ބައިނަލްއަގުވާމީ ޔޯގާ ދުވަސް ފާހަގަކުރަން ޖޫން 21, ގައި ގަލޮޅު ދަނޑުގައި ބޭއްވި ހަރަކާތަށް ހުރަސް އަޅައި ހަމަނުޖެހުން ހިންގި މައްސަލައިގައި ޝެއިހް އާދަމް ނިޝާނާއި ފަޒްލޫން މުހައްމަދު ހިމެނޭ ގޮތަށް 18 މީހެއްގެ މައްޗަށް ދައުވާކޮށް ކްރިމިނަލް ކޯޓަށް މައްސަލަ ހުށަހަޅާފައިވާކަން ހާމަކުރީ އިއްޔެ އެވެ.

ސަރުކާރުގެ ބައެއް އިސް ބޭފުޅުންނާއި ބޭރު ގައުމުތަކުގެ ޑިޕްލޮމެޓުން ވެސް ތިއްބައި، ގަދަކަމުން ގަލޮޅު ދަނޑަށް ވަދެ އެތެރޭގައި ތިބި ބައެއް މީހުނަށް ހަމަލާދީ، ހަމަނުޖެހުން ހިންގި މައްސަލާގައި 18 މީހުންގެ މައްޗަށް ޓެރަރިޒަމްގެ ގާނޫނުގެ ދަށުންނާއި ގާނޫނުލްއުގޫބާތުގެ ދަށުން ވެސް ދައުވާކޮށްފައިވެ އެވެ.

އެ އަށާރަ މީހުންނަށް އެކި ދައުވާކޮށްފައިވާއިރު، އޭގެ ތެރޭގައި ޓެރަރިޒަމްގެ އަމަލެއް ކުރުމަށް ހިތްވަރު ދިނުމުގެ ދައުވާ އާއި ޓެރަރިޒަމްގެ އަމަލެއް ކުރުމުގެ ދައުވާ އާއި ޓެރަރިޒަމްގެ އަމަލެއް ހިންގުމުގައި ބައިވެރިވުމުގެ ދައުވާ ޓެރަރިސްޓް ޖަމާއަތަކަށް ތާއީދުކުރާ ކަމަށް ދޭހަވާ ފަދަ ލިޔުމެއް ގެންގުޅުމުގެ ކުށުގެ ދައުވާ ހިމެނެ އެވެ.

އޭގެ އިތުރަށް ހަތިޔާރެއް ބޭނުންކޮށްގެން މާރާމާރީ ހިންގުމުގެ ދައުވާ، ހަތިޔާރެއް ބޭނުންކޮށްގެން މާރާމާރީ ހިންގުމަށް އުޅުނުކަމުގެ ދައުވާ، ގާނޫނު ތަންފީޒުކުރާ މުވައްޒަފެއްގެ މަސައްކަތަށް ގަސްތުގައި ހުރަސް އެޅުމުގެ ދައުވާ، އަދި އަދުލު އިންސާފު ގާއިމް ކުރުމަށް ހުރަސްއެޅި ކަމުގެ ދައުވާ ވެސް އެއް ބަޔަކަށް ކޮށްފައިވެ އެވެ.

ހަމަނުޖެހުން ހިންގަން ރޭވުމުގައި އިސްކޮށް އުޅުނު ކަމުގެ ތުހުމަތުގައި ހައްޔަރުކުރި މީހުންގެ ތެރޭގައި ހިމެނޭ ޝައިހް ފަޒްލޫން މުހައްމަދާއި ޝައިހް އާދަމް ނިޝާންގެ މައްޗަށް ޓެރަރިޒަމްގެ އަމަލެއް ކުރުމަށް ހިތްވަރު ދިނުމުގެ ދައުވާ ކޮށްފައިވެ އެވެ.

