އައްޑޫގެ މަސްވެރިންނަށް މަޝްހޫރު، ގިނަ ބަޔަކު އެ މަހެއް ބޭނުމަށް މަސައްކަތް ކޮށްފައިވާ މަރަދޫ ނެރު މަތިން އާންމުކޮށް ފެންނަ މާ ފާނަ ހިތަދޫގެ މަސްވެރިންތަކެއް މިއަދު ބާނައިފި އެވެ.
މިއަދު ހަވީރު ޑިންގީއެއްގައި ފަރުމަހުގެ މަސްވެރިކަމަށް ނިކުތް އައްޑޫގެ ހަތަރު މަސްވެރިން ބޭނި އެ ފާނައިގެ ދިގު މިނުގައި 5 ފޫޓު 11 އިންޗި ހުރި އިރު ބަރުމިނުގައި 107 ކިލޯ ހުރި ކަމަށް އެ މަސްވެރިން ބުންޏެވެ.
މާ ފާނަ ބޭނި 22 ފޫޓުގެ ޑިންގީގައި ހުރި އައްޑޫ ހިތަދޫއަށް ނިސްބަތްވާ ހުސެން ޝިޔާޒް "އަދަދު" އާ ވާހަކަ ދައްކަމުން ބުނީ އެއީ އާންމުކޮށް އެ ސަރަހައްދުން ފެންނަ މަހެއް ކަމަށާއި ގިނަ ބަޔަކު މީގެ ކުރިން އެ މަސް ބޭނުމަށް މަސައްކަތް ކޮށްފައިވާ ކަމަށެވެ.
"އެ މަސް ނެގި އިރުވެސް [އަނގައިގައި] ހުރި ބުޅިއެއް. ގިނަ މީހުންގެ އަތުގައި ގަނެފަ ނަނު ކަނޑާލާފަ ގޮސްފަ ކުރިން ހުރީ،" އާންމު ގޮތެއްގަައި ފަރު މަހުގެ މަސްވެރިކަން ކުރުމަށް ނިކުންނަ ޝިޔާޒް ބުންޏެވެ.
ޝިޔާޒް ބުނީ މަސް ޑިންގީއަށް ނެގީ ހަތަރު މީހުން ނަނަށް ދަމައިގެން ކަމަށެވެ.
މަރަދޫ ފަރު މަސްވެރިންނަށް އެ މަސް މަޝްހޫރު އޮންނަނީ ނަނުގައި ގަނެފައި އޮންނަ މަސް ކެއުމަށް ފޯރި ހުންނަ މަހެއްގެ ގޮތުގަ އެވެ. އާންމުކޮށް މަހަށް ނިކުމެ އުޅޭ އެންމެނަށް ވެސް އެ މަސް އެނގެ އެވެ.
"މަރަދޫ ނެރުމަތި އެއީ މަސް ފެކްޓްރީއިން މަހު ބޯ އަޅާ ދިމާލެއް. އެހެންވެ އެތަނަށް ވަރަށް މަސް އަރާނެ،" އެ މަސް އުޅޭ ސަރަހައްދު ކިޔައިދެމުން ޝިޔާޒް ބުންޏެވެ.
"އާންމުކޮށް ގަންނަ ކުދި މަސްތަކުގަ ހިފާ ކަމަށް ވަނީ. މިއަދުވެސް ގަތީ ފަލަ ނަނެއްގައި މަހެއް އަޅުވާފަ ދޫކޮށްފަ އޮއްވާ،" އޭނާ ކިޔައިދިނެވެ.
107 ކިލޯގެ އެ މަސް މިހާރު ވަނީ ކެފޭ އަކަށް ކިރާލާފަ އެވެ.
