ނަފްސާނީ ބަލި ތަހައްމަލު ނުކުރި ނަމަވެސް މުޖުތަމައު ތެރޭގައި އޯގާތެރިކަމާއި ކުލުނު ނެތި ދާނަމަ އެފަދަ ބަލިތަކަށް ހުށަހެޅުމުގެ ފުރުސަތު ބޮޑު ވެގެންދާ ކަމަށް ހެލްތު މިނިސްޓަރު އަހުމަދު ނަސީމް ވިދާޅުވެއްޖެ އެވެ.
ދުނިޔޭގެ ނަފްސާނީ ދުޅާހެޔޮކަމުގެ ދުވަސް ފާހަގަކުރުމަށް އެޗްޕީއޭއިން އިންތިޒާމުކޮށްގެން އިއްޔެ ސެންޓްރަލް ޕާކުގައި ބޭއްވި މެންޓަލް ހެލްތު އޯޕަން ޑޭ ފެށުމުގެ ރަސްމިއްޔާތުގައި ވާހަކަ ދައްކަވަމުން ނަސީމް ވިދާޅުވީ ނަފްސާނީ ބަލިތައް ތަހައްމަލު ކުރާ މީހުންނާ މެދު މުޖުތަމައުގައި ދެކޭ ގޮތް ބަދަލުކުރަން ޖެހޭ ކަމަށެވެ.
"ނަފްސާނީ ސިއްހަތާ ދޭތެރޭ އޮންނަ 'ސްޓިގްމާ'ގެ ސަބަބުން އެހީތެރިކަމަށް އެދެން ޖެހިލުންވާ މީހުން އިންތިހާއަށް ގިނަ" އެންމެނަށް ރައްކާތެރި، އެހީތެރިކަމަށް އެދެވޭނެ މާހައުލެއް މުޖުތަމައުގައި އުފެއްދުމުގެ އަމާޒު ހިފަންޖެހޭކަން ފާހަގަކުރައްވާ ނަސީމް ވިދާޅުވި އެވެ.
އޭނާ ވިދާޅުވީ ޖިސްމާނީ ގޮތުން ބަލިވުމުން ފަރުވާ ބޭނުންވާ ފަދައިން ނަފްސާނީ ގޮތުން ބަލިވުމުން ވެސް އޯގާތެރިކަމާއި އަޅާލުން ބޭނުންވާ ކަމަށެވެ. އަދި، މުޖުތަމައަކީ އެކަކު އަނެކަކަށް އަޅާލަ، އޯގާތެރި މުޖުތަމައަކަށް ވާންޖެހޭ ކަމަށާއި، މުޖުތަމައު ތެރޭގައި އޯގާތެރިކަމާއި ކުލުނު ނެތިދާނަމަ ނަފްސާނީ ބަލިތަކަށް ހުށަހެޅުމުގެ ފުރުސަތު ބޮޑުވެގެންދާ ކަމަށް ވެސް ނަސީމް ވިދާޅުވި އެވެ.
ނަސީމް ވިދާޅުވީ ނަފްސާނީގޮތުން ދުޅަހެޔޮ އަދި އޯގާތެރި މުޖުތަމައެއް ބިނާކުރުމަށް އާއިލާގެ ދައުރު ވަރަށް ބޮޑު ކަމަށާއި، މުޖުތަމައުގައި ވަމުންދާ ރަނގަޅު ކަންތައްތަކާއި އިއާދަ ކުރަން ބޭނުންވާ ރަނގަޅު ކަންތައްތައް ފާހަގަކޮށް ނެތެމުންދާ ރަނަގޅު އާދަކާދަތައް ދަރިންގެ ކިބައިގައި އަށަގެންނެވުމުގެ މަސައްކަތްކޮށް އެކަމަށް ބާރުއެޅުން މުހިންމު ކަމަށެވެ.
އަދި، ރަހުމަތްތެރިންނާއި، ގާތް ތިމާގެ މީހުންނާއި، އެކުގައި މަސައްކަތްކުރާ މީހުންނާއި، އަވައްޓެރިންނާ ގުޅުން ބަދަހި ކުރާއިރު އޯގާތެރިކަމާއި ލޯބި އިސްކުރަން ޖެހޭ ކަމަށް ވެސް އޭނާ ވިދާޅުވި އެވެ.
އުމުރުން ދުވަސްވީ މީހުންނަށް މަގުމަތީގައި ހިނގާބިނގާވެ އުޅުމަކީ މިއަދު ޖިސްމާނީ އަދި ނަފްސާނީގޮތުން ވެސް އުނދަގޫ ކަމެއްކަން ފާހަގަކުރައްވާ ނަސީމް ވިދާޅުވީ ކުޑަކުދިންނާއި އުމުރުން ދުވަސްވީ މީހުންނާއި އެކި ކަހަލަ ނާޒުކު ހާލަތްތަކަށް ހުށަހެޅޭ މީހުންނަށް ހާއްސަ ސަމާލުކަމެއްދީ، އެމީހުންނަށް ރައްކާތެރިކަން ކަށަވަރުކޮށްދިނުމަކީ މުޖުތަމައެއްގެ ގޮތުން އަޅުގަނޑުމެއް އެންމެންގެ ވެސް ޒިންމާއެއް ކަމަށެވެ.
އޭނާ އިތުރަށް ވިދާޅުވީ ދުނިޔޭގެ ސިއްހަތު ޖަމްއިއްޔާއިން، "ސިއްހަތު" މާނަ ކޮށްފައިވަނީ ޖިސްމާނީ، ނަފްސާނީ އަދި އިޖްތިމާއީ ދުޅަހެޔޮކަން އޭގެ ތެރޭގައި ހިމެނޭގޮތަށް ކަމަށެވެ. އަދި ކޮވިޑް-19 ޕެންޑެމިކް ތެރޭގައި ނަފްސާނީ ސިއްހަތުގެ ބަލިތައް ތަހައްމަލު ކުރާ މީހުންގެ އަދަދު އާދަޔާ ހިލާފަށް މަތިވެފައިވާއިރު، ޑަބްލިއުއެޗްއޯއިން ނަފްސާނީ ދުޅަހެޔޮކަން ކަނޑައަޅާފައި ވަނީ 'ގްލޯބަލް ޕްރަޔޯރިޓީ' އެއްގެ ގޮތުގައި ކަމަށް ވެސް ނަސީމް ވިދާޅުވި އެވެ.
