެ ހައިސިއްޔަތުން ހަވާލުވެފައިވާ މެންޑޭޓު ފުރިހަމަ ނުކުރެވޭނެ ކަމަށް ވެސް ޓްރަސް ފާހަގަކުރެއްވި އެވެ.
އަދި، އަންނަ ހަފްތާގެ ތެރޭގައި ކޮންޒަވޭޓިވް ޕާޓީއަށް އާ ލީޑަރަކު އިންތިހާބު ކުރާނެ ކަމަށާއި އެވަގުތާ ޖެހެންދެން ބޮޑުވަޒީރުގެ މަގާމު ފުރުއްވަމުން ގެންދަވާނެ ކަމަށް ޓްރަސް ވިދާޅުވި އެވެ.
