"ހެރީ ޕޮޓާ" ސީރީޒްގެ ފިލްމުތަކުގައި ހެގްރިޑްގެ ރޯލުން ފެނިގެން ދިޔަ އެކްޓަރު ރޮބީ ކޮލްޓްރޭން އުމުރުން 72 އަހަރުގައި މަރުވެއްޖެ އެވެ.
ރޮބީ ކޮލްޓްރޭންގެ އެހެން މަސައްކަތްތަކުގެ ތެރޭގައި އައިޓީވީގެ ޑްރާމާ "ކްރެކާ" އަދި ޖޭމްސް ބޮންޑް ސީރީޒްގެ ފިލްމުތައް ކަމުގައިވާ "ގޯލްޑަންއައި" އަދި "ދަ ވޯލްޑް އިޒް ނޮޓް އިނަފް" ހިމެނެ އެވެ.
އޭޖެންޓު ބެލިންޑާ ވްރައިޓް ނެރުނު ބަޔާނުގައި ބުނީ ރޮބީ ކޮލްޓްރޭން މަރުވީ ސްކޮޓްލޭންޑްގެ ހޮސްޕިޓަލެއްގައި ކަމަށެވެ.
"ރޮބީގެ ދައްތަ އެނީ ރޭ، ސްޕެންސާ އާއި އެލިސް އަދި އެ ކުދިންގެ މަންމަ ރޮނާ ގެމެލް އެދެނީ ފޯތު ވެލީ ރޯޔަލް ހޮސްޕިޓަލަށް ޝުކުރު އަދާކުރަން،" އެ ބަޔާނުގައިވެ އެވެ.
މުނިފޫހިފިލުވުމުގެ ދާއިރާގައި ރޮބީގެ އަގު ވަޒަން ކުރުމަށް 2006 ވަނަަ އަހަރު އޯޑާ އޮފް ދަ ބްރިޓިޝް އެމްޕަޔާ ލަގަބު އެރުވި އެވެ. އޭގެ އިތުރުން 2011 ވަނަ އަހަރު ބަފްތާ ސްކޮޓްލޭންޑް އެވޯޑް ވެސް ލިބުނެވެ.
ރޮބީގެ މަރާ ގުޅިގެން ގިނަ ފަންނާނުން ވަނީ ހިތާމަ ފާޅުކޮށްފަ އެވެ. "ހެރީ ޕޮޓާ" ގެ ތަރި ޑެނިއެލް ރެޑްކްލިފް ބުނީ "ރޮބީއަކީ އޭނާ ދަންނަ އެންމެ މަަޖާ އެކަކު" ކަމަށެވެ.
"ހެރީ ޕޮޓާ" ވާހަކައިގެ ލިޔުންތެރިޔާ ޖޭކޭ ރޯލިން ބުނީ ރޮބީއަކީ ދެ ވަނައެއް ނެތް ފަދަ މީހެއް ކަމަށާއި އޭނާގެ އާއިލާ، ވަކިން ހާއްސަކޮށް ދަރިންނަށް، ތައުޒިޔާ ފޮނުވާ ކަމަށެވެ.
ސްކޮޓްލޭންޑަށް އުފަން ރޮބީގެ އަސްލު ނަމަކީ އެންތަނީ ރޮބަޓް މެކްމިލަން އެވެ. އޭނާ އެކްޓިން ކެރިއަރު ފެށީ 1979 ގައެވެ.
