ރައްޔިތުންގެ މަޖިލީހުގައި ވައްކަން ކޮށްގެން ތިއްބެވި 16 މެންބަރުން ތިއްބެވި ކަމަށާއި އޭގެ ތެރޭގައި މަރަދޫ ދާއިރާގެ މެންބަރު އިބްރާހިމް ޝަރީފް ވެސް ހިމެނިވަޑައިގަންނަވާ ކަމަށް ކާށިދޫ ދާއިރާގެ މެންބަރު އަބްދުﷲ ޖާބިރު ތުހުމަތު ކުރެއްވުމުން ދެ މެންބަރުން މަޖިލިސް ތަޅުމުގައި "ޒުވާބު" ކޮށްފި އެވެ.
މަޖިލީހުގެ މިއަދުގެ ޖަލްސާގައި ފަނޑިޔާރުންގެ ގާނޫނު ބަދަލުކުރުމަށް ހުށަހަޅާފައިވާ ބިލަށް ބަހުސް ކުރައްވަމުން ޖާބިރު ވިދާޅުވީ "ވައްކަން ކޮށްގެން ތިބި މެންބަރުން" ތިބި މަޖިލީހަކުން ފަނޑިޔާރުގޭގެ ވާހަކަ ދެއްކުން ރަނގަޅު ނޫން ކަމަށެވެ.
"ވަގުންގެ ލިސްޓަކީ ކޮބައިތޯއޭ، އެއީ ކޮން ރަށެއްގެ ކޮން ދާއިރާއެއްގެ މެންބަރުތޯއޭ، އައްޑޫ އަތޮޅު މެންބަރު ޝަރީފް 88 މިލިއަން ރުފިޔާ ވިއްޔާއޭ ނެގީ، ތަންކޮޅެއް ބޮޑުވަރެއް ނޫންތޯއޭ، ކުލި ނުދެއްކިގެން މީހުން މިއުޅެނީ،" ޝަރީފަށް ބޮޑު ތުހުމަތެއް ކުރައްވަމުން ޖާބިރު ވިދާޅުވި އެވެ.
ޖާބިރު ކުރެއްވި ތުހުމަތުގައި އިޝާރާތް ކުރެއްވީ، އެމްއެމްޕީއާރުސީގެ ބޮޑު ހިޔާނާތުގެ މަންފާ ލިބުނުކަމަށް މަޖިލީހުން އެކުލަވާލި ލިސްޓުގައި ހިމެނޭ މަޖިލީހުގައި މިހާރު ތިބި 16 މެމްބަރުންނަށެވެ.
އޭގެ ތެރޭގައި ޝަރީފާއެކު މަޖިލިސް ކޮންޓްރޯލްކުރާ އެމްޑީޕީގެ ހަތަރު މެމްބަރުން ހިމެނެ އެވެ.
ޖާބިރުގެ ތުހުމަތުތަކާ ގުޅިގެން މަޖިލީހުގެ ރިޔާސަތުން ވަނީ އޭނާގެ ވާހަކަ ހުއްޓުވައި، މުޅި މަޖިލީހަށް ތުހުމަތުވާ ގޮތަށް އެފަދަ ވާހަކަތައް ދެއްކުމަކީ ގަވަައިދު ތަން ދޭ ކަމެއް ނޫން ކަމަށް ވިދާޅުވެފަ އެވެ.
އނަމަވެސް، ޝަރީފަށް ކުރެއްވި ތުހުމަތުތައް ތަކުރާރުކުރައްވަމުން ޖާބިރު ވަނީ ޝަރީފް މަޖިލީހުން ބޭރުކޮށްގެން ނޫނީ މަސައްކަތް ނުކުރެވޭނެ ކަމަށް ވިދާޅުވެ ތަޅުން ދޫކުރައްވައި ބޭރަށް ވަޑައިގެންފަ އެވެ.
ޖާބިރުގެ ވާހަކައާ ގުޅިގެން ނިޒާމީ ނުކުތާ ނަންގަވައި ޝަރީފް ވެސް ވަނީ ޖާބިރަށް ބޮޑެތި ތުހުމަތުތަކެއް ކުރައްވާފަ އެވެ.
"ރާއްޖޭގައި އުފެދުނު ފުރަތަމަ އަލަމްގީރު، ދިވެހިރާއްޖެއިން ވައްކަން ކޮށްގެން ފުރަތަމަ ފަހަރަށް މި މަޖިލީހުގައި އަރުވާލަފައި ހުރި ހަމައެކަނި އިއްޒަތްތެރި މެންބަރު،" ވަރަށް ބޮޑަށް ހިތްހަމަނުޖެހިވަޑައިގެން ޝަރީފް ވިދާޅުވި އެވެ.
ޝަރީފް ވަނީ ޖާބިރަށް މަސްތުވާތަކެތި ބޭނުން ކުރާ ކަމުގެ ތުހުމަތު ވެސް ކުރައްވާފަ އެވެ.
ދެ މެންބަރުންގެ ޒުވާބު ހޫނުވުމުން ރިޔާސަތުގައި އިންނެވި މަޖިލީހުގެ ރައީސް މުހައްމަދު ނަޝީދު ވަނީ އެކަން އެގޮތަށް ކުރުމުގެ ފުރުސަތު ނުދެއްވާނެ ކަމަށް ވިދާޅުވެފަ އެވެ.
"މަރަދޫ ދާއިރާގެ އިއްޒަތްތެރި މެންބަރު ވެސް އަދި ކާށިދޫ ދާއިރާގެ އިއްޒަތްތެރި މެންބަރު ވެސް މި މަޖިލިސް ދޫކޮށް ވަޑައިގަންނަވަން އަޅުގަނޑަށް ދަންނަވަން ޖެހޭނެ އިއްޒަތްތެރި މެންބަރުން ތި މޭރުމުން ބަހުސް ކުރިއަށް ގެންދަވާ ކަމަށް ވަންޏާ،" ނަޝީދު ވިދާޅުވި އެވެ.
ދެ މެންބަރުންގެ ތުހުމަތުތަކާ ގުޅިގެން މަޖިލީހުގެ އެހެން ބައެއް މެންބަރުން ވެސް ކަންބޮޑުވުން ފާޅުކުރައްވާފައިވެ އެވެ. އެގޮތުން ނިޒާމީ ނުކުތާއެއް ނަންގަވައި ތިނަދޫ ދެކުނު ދާއިރާގެ މެންބަރު އަބްދުﷲ ސަނީފް ވިދާޅުވީ ދެ މެންބަރުން ދައްކަވަމުން ގެންދަވަނީ މަޖިލީހަށް "ކުޅަދާނަވެގެންވާފަދަ" ވާހަކަތަކެއް ނޫން ކަމަށެވެ.
ސަނީފްގެ ނިޒާމީ ނުކުތާ ބަލައިގަނެ، ނަޝީދު ވަނީ ބަހުސްގައި މެންބަރުންގެ ބޭއަދަބީ ވާހަކަތަކާއި ޒާތީ ވާހަކަތައް ނުދެއްކެވުމަށް އެދިވަޑައިގެންފަ އެވެ.
