އިސްލާމް ދީނަކީ ގައުމިއްޔަތުގެ ތަނބު ކަމަށާއި ޓެރަރިޒަމްއަކީ ދިވެހިން ދަންނަ ކަމެއް ނޫން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވީ އިއްޔެ އެވެ.
ހއ. އުތީމުގައި އިއްޔެ ބޭއްވި ގައުމީ ދުވަހުގެ ޖަލްސާގައި ވާހަކަ ދައްކަވަމުން ރައީސް ވިދާޅުވީ އިސްލާމް ދީނަކީ ގައުމިއްޔަތުގެ އެންމެ ވަރުގަދަ ތަނބު ކަމަށާއި ޓެރަރިޒަމް ފަދަ ކުށްތަކަކީ "ދިވެހިން ދަންނަ ކަމެއް ނޫން" ކަމަށެވެ. ދިވެހިންނަކީ އިސްލާމް ދީނަށް ލޯބި ކުރާ ބައެއްކަން ފާހަގަ ކުރައްވައި ރައީސް ވިދާޅުވީ ދިވެހިން ބޭނުންވަނީ ސުލްހަވެރި ދިރިއުޅެއް އުޅެން ކަމަށެވެ.
"މާތްވެގެންވާ އިސްލާމް ދީނުގެ މަތިވެރިކަމާ އެދީނުގެ ސައްހަ އަގީދާ އަކީ ދިވެހި ގައުމިއްޔަތުގެ އެންމެ ވަރުގަދަ ތަނބު. ހަލާލު މަސައްކަތްކޮށް، ކަނޑުފަޅު ފީނާ، ފަރު ހިލާ، ވަލު ފުރާގުން ދަރިން ބޮޑެތިކުރީ، ދިވެހި ކާބަފައިން،" ރައީސް ވިދާާޅުވި އެވެ. "އެއީ އުމުރަށް ނަމާދު ގާއިމްކޮށް، ރޯދަހިފާ، ޒަކާތްދީ، ހަރާމަށް ބިރުވެތިވެ، ހަލާލަށް ރައްކާތެރިވި ދިވެހިން. ޓެރަރިޒަމަކީ ދިވެހިން ދަންނަ ކަމެއް ނޫން. ލާމެހިފައިވާ ދުނިޔޭގާ، އެހެން އިންސާނުންނާއެކު މުއާމަލާތު ކުރެވި، ސުލްހަ މަސަލަސްކަމާއެކު، އުފަލުގާ ދިރިއުޅުމަކީ، ދިވެހިން އެދޭ ގޮތް."
އޭގެ އިތުރުން، އެ ޖަލްސާގައި ވާހަކަ ދައްކަވަމުން ރައީސް ވިދާޅުވީ ގައުމިއްޔަތަކީ "ތަފާތެއް ނެތި، އަމާޒެއް އޮވެ، ކުދި ރަށްތަކުގައި އުޅެވޭނެ ގޮތް ހެދުން ކަމަށެވެ.
"ގައުމިއްޔަތަކީ ތަފާތެއް ނެތި، އަމާޒެއް އޮވެ، ޖަޒީރާ ކުދި ރަށްތަކާއެކު ދިރިއުޅެވޭނެ ގޮތެއް ރައްޔިތުންނަށް ހޯދައިދިނުން. މިދަތުރުގާ އަޅުގަނޑު މިއައީ ފިނެއަށް ގޮސްފަ. އަޅުގަނޑުމެން އަލުން އަނބުރާ އިއާދަކުރަން މަސައްކަތް މިކުރާ ދިވެހި ގައުމިއްޔަތުގެ ހަމަ ތައްގަނޑަށް ފިނޭ އެއަންނަނީ ފެތެމުން،" ފިނޭގެ މިސާލު ނަންގަވަމުން ރައީސް ވިދާޅުވި އެވެ.
ރައީސް ސޯލިހު ވިދާޅުވީ ކުދި ރަށްތައް ވެސް ހިމެނޭ ގޮތަށް ރާއްޖޭގެ ހުރިހާ ރަށެއްގައި ވެސް ފަސޭހައިން ދިރިއުޅެވޭނެ ގޮތް ހެދުމަކީ "އިހު އޮތް ގައުމިއްޔަތު" ދިރުވުން ކަމަށެވެ.
"ކުޑައެއް ބޮޑެއްނެތި، ރާއްޖޭގެ ހުރިހާ ރަށަކަށް، ޖަޒީރާ، ފަސޭހަ، މި ދިރިއުޅުން ކަށަވަރުކޮށް ދިނުމަކީ، އިހު އޮތް ދިވެހި ގައުމިއްޔަތު، އަލުން އަނބުރާ ދިރުވުން،" ރައީސް ވިދާޅުވި އެވެ.
