މާފަންނު ޕޮލިސް ސްޓޭޝަން ކައިރިއަށް ގުރޫޕަކުން އެއްވެ ފުލުހަކަށް މަރުގެ އިންޒާރު ދިން މައްސަލާގައި ހައްޔަރުކުރި މީހާ, އިއްޔެ ކުރިމިނަލް ކޯޓުން ދޫކޮށްލައިފި އެވެ.
ޕޮލިސް ސްޓޭޝަނަށް ވަދެ, އެމީހާ އެތަނުގައި ތިބި ފުލުހުންނަށް އިންޒާރު ދިނީ އެ ސްޓޭޝަން ކައިރީގައި ހުންނަ އީގަލްސް ދަނޑު ކައިރީގައި ވައްކަމުގެ ތުހުމަތުވާ މީހަކު ހައްޔަރުކުރަން ފުލުހުން މަސައްކަތް ކުރަމުން ދަނިކޮށެވެ.
ވައްކަމުގެ ތުހުމަތުވާ މީހާ ހައްޔަރުކުރުމުގެ މަސައްކަތް ކުރަނިކޮށް, އެމީހާ އައިސް އިންޒާރު ދިނުމާއެކު, އޭނާ ވެސް އެ ސަރަހައްދުން ހުއްޓުވައި, ހައްޔަރުކުރި އެވެ. ނަމަވެސް, އިއްޔެ ކުރިމިނަލް ކޯޓަށް އޭނާގެ ބަންދު ޖަހަން ގެންދިޔުމުން ކަނޑައަޅާފައިވަނީ އޭނާގެ ހައްޔަރު ގޯސް ކަމަށެވެ.
އެގޮތުން, އިއްޔެ އޭނާ ބަންދުން ދޫކޮށްލުމަށް ކޯޓުން ނެރުނު އަމުރުގައިވާ ގޮތުން, އެމީހާ ހައްޔަރުކޮށްފައިވަނީ ކުށުގެ ވެށިންނެއް ނޫނެވެ. އަދި, އޭނާ ހައްޔަރުކޮށްފައިވަނީ ވެސް ކޯޓު އަމުރެއް ނެތި އެވެ. ޖިނާއީ އިޖުރާއަތުގެ ގާނޫނުގައިވާ ގޮތުން, ކޯޓު އަމުރެއް ނެތި މީހަކު ހައްޔަރުކުރެވޭނީ ހަމައެކަނި ކުށުގެ ވެށިންނެވެ.
އެހެންވެ, އޭނާ ހައްޔަރުކޮށްފައިވަނީ އިޖުރާއަތާ އެއްގޮތަށް ކަމަށް ކަނޑައަޅެން ނެތުމުން, ކުރިމިނަލް ކޯޓުން ނިންމީ ބަންދު ނުޖަހައި, ދޫކޮށްލާށެވެ.
މި ހާދިސާއަށްފަހު ކޮމިޝަނާ އޮފް ޕޮލިސް މުހައްމަދު ހަމީދު ވަނީ އަމަލު ހިންގި މީހުންނަށް ފިޔަވަޅު އަޅާނެ ކަމުގެ އިންޒާރު ދެއްވާފަ އެވެ.
"ޖަމާއަތް ހަދައި ކުށްކުރުމާއި އާންމު އިޖުތިމާއީ މިންގަނޑުތަކާއި ހިލާފު އަމަލުތައް ހިންގާ އަދި ރައްޔިތުންގެ ހިތްތަކަށް ބިރުވެރިކަން ވަންނަ ގޮތަށް ހަރަކާތްތެރިވާ ގުރޫޕުތަކާ ދެކޮޅަށް ފިޔަވަޅު އަޅާނަން،" ސީޕީ ހަމީދު ވިދާޅުވި އެވެ.
މިފަދަ ކަމެއް ހިގާފައި ވާއިރު، މި މަހުގެ 10ވީ ހޮނިހިރު ދުވަހުގެ ހެނދުނު ޑްރަގް އެންފޯސްމަންޓް ތިން ފުލުހަކަށް ހަމަލާދީ ވަނީ ޒަހަމްކޮށްލާފަ އެވެ. އެ މައްސަލާގައި މިހާތަނަށް ވަނީ ހަތް މީހަކު ހައްޔަރުކޮށްފަ އެވެ.
