ރާއްޖޭގެ ދެކޮޅުގައި އަޅާ ރީޖަނަލް އެއާޕޯޓުތަކުގެ ސަބަބުން ފަތުރުވެރިކަން ވަރަށް ބޮޑަށް ކުރިއަރާނެ ކަމަށާއި ފަތުރުވެރިކަމަށް ރަން ދުވަސްވަރެއް އެއިރުން އަންނާނެ ކަމަށް އެ އިންޑަސްޓްރީގެ އެއް ބާނީ މުހައްމަދު އުމަރު މަނިކު ވިދާޅުވެއްޖެ އެވެ.
ފަތުވުވެރިކަމަށް 50 އަހަރު ފުރުން ފާހަގަ ކުރުމަށް މިރޭ ބޭއްވި ހަފުލާއެއްގައި ވާހަކަ ދައްކަވަމުން އުމަރު މަނިކު ވިދާޅުވީ ހދ. ހަނިމާދޫ އަދި އައްޑޫ ގަމުގައި އަޅާ ރީޖަނަލް އިންޓަނޭޝަނަލް އެއާޕޯޓުތަކާއެކު ރާއްޖޭގެ ފަތުރުވެރިކަމުގެ ކެޕޭސިޓީ އިތުރުވެ އެ ދާއިރާގެ ރަން ދުވަސްވަރު ފެނިގެންދާނެ ކަމަށެވެ.
"ރާއްޖޭގައި [ފަތުރުވެރިކަމުގެ] ދެ ހަބު އެ އުފެދެނީ. އައްޑޫ އަތޮޅުގައި އެއް އެއާޕޯޓު ދެން ހަނިމާދޫގައި. ހަނިމާދޫ ވެގެންދާނީ ނޯތުގެ ހަބަކަށް. މީގެ ކުރިން ނޯތުގަ ވަރަށް ދަށްކޮށް އޮތީ ފަތުރުވެރިކަން. ނަމަވެސް ދެން ސަރުކާރުން ]އުތުރުގައި] 8.000 ބެޑު އެޅުއްވީމައި މުޅިތަން އެއްކޮށް ދިރޭނެ،" އުމަރު މަނިކު ވިދާޅުވި އެވެ.
އެ ދެ ރީޖަނަލް ހަބާއި އެކު ރާއްޖޭގެ އިގުތިސާދު ދެގުނަވެގެން ދާނެކަމަށްވެސް އުމަރު މަނިކު ވިދާޅުވި އެވެ. މީގެ އިތުރުން އުތުރުގައި ކުރިން ދަށްކޮށް އޮތް ފަތުރުވެރިކަން ކުރިއަރުވަން މި ސަރުކާރާއި ރައީސް އިބްރާހިމް މުހައްމަދު ސޯލިހު އިސްނެންގެވިކަން ފާހަގަކުރައްވާ ރައީސަށް އުމަރު މަނިކު ވަނީ ޝުކުރު ދަންނަވާފަ އެވެ.
މީގެ ކުރިން 1972 ވަނަ އަހަރު ފެށި ފަތުރުވެރިކަމުގެ ސިނާއަތް ފުޅާވެ މިއަދު ރާއްޖެއަކީ އެ ދާއިރާގެ ބައިނަލްއަގުވާމީ ބެންޗުމާކަކަށް ވެގެން ގޮސްފައިވާ ކަމަށްވެސް އުމަރު މަނިކުގެ ވާހަކައިގައި ފާހަގަ ކުރެއްވި އެވެ.
"އަޅުގަނޑުމެން ކަހަލަ ކުޑަކުޑަ ގައުމެއް ކުއްލިއަކަށް މި ދުވަސްކޮޅުގެ ތެރޭގައި މި ޕޮޒިޝަނަށް އައުމަކީ އެއީ ވަރަށް ބޮޑު އެޗީވްމަންޓެއް،" އުމަރު މަނިކު ވިދާޅުވި އެވެ.
ފަތުރުވެރިކަމަށް 50 އަހަރު ވުމާއެކު އެ އިންޑަސްޓްރީ ދެން ކުރިއަށް ގެންދަންވީ ގޮތާމެދު ވިސްނަންޖެހޭ ކަމަށް ވިދާޅުވެ އުމަރު މަނިކު ފާހަގަ ކުރެއްވީ އެ މަސައްކަތް ކުރުން އޮތީ އަދުގެ ދިވެހި ޒުވާނުންގެ އަތްމަތީގައި ކަމަށެވެ. އެގޮތުން އެ ދާއިރާއަށް ބޭނުންވާ ތަމްރީނު ލިބިގަނެ ރަނގަޅު ގޮތުގައި ހިދުމަތް ކުރުމުގެ މުހިންމުކަން ފާހަގަ ކުރެއްވި އެވެ.
އުތުރުގައި އަޅާ ހަނިމާދޫ އިންޓަނޭޝަނަލް އެއާޕޯޓުގެ މަސައްކަތް 2025 ވަނަ އަހަރަށް ނިމޭނެ ކަމަށް ލަފާ ކުރެވޭ އިރު އެ އެއާޕޯޓާއެކު އުތުރުގައި 8،000 ޓުއަރިސްޓު އެނދު އެޅުމަކީ ސަރުކާރުގެ އަމާޒުކަމަށް ރައީސް ސޯލިހު ވަނީ ވިދާޅުވެފަ އެވެ.
