ޒަޔާން މަރާލުމުގައި ބައިވެރިވި ކަމަށް ތުހުމަތުކުރެވޭ މީހުންގެ ވަނަވަރު އާންމުކޮށްފި

އައްޑޫ ސިޓީގައި ގޭންގަކުން ނިކުމެ އެރަށު މުހައްމަދު ޒަޔާން، 21، މަރާލި މައްސަލައިގައި ތުހުމަތުކުރެވޭ މީހުންގެ ވަނަވަރު މިއަދު އާންމުކޮށްފި އެވެ.

ޒަޔާނަށް ހަމަލާދިނީ ދުރާލާ ރާވައިގެން އޭނާ ދިރިއުޅޭ ގެއަށް ޖޫން 2، ގައި ބަޔަކު ދަންވަރުގެ ވަގުތުގައި ވަދެގެންނެވެ.

މި މައްސަލައިގައި ފުލުހުން ހައްޔަރުކުރީ ހަތަރު ކުޑަކުދިން ހިމެނޭ ގޮތަށް 11 މީހެކެވެ. އޭގެ ތެރޭގައި 15 އަހަރުގެ ދެ ކުދިންނާއި 16 އަހަރުގެ ކުއްޖަކާއި 17 އަހަރުގެ ކުއްޖެއް ހިމެނެ އެވެ.

އެ މައްސަލައިގެ ތަހުގީގާ ގުޅޭ މައުލޫމާތު ހާމަކުރުމަށް ފުލުހުން މިއަދު ބޭއްވި ނޫސްވެރިންގެ ބައްދަލުވުމެއްގައި އެ އިދާރާގެ އިންސްޕެންޓާ އޮފް ޕޮލިސް މުހައްމަދު ސާމިހް ވިދާޅުވީ ޒަޔާންއަށް ހަމަލާ ދިނުމުގަ އާއި ހެކި ނައްތާލުމުގައި ބައިވެރިވީ އުމުރުން 15 އަހަރާއި 19 އަހަރުގެ ކުދިން ކަމަށެވެ.

އެހެންނަމަވެސް މި ފަރާތްތަކުގެ އިތުރުން ހަމަލާ ދިނުމަށް މަޝްވަރާ އާއި ހިތްވަރުދީ، ހަތިޔާރު ދިނުމުގައި އިތުރު ބަޔަކު ބައިވެރިވެފައިވާކަން އޭނާ ފާހަގަކުރެއްވި އެވެ.

ހައްޔަރުކުރި މީހުންގެ ވަނަވަރު

ހަމަލާ ދިނުމުގައި ބައިވެރިވި މީހުންގެ އިތުރުން މިކަމުގައި ޝާމިލްވާ "ބޮޑުން" އެވަގުތު ތިބީ ފޭދޫގެ ކެފޭއެއްގައި ކަމަށް ސާމިހު ވިދާޅުވި އެވެ.

"މި ފަރާތްތައް ކެފޭގައި ތިބި ތިބުމަކީ މައިގަނޑު ގޮތެއްގައި އެ ފަރާތްތަކަކީ މި ހަމަލާގެ އެއްވެސް ކަމެއް އެނގޭނެ ބައެއް ނޫންކަން އަދި އެއިރު އެމީހުން ތިބީ އެ ކެފޭގައިކަން ރައްޔިތުންނަށާއި ތަހުގީގަށް ދެއްކުމުގެ ގޮތުން ތިބި ތިބުމެއް،" ސާމިހު ވިދާޅުވި އެވެ.

އެ މައްސަލައިގައި ހައްޔަރުކޮށްފައިވާ މީހުން:

• އަބްދުﷲ ނިޒާރު، ސ. ފޭދޭ/ ކާމަރަނގަގެގެ، 28އ.
• އަބްދުﷲ ރަޝީދު، ސ.ފޭދޫ/ ދިރިމާގޭ، 22އ.
• އައިލިޝް އަލީ، ސ. ފޭދޫ/ ފުފޫމާގޭ 29އ.
• އަހުމަދު ނަބީލް، ސ. ފޭދޫ/ ސަންޝައިން، 32އ.
• އަހުމަދު ޝުޖާއު، ސ.ފޭދޫ/ ދިރިމާގޭ، 24އ.
• ޔައިޝް އަންވަރު، ސ.ފޭދޫ/ ކަދުރުމާގެ، 19އ.
• އަހުމަދު އަބްދުﷲ، ސ. ފޭދޫ/ ކަރަންފޫގެ، 25އ.

