މި ދުވަސްވަރު ރާއްޖޭގެ ހުރިހާ ސަރަހައްދަކަށް މަސްވެރިކަން ރަނގަޅުވި ނަމަވެސް މަސް ކިރުވުން ލަސްވާ ކަމަށާއި މިފްކޯގައި ކެޕޭސިޓީ ނެތް ކަމުގެ ޝަކުވާ އިއްޔެއިން ފެށިގެން މަސްވެރިން ދަނީ ކުރަމުންނެވެ.

މަސްވެރިކަމުގެ ފަހި މޫސުން ފެށި، އެކި ހިސާބުތަކުން ދަނީ ގިނަ އަދަދަކަށް މަސް ބާނަމުންނެވެ. އެގޮތުން ބައެއް ދޯނިތަކުން 30 ޓަނު، 40 ޓަނުވެސް ދަނީ ބާނަމުންނެވެ.

އިއްޔެ މިފްކޯއަށް މަސް ކިރުމަށް އައްޑޫއަށް ގޮސް އޮތް ފަރެސްމާތޮޑާގެ މަސްވެރިއަކު ބުނީ މަސް ކިރުމަށް ކިޔުއަށް އެރީ އާދިއްތަ ކަމަށެވެ. ނަމަވެސް، އަދިވެސް މަސް ކިރުވިފައި ނުވާ ކަމަށް އޭނާ ބުންޏެވެ.

"ކިޔު ވަރަށް ދިގު. އާދިއްތައިގައި އައި ގޮތަށް މި ތިބީ. އަދި ކިރޭ ގޮތެއް ނުވޭ. މިހާރު މަސް ކިރާއިރު ވަކި ލިމިޓެއް ނެތި މަސް ނަގާތީ ފަސޭހަ، ބާނައިގެން އަންނަ ހުރިހާ މަހެއް ނަގާ،" އޭނާ ބުންޏެވެ.

މި ނޫހާ ވާހަކަ ދައްކަމުން އެހެން މަސްވެރިއަކު ބުނީ ގިނަ ދުވަސްތަކަކަށްފަހު މަސް ބޭނިގެން މަސް ކިރަން އަނެއްކާވެސް އުނދަގޫވެފައިވާ ކަމަށެވެ.

"މިހާ ދުވަހުން މަސް ބާނައިގެން އައީމަވެސް މަސްވެރިން މި ޖެހެނީ މަސް ނުކިރިގެން ނޫނީ އައިސް ނުލިބިގެން އުޅެން. އެއްކޮޅަށް ދުއްވާފަ އަނެއްކޮޅަށް ދުއްވާފަ އުޅެން،" އޭނާ ބުންޏެވެ.

އިތުރު ބޯޓެއް ގަންނަން މިފްކޯއިން ބަލަނީ

މަސްވެރިކަން އިންތިހާއަށް ރަނގަޅުވެ މިފްކޯގެ ކެޕޭސިޓީއަށް ވުރެ އިތުރަށް މަސް ބޭނުމަކީ މީގެ ކުރިންވެސް މަސްވެރިކަމުގެ މޫސުމުގައި ދިމާވާ އެންމެ ބޮޑު ގޮންޖެހުމެވެ.

އެކަމަށް ހައްލެއް ގެނައުމަށް ބާނަމުންދާ ހުރިހާ މަސް ގަނެވޭނެ ގޮތެއް ހޯދުމުގެ މަސައްކަތުގައި ބޭރުގެ ބޯޓެއް ގެންނަން ހަމަޖެހިފައިވާ ކަމަށް ފިޝަރީޒް މިނިސްޓަރު ޑރ. ހުސައިން ރަޝީދު ހަސަން ވިދާޅުވެފައި ވަނީ މިދިޔަ އޭޕްރީލް މަހު އެވެ.

އަދި މަސްވެރިކަމުގެ މޫސުން ފެށުމުގެ ކުރިން އެކަން ކުރުމަށް މަސައްކަތް ކުރަމުންދާ ކަމަށްވެސް އޭނާ ވިދާޅުވި އެވެ.

މަސްވެރިކަން ރަނގަޅު ދުވަސްވަރު މަސް ނުކިރޭ މައްސަލައަށް އެކަށީގެންވާ ހައްލެއް ގެނައުމަށް ކުރަމުންދާ މަސައްކަތްތަކާ ގުޅޭގޮތުން ސުވާލު ކުރުމުން މިފްކޯގެ އެމްޑީ އިސްމާއިލް ފައުޒީ މި ނޫހަށް ވިދާޅުވީ ސްޓޯރޭޖް ކެޕޭސިޓީ ރަނގަޅު ކުރުމަށް މެޝިނަރީއަށް ގެންނަން ޖެހޭ ބަދަލުތައް ގެނައުމަށް މަސައްކަތް ކުރަމުންދާ ކަމަށެވެ.

"މީގެ އިތުރުން ކެޕޭސިޓީ އިތުރު ކުރުމަށް އަޅުގަނޑުމެން މި ދަނީ އިތުރު ބޯޓުފަހަރުވެސް ބަލަމުން. މިއީ ބާޒާރުން ޗޮކްލެޓް ގަތުން ކަހަލަ ކަމެއް ނޫން. ވަގުތު ނަގާނެ. ބަލަން ޖެހޭ ކަންކަން ބަލާ ގަންނައިރު ގަންނާނީ ރަނގަޅު އެއްޗެއް،" އިސްމާއިލް އިއްޔެ ވިދާޅުވި އެވެ.

