ޖާސޫސް ކުރަން އުޅުނު ކަމުގެ ތުހުމަތުގައި ވެލާނާ އިންޓަނޭޝަނަލް އެއާޕޯޓުން ހައްޔަރުކުރި ދެ މީހުންގެ ތަހުގީގު ދެ ފުށް ފެންނަ ގޮތެއްގައި ހިންގުމަށާއި އެ މައްސަލައިގެ ތަފްސީލް މަޖިލީހަށް ހިއްސާ ކުރުމަށް ގޮވާލާ މަޖިލީހަށް ހުށަހެޅި މައްސަލަ ބޭރުކޮށްލައިފި އެވެ.
ވެލާނާ އިންޓަނޭޝަނަލް އެޕާޓްގައި ދޫކޮށްލާފައި އޮތް ދަބަހެއްގެ ތެރޭގައި އޮތް ގަމީހެއްގައި ބަޓަން ކެމެރާއެއް އޮތުމުން އެ މައްސަލައިގައި އިންޑިއާ ދެ މީހަކު ހައްޔަރުކުރީ މިދިޔަ މަހުގެ 28 ވަނަ ދުވަހު އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މާވަށު ދާއިރާގެ މެންބަރު މުހައްމަދު ސައީދު ހުށަހެޅުއްވި މައްސަލައިގައި ވަނީ ގައުމީ ސަލާމަތަށް ނުރައްކާވާ ފަދަ މިފަދަ މައްސަލައެއްގައި ފުލުހުން އެކަށީގެންވާ ފިޔަވަޅު އަޅާފައިނުވާތީ އެކަމުގެ ކަންބޮޑުވުން ފާޅުކޮށްފަ އެވެ.
އަދި، މިކަން ހިނގައިދިއުމަށް ފަހު ވެސް އެއާޕޯޓުގެ ސަލާމަތީ ކަންކަން ވަރުގަދަ ކުރުމަށް އެއްވެސް ފިޔަވަޅެއް އަޅާފައިނުވާ ކަން ވެސް އެ މައްސަލައިގައި ފާހަގަކޮށްފައިވެ އެވެ.
މި މައްސަލަ މަޖިލީހަށް ބަލައިގަތުމާމެދު ނެގި ވޯޓުގައި 34 މެންބަރުން ވަނީ ބަލައިގަންނަން ނުފެންނަ ކަމަށް ވޯޓު ދެއްވާފަ އެވެ. މައްސަލައާ އެއްކޮޅަށް ވޯޓު ދެއްވީ އެންމެ ހަ މެންބަރުންނެވެ.
ފުލުހުން މީގެ ކުރިން ބުނީ ދެ ބިދޭސީން ހައްޔަރު ކުރީ "އިތުރު ބައެއް ކަންކަން" ސާފު ކުރުމަށް ކަމަށެވެ. އެމީހުންގެ ބަންދަށް ކުރިމިނަލް ކޯޓުން 10 ދުވަސް ޖެހިނަމަވެސް ފަހުން ބަންދު އިތުރުކުރިކަން ވަނީ ސާފުވާ ގޮތް ނުވެފަ އެވެ.
