ވެލާނާ އިންޓަނޭޝަނަލް އެއާޕޯޓު ތަރައްގީ ކުރުމުގެ މަސައްކަތްކުރާ ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ) ގެ މުވައްޒަފަކު ކޮންޓެއިނަރެއްގެ ތެރޭގައި ބަންދުކޮށްގެން ގެންގުޅުނު ކަމަށް ޕަބްލިކް އިންޓެރެސްޓް ލޯ ސެންޓަރު (ޕީއައިއެލްސީ) އިން ބުނެފި އެވެ.
ޕީއެލްސީގެ ނެރުނު ބަޔާނެއްގައި ބުނެފައި އޮތީ އެއާޕޯޓު ހަދާ ކުންފުނީގެ ބިދޭސީ މުވައްޒަފު ހަތް ދުވަސް ވަންދެން ބަންދުކޮށްގެން ގެންގުޅުނު ކަމަށެވެ. އަދި އޭނާ ފިލީ ކޮންޓެއިނަރުގައި ހުރި ކުޑަދޮރެއް ކަހަލަ އެއްޗެއް ހަލާކުކޮށްލައިގެން ކަމަށް ވެސް ޕީއައިއެލްސީން ބުނެފައިވެ އެވެ.
އެ މައްސަލައިގައި އަނިޔާ ލިބުނު ފަރާތުން ފުލުހުންގެ ހިމާޔަތަށް އެދުމުން އެކަމަށް ފުލުހުން ދެކޮޅު ހެދި ކަމަށް ވެސް ޕީއައިއެލްސީން ތުހުމަތު ކުރެ އެވެ.
އޭގެ ފަހުން ހުޅުލޭ ޕޮލިސް ސްޓޭޝަނަށް މައްސަލަ ހުށަހެޅުމުން އެ ސްޓޭޝަނުގެ ފުލުހުން ވަނީ އޭނާ ބަންދުކޮށްފައިހުރިތަން ބަލާ މައުލޫމާތު ނަގާފައި ކަމަށް ވެސް ޕީއައިއެލްސީން ބުނެ އެވެ. އެ މައްސަލަ ހިއުމަން ރައިޓްސް ކޮމިޝަނަށް ތިން ފަހަރުމަތިން ހުށަހަޅާފައިވާ ކަމަށް ވެސް ޕީއައިއެލްސީން ނެރުނު ބަޔާނުގައި ބުނެފައިވެ އެވެ.
މީގެ އިތުރުން ޕީއައިއެލްސީ އިން ވަނީ ބީޔޫސީޖީއިން ރާއްޖެއަށް ގަވާއިދާއި ހިލާފަށް މަސައްކަތްތެރިން ގެންނަމުންދާ ކަމަށް ތުހުމަތުކޮށް، މި މައްސަލަ އިދާރާތަކަށް ހުށަހެޅުމުން ބަންދުކުރި ފަރާތަކީ ގެއްލިފައިވާ ފަރާތެއް ކަމަށް ރިޕޯޓުކޮށްފައި ކަމަށް ވެސް ތުހުމަތު ކޮށްފަ އެވެ.
ބީޔޫސީޖީ ފަދަ ބޮޑެތި ކުންފުނިތަކުން ހިންގާ ގާނޫނާ ހިލާފު އެފަދަ ކަންކަމާމެދު ފިޔަވަޅު އެޅުމަށް ސަރުކާރުގެ އިދާރާތަކުން އިހުމާލުވެފައިވާ ކަމަށް ވެސް ޕީއައިއެލްސީ އިން ވަނީ ބުނެފަ އެވެ.