އެ ދުވަހުގެ މުޒާހަރާއަށް ދިދަތައް ދޫކޮށްދިން ކަމުގެ ތުހުމަތު އޮތް ޕީޕީއެމްގެ ހަރަކާތް ޑިޕާޓްމަންޓްގެ ހެޑު އަދި ރައްޔިތުންގެ މަޖިލީހުގެ ހޯރަފުށި ދާއިރާގެ ކުރީގެ މެންބަރު މުހައްމަދު އިސްމާއީލް މައްޗަށް ޓެރަރިޒަމްގެ އަމަލެއް ހިންގުމަށް ބައިވެރިވުމުގެ ދައުވާއާއި އަދުލު އިންސާފު ގާއިމްކުރުމަށް ހުރަސް އެޅުުމުގެ ދައުވާކޮށްފައިވެ އެވެ.

ބައެއް މުހިންމު ހަބަރުތައް

• ގެއްލިގެން ހޯދަމުންދިޔަ މުހައްމަދު އަޒުހާން ކަމަށް ބެލެވޭ މީހެއްގެ ހަށިގަނޑު ފެނުނުއިރު އެ މައްސަލާގައި ފުލުހުންގެ އިހުމާލު އޮތް ކަމަށް ބުނެ ގިނަ ބަޔެއްގެ ފާޑުކިޔުން ވަނީ އަމާޒުވެފަ އެވެ.

• ރާއްޖޭގެ ކަނޑުގެ ސަރަހައްދުގައި މިހާރު ކުރިއަށްދާ ކަނޑުގެ ދިރާސާގެ ތެރެއިން އިއްޔެ ތިމާވެއްޓާ ބެހޭ ވަޒީރު އައިމިނަތު ޝައުނާ ބައިވެރިވެ ލެއްވި ޑައިވްގައި ކަނޑުގެ ސަތަހައިގެ 270 މީޓަރު އަޑިންވެސް ކުނި ފެނިފައިވާ ކަަމަށް މިނިސްޓަރު ވިދާޅުވީ އިއްޔެ އެވެ.

• ޓޫރިސްޓު ރިސޯޓުތަކުގެ ގޮތުގައި ތަރައްގީކުރަން ހަވާލުކޮށް ނުހެދި ދިގުލައިގެން ގޮސްފައިވާ ރަށްތަކަކީ ޓޫރިޒަމަށް ދިމާވެފައިވާ އެންމެ ބޮޑު އެއް ގޮންޖެހުންގެ ގޮތުގައި ރައީސް އިބްރާހިމް މުހައްމަދު ސޯލިހު ސިފަކުރައްވާފައިވާކަން ރިޕޯޓުކުރީ އިއްޔެ އެވެ.

ދުވަހުގެ ކޯޓޭޝަން

ރިސޯޓު ހަދަން ދޫކުރި ރަށްތަކުގެ ތެރެއިން ނުނިމި ހުރި ރަށްތަކާ ގުޅޭގޮތުން ރައީސް އިބްރާހިމް މުހައްމަދު ސޯލިހު ވިދާޅުވީ:

އެ ތަންތަނުން ދައުލަތަށް ލިބުނު ގެއްލުމުގެ ބަދަލު ހޯދުމުގެ މަސައްކަތް، ޝަރުއީ ކޯޓުތައް މެދުވެރިކޮށް މިއަންނަނީ ކުރަމުން. އަދި ބައެއް ރަށްތަކާއި ފަޅުތަކުގެ މައްސަލަތައް އޭސީސީން އަންނަނީ ތަހުގީގު ކުރަމުން،

ދުވަހުގެ ފޮޓޯ

ގެއްލިގެން ހޯދަމުންދިޔަ އަޒުހާން ކަމަށް ބެލެވޭ މީހެއްގެ ހަށިގަނޑު ފެނުނު ހިސާބު. އެއީ، ނިރޮޅު މަގުގެ ކަނާތް ފަޅިން ބޯޑެތި ގަސް ހެދި ވެލި ފުނިތަކެއް ޖަހާފައިވާ ސަރަހައްދެއް އަދި އޭނާ އެންމެ ފަހުން ފެނުނު ރެޑްބުލް ޕާކާ ދެމެދު 200 މީޓަރުގެ ދުރުމިނެއް ވެސް ނުހުންނާނެ --- ފޮޓޯ: އަބްދުﷲ އިޔާން/އަދަދު