ފައިނޭންޝަލް ކޮންޓްރޯލާގެ މަގާމުގައި މިހައިތަނަށް ހުންނެވި ފާތިމަތު ރަޒީނާ އެމަގާމުން އިސްތިއުފާދެއްވުމުން، ރައީސް އިބްރާހީމް މުހައްމަދު ސޯލިހު މިއަދު އެމަގާމަށް މުހައްމަދު އާޒާދު އައްޔަން ކުރައްވައިފި އެވެ.
މާލިއްޔަތު ގާނޫނުގައިވާ ގޮތުން ފައިނޭންޝަލް ކޮންޓްރޯލާގެ މަގާމަށް ރައީސް ބޭފުޅަކު އައްޔަން ކުރައްވާނީ ފިނޭންސް މިނިސްޓަރުގެ ލަފަޔާ އެކުގަ އެވެ.
ފައިނޭންޝަލް ކޮންޓްރޯލާއަކަށް މިއަދު އައްޔަންކުރެއްވި އާޒާދު މީގެ ކުރިން ހުންނެވީ ފިނޭންސް މިނިސްޓްރީގެ، އެސްއޯއީ ރިފޯމް ކޮންސަލްޓެންޓަކަށެވެ. ފިނޭންސް މިނިސްޓްރީގެ އެސްއޯއީ ފައިނޭންޝަލް ކޮންސަލްޓެންޓްގެ މަގާމު ވެސް އޭނާ ކުރިން އަދާކުރެއްވި އެވެ. އެންޓިކޮރަޕްޝަން ކޮމިޝަންގެ އިންޓެލިޖެންސް ޑިމާޓްމަންޓްގެ ހެޑް އޮފް ޑިޕާޓްމެންޓްގެ މަގާމު ވެސް އޭނާ ކުރިން އަދާކުރެއްވި އެވެ.
އާޒާދަކީ ފައިނޭސް ދާއިރާއިން މާސްޓާސް ބިޒްނަސް އެޑްމިނިސްޓްރޭޝަން ދާއިރާއިން ފުރަތަމަ ޑިގްރީ ހާސިލުކުރައްވާފައިވާ ބޭފުޅެކެވެ. އަދި އޭނާއަކީ ސީއެފްއޭ ޗާޓާޑް އެކައުންޓެންޓެކެވެ.
ފައިނޭންޝަލް ކޮންޓްރޯލާގެ މަގާމުގައި 2016 ވަނަ އަހަރުން ފެށިގެން މިހައިތަނަށް ހުންނެވި ފާތިމަތު ރަޒީނާ އެމަގާމުން އިސްތިއުފާ ދެއްވީ ފިނޭންސް މިނިސްޓްރީން ބުނި ގޮތުގައި އިތުރަށް ކިޔަވައިވިދާޅުވުމަށެވެ.