ރައީސް ވިދާޅުވީ ފަސޭހައިން ސިއްހަތާއި ތައުލީމާއި އާމްދަނީއަށް ވާސިލްވެވޭނެ ގޮތެއް ހޯދުމަށް ސަރުކާރުން މަސައްކަތް ފަށާފައިވާ ކަމަށާއި އެކަންނުކޮށް ދޫކޮށްލުމަކީ އެމަނިކުފާނަށް ލިބިވަޑައިގެންފައިވާ އިހްތިޔާރެއް ނޫން ކަމަށެވެ. އަދި އެމަނިކުފާނު އެދިވަޑައިގެންނެވީ ރައްޔިތުން އެ މަސައްކަތުގައި އެމަނިކުފާނަށް އެއްބާރުލުން ދެއްވުން ކަމަށެވެ.
"ސިއްހަތާއި ތައުލީމާއި އާމްދަނީއަށް ވާސިލުވެވޭނެ، އަވަސް އަދި ފަސޭހަ މަގުތަށް ކޮށާ އަލިކުރުމަށް ފަށާފައިވާ މިމަސައްކަތް، ނުނިންމާ ދޫކޮށްލުމަކީ ސަރުކާރަށް އޮތް އިހްތިޔާރެއް ނޫން. މިކަމުގާ ރާއްޖޭގެ ލޮބުވެތި ހުރިހާ ރައްޔިތުންގެ ތާއީދާ އެއްބާރު ލެއްވުން އަޅުގަނޑު ބޭނުން،" ރައީސް ސޯލިހު ވިދާޅުވި އެވެ.
ބައެއް މުހިންމު ހަބަރުތައް
- މިނިވަންކަމާއި ސިޔާދަތު ދެމެހެއްޓުމަށް ޓަކައި ފުރަތަމަ އެނގެން ޖެހެނީ ތާރީހު ކަަމަށާއި ތިމާމެންނަކީ ކޮންތާކު ކިހިނެތް ދިރިއުޅުނު ބައެއްކަން އެނގެން ޖެހޭ ކަމަށް ރައީސް އިބްރާހީމް މުހައްމަދު ސޯލިހު ވިދާޅުވީ އިއްޔެ އެވެ.
- ދިވެހި ގައުމިއްޔަތަށް އޮތް އެންމެ ބޮޑު ގޮންޖެހުމަކީ އަދި ނުރައްކަލަކީ ދީނަށް ފުރައްސާރަ ކުރުމާއި ދީނީ ހަރުކަށި ފިކުރުތައް ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވީ އިއްޔެ އެވެ.
- ކުރީގެ ރައީސް އަބްދުﷲ ޔާމީނަށް އިދިކޮޅު ޕީޕީއެމާއި ޕީއެންސީ ކޯލިޝަންގެ ރިޔާސީ ކެންޑިޑޭޓްގެ ޓިކެޓު އެރުވި ފަހުން ކުރައްވާ ފުރަތަމަ ދަތުރުފުޅުގައި ދ. ކުޑަހުވަދޫއަށް ވަޑައިގަންނަވާ ގޮތަށް ހަމަޖެހިފައިވާކަން ހާމަކުރީ އިއްޔެ އެވެ.
ދުވަހުގެ ކޯޓޭޝަން
ގައުމީ ދުވަހުގެ މުނާސަބަތުގައި ބޭއްވި ހާއްސަ ރަސްމިއްޔާތުގައި ވާހަކަފުޅު ދައްކަވަމުން ރައީސް އިބްރާހިމް މުހައްމަދު ސޯލިހު ވިދާޅުވީ:
މިނިވަންކަމާ ސިޔާދަތާ އަމިއްލަވަންތަކަން ދެމެހެއްޓުމަށް ފުރަތަމަ އެނގެން ޖެހެނީ އަމިއްލަ ތާރީޚު. ތިމާމެންނަކީ ކޮންތާކު ކިހިނެއް ދިރިއުޅުނު ކޮންބައެއްކަން އެނގެންޖެހޭ. ތާރީޚާ ސަގާފަތާ އާސާރުތަށް ދެމެހެއްޓެން ޖެހޭ،
ދުވަހުގެ ފޮޓޯ
ރާއްޖެ ޓްރާންސްޕޯޓް ލިންކު (އާރްޓީއެލް) ފެރީގައި ރައީސް އިބްރާހިމް މުހައްމަދު ސޯލިހު ޕްލޭނިން މިނިސްޓަރު މުހައްމަދު އަސްލަމް އާއެކު ދަތުރުކުރައްވަނީ. އުތީމުގައި ކުރިއަށް ދިޔަ ގައުމީ ދުވަހުގެ ހަރަކާތްތަކަށް ފަހު ރައީސް ދިއްދޫއަށް ވަޑައިގަތީ މި ފެރީގައި --- ފޮޓޯ: ރައީސް އޮފީސް
