ހުޅުމާލޭގައި މީގެ ތިން އަހަރު ކުރިން ތޫނު އެއްޗަކުން ހަމަލާދީ އަނިޔާވެރި ގޮތަކަށް ޓެކްސީ ޑްރައިވަރު ގާސިމް ހަސަން, 59, ގެ މަރާލި މައްސަލައިގައި ތުހުމަތުކުރެވޭ ޅ. ހިންނަވަރު، ބޮޑުހިޔާގެ، އަދުހަމް މުހައްމަދަށް ކުރާ ދައުވާގެ ހުކުމް އަންނަ މަހުގެ 21 ވަނަ ދުވަހު ބާއްވަން ނިންމައިފި އެވެ.

ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ދައުވާ އުފުލާފައިވާ އަދުހަމް ވަނީ ތަހުގީގު މަރުހަލާގައި ކުށަށް އިއުތިރާފު ވެފަ އެވެ. ފަހުން ފުލުހުން އަނިޔާކުރީ ކަމަށް ބުނެ ކުށަށް އިންކާރު ކުރި އެވެ.

އެއަށް ފަހު ޝަރީއަތުގައި އޭނާ ކުށަށް އިއުތިރާފުވި ނަމަވެސް އެއީ އޭނާ ގަސްދުގައި ކުރި ކަމެއް ނޫން ކަމަށް އަދުހަމް ބުނެފައިވެ އެވެ. އޭރު އޭނާ ހުރީ މަސްތުވާތަކެތި ބޭނުންކޮށްގެން މަސްތުގެ ހާލަތުގައި ކަމަށް ވެސް އަދުހަމް ބުންޏެވެ.

އެހެންކަމުން ޝަރީއަތް އިތުރަށް ކުރިއަށް ގެންދިޔައީ ގަސްތުގައި މަރާލި ކަން ސާބިތުވޭތޯ ނުވަތަ ނުވޭތޯ ވަޒަން ކުރުމަށެވެ. އެ ކަން ވަޒަން ކުރަން، ދައުލަތުން ހުށަހަޅާފައިވާ ހެކިންގެ ހެކިބަސް ނަގައި ނިމިފައިވާއިރު މިއަދު ކުރިއަށް ގެންދިޔައީ ދެ ފަރާތުން ހުލާސާ ބަޔާން އިއްވުމެވެ.

ހުލާސާ ބަޔާނަކީ، ހުކުމް ކަނޑައެޅުމުގެ ކުރިއަށް މުޅި ޝަރީއަތުގައި ކޮންމެ ހަސްމަކަށް ފާހަގަ ކުރެވުނު ކަންކަމުގެ ބިނާކޮށް ހުށަހަޅާ ބަޔާނެކެވެ.

ދައުލަތުން ހުށަހެޅި ހުލާސާ ބަޔާނުގައި މައިގަނޑު ގޮތެއްގައި ފާހަގަ ކުރި ކަމަކީ އަދުހަމް މަސްތުވީ އޭނާގެ އަމިއްލަ އިހުތިޔާރުގައި ކަމާއި ކޮންމެ ހާލަތެއްގައި ވެސް މަސްތުވާތަކެތި ގަންނަން ފައިސާ ހޯދަން ފޭރިގެން އެކަން ކުރުމަށް ރާވަމުން ދިޔަ ކެމެވެ.

އެހެންވެ އޭނަގެ މައްޗަށް ގަސްތު މަރު ސާބިތުވާ ކަމަށް ދައުލަތުން ބުނި ނަމަވެސް އަދުހަމަށް ދައުލަތުން ހަމަޖައްސާފައިވާ ދިފާއީ ވަކީލު ހުލާސާ ބަޔާން އިއްވަވަމުން ވިދާޅުވީ އަދުހަމްގެ ނިޔަތް އޮތީ ފޭރުމަށް ކަމަށާއި ގަސްތުގައި މީހަކު މެރުމުގެ ނިޔަތް ނެތް ކަމަށެވެ.

ދެ ފަރާތުން ހުލާސާ ބަޔާން އިއްވައި ނިމުމުން، މައްސަލަ ބައްލަވާ ގާޒީ އަލީ ނަދީމް ވިދާޅުވީ ދެން އޮންނާނީ މައްސަލައިގެ ހުކުމް އިއްވުމަށް ބާއްވާ އަޑުއެހުމެވެ. އެ އަޑުއެހުން މި އަންނަ ނޮވެމްބަރު މަހުގެ 21 ވަނަ ދުވަހަށް ތާވަލުކުރާނެ ކަމަށް ގާޒީ ވިދާޅުވި އެވެ.

ޖިނާއީ އިޖުރާއަތުގެ ގާނޫނުގައި އޮންނަ ގޮތުން، ހުލާސާ ބަޔާން އިއްވާތާ 30 ދުވަހުގެ ތެރޭގައި ހުކުމް ކުރަން ޖެހެ އެވެ. ނަމަވެސް ބައެއް ފަހަރު އެކި ސަބަބުތަކާ ހުރެ އެއަށް ވުރެ މާ ފަހުން ވެސް މައްސަލަތަކުގައި ހުކުމް ކޮށްފައިވެ އެވެ. މި މައްސަލާގައި ދިން ތާރީހަކީ ވެސް 30 ދުވަހަށް ވުރެ ފަހުގެ ތާރީހެކެވެ.

