އައްޑޫ އަތޮޅު ގަމު އިންޓަނޭޝަނަލް އެއާޕޯޓަށް ފުރަން ގޮސް ތިބި ދެ މީހަކު ބޮމެއް އޮތް ކަމަށް ބުނެ އިންޒާރު ދިނުމުން ހައްޔަރުކުރި ދެ މީހުން ދޫކޮށްލައިފި އެވެ.
58 އަހަރުގެ ދިވެހި އަންހެނަކާއި 61 އަހަރުގެ ދިވެހި ފިރިހެނަކު ހައްޔަރު ކުރީ އިއްޔެ ހަވީރެވެ. ފުލުހުން މިއަދު ބުނީ ރޭގެ ވަގުތެއްގައި އެ ދެ މީހުން ދޫކޮށްލާފައިވާ ކަމަށެވެ.
އެކަމުގެ ރިޕޯޓު ލިބުމާއި ގުޅިގެން މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އާ އެ މައުލޫމާތު ހިއްސާކުރުމުން އެމީހުން ގެންގުޅުނު ތަކެތި ބަލައި ފާސްކުރި އިރު، ބޮމެއް ފަދަ އެއްޗެއް ފެނިފައި ނުވާ ކަމަށް ވެސް ފުލުހުން މައުލޫމާތު ދެ އެވެ.
އެ ދެ މީހުން ދޫކޮށްލި ނަމަވެސް މައްސަލަ އިތުރަށް ތަހުގީގު ކުރަމުންދާ ކަމަށް ފުލުހުން ބުންޏެވެ.
އެއާޕޯޓުތަކުގައި މަޖަލަކަށް ނަމަވެސް އެއްވެސް ހަތިޔާރެއް އޮތް ކަމަށް ބުނެ ނުވަތަ އެފަދަ އިންޒާރެއް ދިނުމަކީ ބައިނަލްއަގްވާމީ ވައިގެ ދަތުރުފަތުރުގެ ގަވާއިދުގެ ދަށުން ހަރުކަށި އަދަބު ދެވޭ ކަންކަމެވެ.
ރާއްޖޭގެ އެއާޕޯޓުތަކުގައި ވެސް މިފަދަ ކަންކަން މަދުން ނަމަވެސް ހިނގަ އެވެ. އެކަމަކު، މިހާތަނަށް މިފަދަ މައްސަލައެއްގައި ދައުވާ އުފުލާފައެއް ނުވެ އެވެ. ޓެރަރިޒަމްގެ ގާނޫނުގައި އޮންނަ ގޮތުން އެފަދަ އަމަލެއް ހިންގުމަކީ ކުށެކެވެ.
