"އިންޑިއާ އައުޓް" ޖެހުމަށްފަހު ކުރީގެ ރައީސް އަބްދުﷲ ޔާމީންގެ ގެކޮޅުގައި ހަރުކުރި ބެނާއެއް ފުލުހުން އަތުލުމުން އެމަނިކުފާނު ފުލުހުންނާ ދެކޮޅަށް ހުށަހެޅި މައްސަލަ ނުބެލޭނެ ކަމަށް ސިވިލް ކޯޓުން މިއަދު ނިންމައިފި އެވެ.
ޔާމީން ކުރެއްވި ދައުވާގައި ބުނެފައި ވަނީ ބެނާ އަތުލުމުން އެމަނިކުފާނަށް ގާނޫނު އަސާސީގެ 21 ވަނަ މާއްދާއިން ލިބޭ އަމިއްލަ މިނިވަންކަމުގެ ހައްގު ގެއްލުނު ކަމަށެވެ. އަދި ފުލުހުން އެ ބެނާ އަތުލީ ގާނޫނުލް އުގޫބާތާއި ފުލުހުންގެ ގާނޫނާ ހިލާފަށް ކަމަށް ވެސް ޔާމީން ވިދާޅުވި އެވެ.
އެކަމަކު އެ މައްސަލައިގައި ސިވިލް ކޯޓުން ބުނީ ޔާމީންގެ ފަރާތުން ހުށަހެޅުއްވި ދައުވާގެ މައުލޫގައި ހައި ކޯޓުގައި ބަހުސްކޮށް ގޮތެއް ކަނޑައަޅާފައިވާ ކަމަށެވެ. އެއީ ބެނާ ނެގުމަށް ކްރިމިނަލް ކޯޓުން ދޫކުރި އަމުރު ހައި ކޯޓުގައި އިސްތިއުނާފު ކުރުމުންނެވެ.
އޭގެ އިތުރުން، އެ މައްސަލައިގައި ޔާމީންއަށް ލިބިވަޑައިގެންނެވި މަދަނީ ގެއްލުމުގެ ވާހަކައެއް ހިމަނާފައިނުވާ ކަމަށާއި މަދަނީ ބަދަލެއް ވެސް ނަގައިދިނުމަށް އެދިވަޑައިގެންފައިނުވާ ކަމަށް ސިވިލް ކޯޓުން ކުރި ހުކުމުގައި ބުނެފައިވެ އެވެ.
"ދެންފަހެ ބުނެވިދިޔަ ކަންކަން އެގޮތުގެ މަތިން ހުރުމުން މއ. ކާމިނީހުޅަނގުގެ، އަބްދުﷲ ޔާމީން އަބްދުލްގައްޔޫމްގެ ފަރާތުން ދިވެހި ފުުލުހުންގެ ހިދުމަތުގެ މައްޗަށް ހުށަހަޅާފައިވާ ދައުވާއަކީ ކުރިއަށްގެންދެވިދާނެ ދައުވާއެއް ނޫން ކަމަށް ކަނޑައަޅައި މި މައްސަލަ ނިންމީން،" ފަނޑިޔާރު ހަސަން ފަހީމް ކުރެއްވި ހުކުމުގައި ވިދާޅުވެފައިވެ އެވެ.
ކުރީގެ ރައީސް ޔާމީންއަކީ އިދިކޮޅު ޕްރޮގްރެސިވް ޕާޓީ އޮފް މޯލްޑިވްސްގެ ރިޔާސީ ކެންޑިޑޭޓެވެ. އެމަނިކުފާނުގެ ކެމްޕެއިން މިހާރު ފަށައިގެން ކުރިއަށްދާއިރު މިދިޔަ ހަފުތާ އަދި މި ހަފުތާފައި ބައެއް ރަށްރަށަށް ދަތުރު ކުރައްވައި، ޖަލްސާތައް ބާއްވަވައިފަ އެވެ.
