ޕަބްލިކް ސާވިސް މީޑިއާ (ޕީއެސްއެމް)ގެ އިންޓާނަލް އޮޑިޓް ޑިޕާޓްމެންޓު އުވާލީ ފިނޭންސް މިނިސްޓްރީއާއި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުގެ ލަފަޔާ ނުލާ، ބޭރުގެ "އެކްސްޕާޓް އޮޕީނިއަން"ގެ މަތީން ކަމަށް އެ ކުންފުނީގެ އިސްވެރިން ބުނެފި އެވެ.
ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒަސް ކޮމިޓީން އަންނަނީ ޕީއެސްއެމްގެ އިންޓާނަލް އޮޑިޓް ޑިޕާޓްމަންޓް އުވައިލި މައްސަަލަ ބަލަމުންނެވެ.
އެ ކޮމިޓީން އެންމެ ފަހުން ބޭއްވި ބައްދަލުވުމުގައި ކު ރީގެ އިންޓާނަލް ޗީފް އޮޑިޓަރު އަހުމަދު ފަޒީލު ވަނީ އެ ޑިޕާޓްމަންޓް އުވާލީ އެންޓަނާ މަޝްރޫއު އަލުން ފެށުމުގައި ކޮރަޕްޝަނަށް މަގުފަހިވާ ގޮތަށް އެމްޑީ މަސައްކަތް ކުރައްވާފައިވާ ކަމަށް އޮޑިޓް ރިޕޯޓެއްގައި ތުހުމަތު ކުރައްވާފަ އެވެ. އަދި، އެ ކުންފުނީގައި 100 މިލިއަން ރުފިޔާގެ ހިޔާނާތް ހިންގާފައިވާ ކަމަށް އޭނާ ތުހުމަތުކުރައްވާފައިވެ އެވެ.
އެ މައްސަލައިގައި ސުވާލުކުރުމަށް ޕީއެސްއެމްގެ އިސްވެރިން މިއަދު މަޖިލީހަށް ހާޒިރުކޮށްފައިވާއިރު، ޕީއެސްއެމްގެ ޗެއާމަން އިބްރާހިމް ހިލްމީ ވިދާޅުވީ އޮޑިޓު ޑިޕާޓްމެންޓު އުވާލާފައިވަނީ އެ ތަނުން މާ ބޮޑު އެދެވޭ މަސައްކަތްތަކެއް ނުކުރެވިމ، ނަތީޖާތަކެއް ހާސިލްނުވާތީ ކަމަށެވެ.
"ޑިޕާޓްމެންޓް އުވާލަން ނިންމި މައިގަނޑު މައްސަލައަކީ އިންޓާނަލް އޮޑިޓް އޭގެ ފުރިހަމަ ގޮތުގައި، އަޅުގަނޑުމެންގެ ކުންފުންޏަށް ބޭނުންނުކުރޭތީވެ، އަޅުގަނޑުމެންގެ އެކްސްޕާޓް އޮޕީނިއަން ބޯޑަށް ހޯދައިފައި އެއަށް ފަހުގައި އުވާލާފައި ވާނީ،" ހިލްމީ ވިދާޅުވި އެވެ.
އެހެންނަމަވެސް އެ ޑިޕާޓްމެންޓު އުވާލުމުގައި ފިނޭންސް މިނިސްޓްރީ އަދި ޕީސީބީގެ ލަފާ ހޯދާފައި ނުވާނެ ކަމަށް ކޮމިޓީ މެންބަރުން ތަކުރާރުކޮށް ސުވާލުކުރުމުން ހިލްމީ ވިދާޅުވެފައިވެ އެވެ.
މެނޭޖިން ޑިރެކްޓަރު އަލީ ހާލިދު ވިދާޅުވި ގޮތުގައި މިހާރުގެ މެނޭޖުމަންޓުން ހިންގާފައިވާ އެއްވެސް ކޮރަޕްޝަންގެ އަމަލެއް ނޯންނާނެ ކަމަށާއި އެފަދަ ކަމެއް އޮޑިޓުން ވެސް އަދި އޭސީސީން ވެސް ފާހަގަކޮށްފައި ނުވާ ކަމަށެވެ.
އަދި، އޮޑިޓުގައި ފާހަގަކޮށްފައިވާ ގިނަ ކަންކަމަކީ ކުރީގެ މެނޭޖުމަންޓުން ހިންގާފައިވާ ކޮރަޕްޝަންގެ އަމަލުތައް ކަމަށް ހާލިދާއި ހިލްމީ ވެސް ވަނީ ވިދާޅުވެފަ އެވެ.
އަޑިޕާކްގައި އެންޓަނާ ޖަހައި، މީޑިއަމް ވޭވް ދޫކުރަން ބޭނުންވާ ނިޒާމް ގާއިމްކުރުމުގެ މަސައްކަތް ކުރީގެ ސަރުކާރުގެ ދުވަސްވަރު ހަވާލުކޮށްފައި އޮތީ އެ މަސައްކަތަށް ކުރިމަތިލި އެންމެ ގާބިލު ކުންފުންޏަކާ ނޫން ކަމަށާއި ލަންކާގެ ތާންތޫރީ ކުންފުންޏާ އެ މަސައްކަތް ހަވާލުކޮށްގެން ކުރިއަށް ގެންދިޔަ ނަމަވެސް އެ މަސައްކަތުގެ އެއްބަސްވުން ފަހުން އޮތީ ބާތިލުވެފައި ކަމަށް ވެސް ފަޒީލް ތުހުމަތު ކުރެއްވި އެވެ.
މި ތުހުމަތުތައް ހިމެނޭހެން ކޮރަޕްޝަންގެ ހުރިހާ ތުހުމަތުތައް ހިލްމީއާއި ހާލިދާ ދެ ބޭފުޅުން ވަނީ ދޮގުކުރައްވާފަ އެވެ.
