ހުޅުމާލެއިން ގެއްލިގެން ހޯދަމުން އަންނަ ހ. ބޮނޑިކަނދޮޅުގޭ، މުހައްމަދު އަޒްހާން، 27، އެންމެ ފަހުން ފެނުނީ ހުޅުމާލެއިން ކާރަކަށް އަރަނިކޮށް ކަމަށް ފުލުހުން މިއަދު ބުނެފި އެވެ.
ފުލުހުންގެ ނެރުނު ބަޔާނެއްގައި ބުނެފައި އޮތީ އަޒްހާން އެންމެ ފަހުން ފެނުނީ ސެޕްޓެމްބަރު 18، ގައި ހުޅުމާލެ ފޭސް ދޭއްގެ ހިޔާ ފްލެޓުގެ 13 ވަނަ ޓަވަރު ކައިރިން ކާރަކަށް އަރަނިކޮށް ކަމަށެވެ. ނަމަވެސް އެއީ ކޮން ކާރެއްކަން އަދި ދަނެގަނެވިފައެއް ނުވެ އެވެ.
"އެގޮތުން ފުލުހުން އެ ސަރަހައްދުގެ ސީސީޓީވީ ފުޓޭޖްތައް ބެލިބެލުމުން އެ ދުވަހުގެ 04:53 އެހާކަންހާއިރު ހުދު ކުލައިގެ ކާރަކަށް [އަޒްހާން] އަރާކަން ވަނީ ފާހަގަކުރެވިފަ. އަދި އިތުރު ފުޓޭޖުތައް ބަލައި، ކާރު ދެނެގަތުމުގެ މަސައްކަތް ވެސް ފުލުހުން ދަނީ ކުރަމުން،" އެ ބަޔާނުގައި ބުނެފައިވެ އެވެ.
އެ ބަޔާނުގައި ފުލުހުން އިތުރަށް ބުނެފައި އޮތީ ސެޕްޓެމްބަރު 18، ގައި އަޒްނާ ފެނިފައިވާ ނަމަ އަދި އެ ސަރަހައްދުން ދަތުރެއް ނެގި ކާރެއްވާ ނަމަ އެކަން ލަސްނުކޮށް ފުލުހުންނަށް އެންގުމަށެވެ. އަދި އަޒްހާންއާ ގުޅޭ އެއްވެސް މައުލޫމާތެއްވާ ނަމަ ފުލުހުންގެ 9393351 ފޯނު ނަމްބަރަށް ނުވަތަ ހޮޓްލައިން ނަމްބަރު 3322111 އަށް ގުޅުމަށެވެ.
