މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރުޑީސީ) އުވާލިއިރު އެ ކުންފުންޏަށް ލިބެންޖެހޭ ކަމަށް މާލީ ހިސާބުތަކުގައި ބަޔާންކޮށްފައިވާ 171.7 މިލިއަން ރުފިޔާ ހޯދަން އެއްވެސް މަސައްކަތެއް ކޮށްފައިނުވާ ކަމަށް އޮޑިޓު އޮފީހުން ބުނެފި އެވެ.
ސަރުކާރުގެ 100 ޕަސަންޓު ހިއްސާ އޮތް އެމްއާރުޑީސީ 2018 ވަނަ އަހަރު އުވާލީ، ހަވާލުކުރެވިފައިވާ މަޝްރޫއުތައް އެންމެ ރަނގަޅު ގޮތުގައި ކުރިއަށް ނުގެންދާތީ އާއި ބޮޑެތި މަޝްރޫއުތައް ނުނިންމައި ދިގުލައިގެން ދިޔުމުގެ އިތުރުން، ކުންފުނީގެ ފައިސާ ނަހަމަ ގޮތުގައި ބޭނުން ކުރަމުންދާ ކަމަށް ބުނެ އެވެ.
ފިނޭންސް މިނިސްޓްރީގެ 2019 ވަނަ އަހަރުގެ އޮޑިޓު ރިޕޯޓުގައި ބުނެފައިވަނީ، އެމްއާރުޑީސީ އުވާލަން ނިންމުމާ ގުޅިގެން، އެ ކުންފުނި އުވާލުމުގެ މަސައްކަތްކުރުމަށް މެއި 2018 ގައި އެ ކުންފުންޏާއި ލިކުއިޑޭޝަންގެ މަސައްކަތްކުރާ ކުންފުންޏަކާއެކު އެއްބަސްވުމެއްގައި ސޮއި ކުރެވުނު ކަމަށެވެ.
މި އެއްބަސްވުމުގައި އުވާލައި ކުންފުނީގެ މުދަލާއި ދަރަނިތަކުގެ ހިސާބުތައް ތައްޔާރުކޮށް ކުންފުނީގެ އެސެޓުތައް ހިފަހައްޓައި، ކޮންޓްރޯލްކޮށް އަދި ކުންފުންޏަށް ލިބެންޖެހޭ ފައިސާ ހޯދުމަކީ ލިކުއިޑޭޓަރުގެ ޒިންމާ އެއް ކަމުގައި ބަޔާން ކޮށްފައިވާ ކަމަށް އެ ރިޕޯޓުގައި ބުންޏެވެ.
"ނަމަވެސް، އެއްބަސްވުމާ އެއްގޮތަށް ލިކުއިޑޭޓަރު އެމްއާރުޑީސީގެ މުދަލާއި ދަރަނިތަކުގެ ހިސާބުތަކުގެ ރިޕޯޓެއް ތައްޔާރު ކޮށްފައިނުވެ އެވެ،" އޮޑިޓު އޮފީހުން ބުނެފައިވެ އެވެ.
މީގެ އިތުރުން، އެމްއާރުޑީސީ އުވާލުމާ ހަމައަށް އަދާ ހަމަކޮށްފައިވާ، ކުންފުންޏަށް ލިބެންޖެހޭ ފައިސާގެ ތަފްސީލީ ރިޕޯޓެއް ވެސް ލިކުއިޑޭޓަރު ތައްޔާރުކޮށްފައިވާ ނުވާ ކަމަށް ބުންޏެވެ.
އޮޑިޓު އޮފީހުން އިތުރަށް ބުނި ގޮތުގައި، އެމްއާރުޑީސީ އެންމެ ފަހުން އޮޑިޓު ކުރެވުނު 2017 ވަނަ އަހަރުގެ ނިޔަލަށް ވެސް 171.7 މިލިއަން ރުފިޔާ ލިބެންޖެހޭ ކަމަށް ފާހަގަކޮށްފައިވެ އެވެ.
"އެހެންނަމަވެސް ކުންފުނި އުވާލުމަށް ނިންމި ފަހުންވެސް ކުންފުންޏަށް ލިބެންޖެހޭ އެއްވެސް ފައިސާއެއް ހޯދާފައިނުވާ ކަން ފާހަގަކުރެވެ އެވެ،" ރިޕޯޓުގައި ބުންޏެވެ.
އެހެންކަމުން، ކުންފުންޏާބެހޭ ގާނޫނުގައި ބަޔާންކޮށްފައިވާ ގޮތަށް، ކުންފުންޏަށް ލިބެންޖެހޭ ފައިސާ ހޯދުމާއި ސައްހަ ދަރަނިތައް އަދާކޮށް، ކުންފުނި އުވާލުމުގެ ހުރިހާ މަރުހަލާތަކެއް ފުރިހަމަ ކުރުމަށް އޮޑިޓު އޮފީހުން ވަނީ ލަފާދީފަ އެވެ.