އޭނާ އިތުރަށް ވިދާޅުވީ ކެޕޭސިޓީގައި ހުރި ވަރަކުން މަސް ނަގަމުންދާނެ ކަމަށެވެ. އެގޮތުން ބައެއް ދޯނިތަކުން ދެ ބުރަށް މަސް ބަނައިގެން މަސް ކިރަމުންދާ ކަމަށް އޭނާ ވިދާޅުވި އެވެ.

މަސް ނުކިރޭ މައްސަލައަށް އެކަށީގެންވާ ހައްލެއް ގެނައުމަށް ކުރަމުންދާ މަސައްކަތްތަކާ ގުޅޭގޮތުން ސުވާލު ކުރުމުން އިސްމާއިލް މި ނޫހަށް ވިދާޅުވީ ސްޓޯރޭޖް ކެޕޭސިޓީ ރަނގަޅު ކުރުމަށް މެޝިނަރީއަށް ގެންގަން ޖެހޭ ބަދަލުތައް ގެނައުމަށް މަސައްކަތް ކުރަމުންދާ ކަމަށް.

މިފްކޯއަށް މަސް ގަންނަ މިންވަރު އިތުރުކުރުމަށާއި، ފިނިކޮށްފައި މަސް ބެހެއްޓޭ ޖާގަ އިތުރުކުރުމަށް މަޝްރޫއުތަކެއް ވެސް ވަނީ ފަށައިފަ އެވެ.

ބައެއް މުހިންމު ހަބަރުތައް

• ފެނަކަ ކޯޕަރޭޝަނުގެ މެނޭޖިން ޑިރެކްޓަރާއި ޗެއާމަނަށް ބޮޑެތި ތުހުމަތުތަކެއް ކުރެއްވުމަށް ފަހު، އެ ކުންފުނީގެ ޑެޕިއުޓީ މެނޭޖިން ޑިރެކްޓަރު ކަމުން އިސްތިއުފާ ދެއްވި އިބްރާހިމް ވަހީދު (އެންސްޕާ އިބުރޭ) ގެ ތުހުމަތުތަކަކީ "ބުހުތާން ދޮގު" ކަމަށް އެ ކުންފުނީގެ މެނޭޖިން ޑިރެކްޓަރުގެ މަގާމުގައި ހުންނެވި އަހްމަދު ސައީދު ވިދާޅުވީ އިއްޔެ އެވެ.

• ރައީސް އިބްރާހީމް މުހައްމަދު ސޯލިހާއި އެމަނިކުފާނުގެ ވަޒީރުން އެމްޑީޕީގެ ޕާލިމެންޓްރީ ގްރޫޕަށް ނުފޫޒު ފޯރުވާ ކަމަށް ބައެއް މެންބަރުން ވިދާޅުވި ނަމަވެސް ޕާލިމެންޓްރީ ގްރޫޕްގައި ބައިވެރިވާ މެންބަރުންނަށް އެފަދަ ކަމެއް ނެތް ކަން އެނގޭނެ ކަމަށް އެ ގްރޫޕްގެ ލީޑަރު މުހައްމަދު އަސްލަމް ވިދާޅުވީ އިއްޔެ އެވެ.

• އދ. ގެ ސެކެޓްރީ ޖެނެރަލް އެންޓޯނިއޯ ގުޓެރޭޒްގެ ދައުރު ހަމަވުމުން އަލަށް އިންތިހާބުކުރާ ސެކްރެޓަރީ ޖެނެރަލަކީ އަންހެން ބޭފުޅަކަށް ވާން ޖެހޭ ކަމަށް އދ. ގެ 76 ވަނަ އާންމު މަޖިލީހުގެ ރައީސްކަން ކުރެއްވި ރާއްޖޭގެ ފޮރިން މިނިސްޓަރު އަބްދުﷲ ޝާހިދު ވިދާޅުވިކަން ރިޕޯޓުކުރީ އިއްޔެ އެވެ.

ދުވަހުގެ ކޯޓޭޝަން

އެމްޑީޕީގެ ޕީޖީ ބައްދަލުވުންތަކެއް ނުހިނގާ ކަމަށާއި އެއްވެސް މައްސަލައެއްގައި ބަހުސް ވެސް ނުކުރާ ކަމަށް ގައްދޫ ދާއިރާގެ މެމްބަރު ކުރި ތުހުމަތުތަކާ ގުޅިގެން އެ ޕާޓީގެ ޕީޖީ ލީޑަރު އަސްލަމް "އަދަދު" އަށް ވިދާޅުވީ:

ޕީޖީ ގްރޫޕްގެ ބައްދަލުވުންތަކުގައި ބައިވެރިވާ މެންބަރުންނަށް އެނގޭނެ، ބައިވެރިނުވާ މީހަކަށް، މިތަނަށް ނާންނަ މީހަކަށް، މީގަ ނޫޅޭ މީހަކަށް ނޭނގޭނެ މި ތަނުގެ ވާނުވާއެއް

ދުވަހުގެ ފޮޓޯ

ސައުތު އޭޝިއަން ބާސްކެޓްބޯލް އެސޯސިއޭޝަން ވިމަންސް ޗެމްޕިއަންޝިޕްގައި ވާދަކުރާ ރާއްޖޭގެ އަންހެން ގައުމީ ޓީމާ ނައިބު ރައީސް ފައިސަލް ނަސީމް ބައްދަލުކުރެއްވުން. މި މުބާރާތުގައި ބައިވެރިވާ ރާއްޖޭގެ ބާސްކެޓްބޯޅަ ޓީމަށް ޖާޒީ ހަވާލުކޮށްދިނީ ފައިސަލް --- ފޮޓޯ: ރައީސް އޮފީސް