ހާދިސާގެ އިތުރު ތަފްސީލް ހިއްސާކުރައްވަމުން އިންސްޕެންޓާ އޮފް ޕޮލިސް މުހައްމަދު ސާމިހް ވިދާޅުވީ ފުލުހުންނަށް އާއިލާއިން ރިޕޯޓުކުރުމާއެކު، ޒަޔާން ދިރިއުޅެމުން ދިޔަ ގެއަށް އެރޭ ދަންވަރު 3:16 ހާއިރު ދިޔައިރު، ގޭގެ އެއް ވަނަ ފްލޯގައި ޒަޔާން އޮތް ކަމަށެވެ.

"އޭރު ގޭގެ ގިނަ ހިސާބުތަކުގައި ގިނަ އަދަދަކަށް ލޭ ހުރިކަން ފުލުހުންނަށް ފާހަގަކުރެވިފައިވޭ. އަދި ހަމަލާދިން ކަމަށް ތުހުމަތު ކުރެވޭ ބައެއް ހަތިޔާރާއި އެ ނޫން ވެސް އެ ފަރާތްތަކާ ގުޅޭ ބައެއް މާއްދީ ހެކިތައް ފެންނަން ހުރި،" ސާމިހު ވިދާޅުވި އެވެ.

ހައްޔަރުކުރި މީހުންގެ ވަނަވަރު-- ފޮޓޯ: އަބްދުﷲ އިޔާން/ އަދަދު

ފުލުހުން ހާޒިރުވިއިރު، އޭނާގެ ގައިން ގިނަ އަދަދަކަށް ލޭ އޮހޮރެމުން ދިޔަ ކަމަށާއި އެހެންނަމަވެސް އެ ވަގުތު ވެސް ވާހަކަ ދައްކައި، ފުލުހުންގެ ބައެއް ސުވާލުތަކަށް ޒަޔާން ޖަވާބު ދިން ކަމަށް ސާމިހު ވިދާޅުވި އެވެ.

"އެވަގުތު ޒަޔާނަށް ކޮންމެވެސް ވަރަކަށް ވާހަކަ ދެކެވޭތީ، މި ހަމަލާއާ ގުޅިގެން މައުލޫމާތު ސާފުކުރުމުގެ ގޮތުން ޒަޔާނާ އެވަގުތު ފުލުހުން ވެސް ސުވާލުކޮށްފައިވޭ. އެގޮތުން ޒަޔާނާ ސުވާލުކުރުމުން ހަމަލާ ދިން ގޮތާއި ހަމަލާ ދިން މީހުންނާ ގުޅޭ ގޮތުން ޒަޔާން އެވަގުތު ވާހަކަ ދައްކާފައި،ވޭ" ސާމިހު ވިދާޅުވި އެވެ.

ސާމިހު ވިދާޅުވި ގޮތުގައި ޒަޔާން އަވަސް ފަރުވާއަށް ގެންދިޔައީ އޭގެ ފަހުން ދަންވަރު 03:40 ވީއިރު އެވެ.

ފުލުހުން މިއަދު ހާމަކުރި މައުލޫމާތަށް ބަލާއިރު އެ ހަމަލާއަކީ ދުރާލާ ރޭވިގެން ދެވުނު ހަމަލާއެއްކަން ފާހަގަކޮށްފައިވެ އެވެ. އަދި، އޭގެ ފަހަތުގައި އޮތީ އައްޑޫގައި އޭރު ދެ ގޭންގެއްގެ މެދުގައި ހިނގަމުންދިޔަ ސިލްސިލާ މާރާމާރީތަކުގެ ބަދަލު ހިފުމުގެ އިތުރުން އިތުރު ސަބަބެއް ކަމަށް ބުނެފައިވީ ނަމަވެސް އެއީ ކޮން ސަބަބެއް ކަން ހާމައެއް ނުކުރެ އެވެ.

މި ހަމަލާ ދިނުމުގެ ކުރިން އިތުރު ބައެއް މީހުންނަށް ވެސް ހަމަލާ ދިނުމަށް ރޭވި ނަމަވެސް، އެކަންކަން ނާކާމިޔާބުވެފައިވާކަން ސާމިހު ފާހަގަކުރެއްވި އެވެ. ފުލުހުން ވަނީ ހަމަލާ ދިނުމަށް ފަހު ފިލަން މަސައްކަތް ކުރި މީހުންނާއި ހަތިޔާރު ނައްތާލަން މަސައްކަތް ކުރި ކަމުގެ ހެކި ސީސީޓީވީ މެދުވެރިކޮށް ހޯދާފަ އެވެ.

މި މައްސަލައިގައި ހައްޔަރުކޮށްފައިވާ މީހުންނަކީ ތޫނު ހަތިޔާރު ގެންގުޅުމާއި މާރާމާރީގެ ކުށުގެ ރެކޯޑު އޮންނަ މީހުންނެވެ.