ޓެކްސީ ޑްރައިވަރު ގާސިމް ހަސަން މަރާލާފައި އޮއްވާ ފެނުނީ ޑިސެމްބަރު 4، 2019 ވަނަ ދުވަހެވެ. މި މައްސަލައިގައި އަދުހަމް ހައްޔަރު ކޮށްފައި ވަނީ އޭގެ 15 ދުވަސް ފަހުން ޑިސެމްބަރު 15، 2019 ގައެވެ. އަދި ތަހުގީގު މަރުހަލާގައި ކުށަށް އިއުތިރާފުވުމާއެކު ދައުވާ އުފުލިގެން ދިޔަ އެވެ.

ގާސިމްއަކީ އދ. މާމިގިލީ މީހެކެެވެ. ޑްރައިވަރު ގާސިމް މަރާލިއިރު އުމުރުން 59 އަހަރެވެ. އޭރު އަނބިމީހާއާއި ފަސް ދަރިން ދުނިޔޭގައި ތިއްބެވެ. އެއީ ހަތަރު ފިރިހެން ދަރިންނާއި އަންހެން ދަރިއެކެވެ.

އަދުހަމަކީ މަސްތުވާތަކެއްޗާއި ކުށުގެ ރެކޯޑު އޮތް މީހެކެވެ. ގާސިމް މަރާލި ދުވަހު ވެސް އޭނާ އުޅުނީ މަސްތުވާތަކެތި ގަންނަން ބޭނުންވާ ފައިސާ ހޯދަން ފޭރުމާއި ވައްކަމުގެ ކަމެއް ކުރުމަށެވެ. އެ ދުވަހު އޭނާ ވަޅިއެއް ހޯދީ ވެސް މީހަކަށް ބިރު ދައްކައިގެން ފައިސާ ފޭރުމުގެ ބޭނުމުގަ އެވެ.

ބައެއް މުހިންމު ހަބަރުތައް

• ރާއްޖޭގެ ކަނޑުތަކުގެ ދިރާސާތަކެއް ކުރުމަށް ކުރިއަށް ގެންދިޔަ ނެކްޓަން މޯލްޑިވްސް އިން ބޭނުންކުރި މައި އުޅަނދު އޮޑީސީ އަށް އެޅި ތެލަށް ދައްކަން ޖެހޭ ފައިސާތަކެއް ނުދައްކައި އޮތުމުން، ކޯޓު އަމުރަކުން އެެ ބޯޓް ހިފެއްޓި އިރު، އެބޯޓް އޮތީ ނެކްޓަންގެ ޒިންމާއަކު ނޫން ކަމަށް އެ މިޝަނުން ހާމަކުރީ އިއްޔެ އެވެ.

• ހުޅުމާލެ ހޮސްޕިޓަލުގެ ކަނބިލި ބިލްޑިންގައި މެންޓަލް ހެލްތު ސެންޓަރެއް ހުޅުވީ އިއްޔެ އެވެ.

• ނޫމަޑި ރިސޯޓްސް އެންޑް ރެސިޑެންސްއާ އެކު ހެދި އެއްބަސްވުން ސަރުކާރުން ބާތިލްކުރުމުން، އެ ކުންފުނިން ނެދަލޭންޑްސް އާބިޓްރޭޝަނަށް ވެއްދި މައްސަލާގައި, މާލެ ސިޓީގެ މޭޔަރު ޑރ. މުހައްމަދު މުއިއްޒުގެ މައްޗަށް ކުރާ ދޮގު ބަޔާނެއް ދިނުމުގެ ދައުވާ ފުރިހަމަނުވާ ކަމުގެ ބަހުސް ހައި ކޯޓުގައި ފެށީ އިއްޔެ އެވެ.

ދުވަހުގެ ކޯޓޭޝަން

ސިއްހީ ދާއިރާގައި ދިރާސާތައް އިތުރުވާން ޖެހޭ ކަމަށް ދެކެވަޑައިގަންނަވާ ކަމަށް ހާމަކުރައްވަމުން ހެލްތު މިނިސްޓަރު އަހްމަދު ނަސީމް ވިދާޅުވީ:

އަޅުގަނޑު ކޮށްދޭން ޖެހޭ ކަމަކީ ދިރާސާ ކުރުމަށް ބޭނުންވާ ފައިނޭންޝަލް އެހީ ދިނުން. ފަނޑެއްވެސް އެބަ އޮތް. އެ ފަންޑުން އެއްވެސް ބޭނުމެއް ނުކުރެވި އެ އޮންނަނީ. އޭގެ ބަދަލުގައި އެ ފަންޑުންވެސް ބޭނުން ހިފަންވީ. ދިރާސާ ކުރާ މީހުންނާ ދިރާސާ ކުރުމަށް މަސައްކަތް ކުރުމަށް މަގުފަހިކޮށްދޭ މީހުންނަށް އެހީވެސް އަޅުގަނޑުމެން ފޯރުކޮށްދޭނަން،

ދުވަހުގެ ފޮޓޯ

މަސްވެރިންނަށް ސަރުކާރުން އިހުމާލުވެފައިވާ ކަމަށް ބުނެ ޕީޕީއެމްއިން މަސްމާރުކޭޓް ސަރަހައްދުގައި ބޭއްވި އެއްވުމުގެ ތެރެއިން. ގިނަ އަދަދެއްގެ ފުލުހުން އެއްވެ މުޒާހަރާ ރޫޅާލިއިރު 10 މީހުން ހައްޔަރުކުރި. ގާނޫނަށް ގެނެސްފައިވާ ބަދަލުގެ ސަބަބުން ހުއްދަ ނުހޯދައި މާލޭގައި މިހާރު މުޒާހަރާ ކުރެވޭނީ ކާނިވާ ސަރަަހައްދުގައި --- ފޮޓޯ: އަބްދުﷲ އިޔާން/އަދަދު