ދިވެހި ފުލުހުންގެ ހިދުމަތުގެ ދުވަސް ފާހަގަކުރުމުގެ ގޮތުން ކުރިއަށްގެންދާ ހަރަކާތްތަކުގެ ތެރެއިން "އަވަށްޓެރި ފުލުހުންގެ ހަފްތާ" ގެ ހަރަކާތްތައް މާލެ ސިޓީއާއި އަތޮޅުތަކުގައި ފަށައިފި އެވެ.
މިއަދުން ފެށިގެން މި މަހުގެ 24ގެ ނިޔަލަށް ކުރިއަށް ގެންދާ އެ ހަރަކާތުގައި ގިނަ ކަންތައްތަކެއް ރާވާފައިވެ އެވެ.
ޗީފް އިންސްޕެކްޓާ އަބްދުﷲ ރަޝީދު "އަދަދު" އަށް ވިދާޅުވީ މިފަދަ ހަރަކާތްތަކަކީ ފުލުހުންނާއި އާންމުންނާ އޮންނަ ގުޅުން މިއަށްވުރެ ރަނގަޅުކޮށް ކުރިއަށް ގެންދެވޭނެ ކަންކަން ރޭވުން ކަމަށެވެ.
އެގޮތުން އަވަށްޓެރި ފުލުހުންގެ ހަފްތާ ފެށުމުގެ ފުރަތަމަ ހަރަކާތުގެ ގޮތުން މިއަދު ހެނދުނު ވަނީ މާލެ އާއި އަތޮޅުތަކުގެ އެކި ރަށްރަށުގައި ހުރި ސްކޫލުތަކުގެ އެސެމްބްލީގައި ފުލުހުން ބައިވެރިވެފަ އެވެ. މިއަދު ފުލުހުން ވަނީ އެސެމްބްލީގައި ބައިވެރިވެ "ސައިބާ ސޭފްޓީ އާއި ބުލީން" އާ ގުޅޭގޮތުން ދަރިވަރުންނަށް މައުލޫމާތު ދީފަ އެވެ.
ފުލުހުން ބުނީ އެސަމްބަލީގައި މިއަދުގެ ހަރަކާތުގެ ތެރެއިން ވަނީ މާލެ ސިޓީގެ 16 ސްކޫލެއްގެ 9290 ދަރިވަރުންނަށް މައުލޫމާތު ދީފައިވާ ކަމަށެވެ. އަދި އަތޮޅުތެރެއިން އެކި ސްކޫލަކުން ޖުމްލަ 20778 ދަރިވަރަކަށް މައުލޫމާތު ދީފައިވާ ކަމަށް ފުލުހުން ބުންޏެވެ.
މީގެ އިތުރުން މި ހަފްތާގައި ރޭވިފައިވާ ކަންކަމަށް ބަލާއިރު މިއަދު ހަވީރު މާލެ އާއި އަތޮޅުތަކުގައި "ވޯކް އެންޑް ޓޯކް" ނަމުގައި ހަރަކާތެއް ކުރިއަށް ގެންދިއުމަށްވަނީ ހަމަޖެހިފަ އެވެ.
އަބްދުﷲ ވިދާޅުވީ މިހަރަކާތުގައި މާލޭގެ އެކި ސަރަހައްދުތަކުގައާއި އަތޮޅުތެރޭގެ މަގުތަކުގައި ފުލުހުން ހަރަކާތްތެރިވަމުންދާނެ ކަމަށެވެ.
"މި ހަރަކާތުގައި ފުލުހުންނާ ބައްދަލުކޮށް ރައްޔިތުންގެ ވާހަކަތައް ފުލުހުންނާ ހިއްސާކުރެވޭނެ. މައިގަނޑު ގޮތެއްގައި ކުރާނީ ހަތަރު ސުވާލެއް. އެއީ މިހާރަށްވުރެ އާންމުންނަށް ދޭ ހިދުމަތް ރަނގަޅުކޮށް ރައްޔިތުންނާ ގާތުން މަސައްކަތް ކުރުމަށް ކުރެވޭ ސުވާލުތަކެއް،" އޭނާ ވިދާޅުވި އެވެ.
އަވައްޓެރި ފުލުހުންގެ ހަފްތާގެ ހަރަކާތްތައް އަންނަ ހޮނިހިރު ދުވަހުގެ ނިޔަލަށް ކުރިއަށް ގެންދިއުމަށް ހަމަޖެހިފައި ވާއިރު، ދެން ހިމެނެނީ:
- ގޭގެއަށް ޒިޔާރަތްކޮށް އާއިލާތަކާއި ބައްދަލުކުރުން
- ކޮމިޔުނިޓީ މީޓންގްތައް
- ލޭ ހަދިޔާކުމުގެ ކޭމްޕް
- ހާއްސަ ފުޓްބޯޅަ މެޗެއް
- ވިޒިޓިންގް ވަލްނަރަބަލް ޕޮޕިޔުލޭޝަން
- ގުރައިދޫއަށް ޒިޔާރަތްކުރުން
- ކޮމިޝަނަރ މީޓިންގް ޕެނަލް
- އަވަށްޓެރި ފުލުހުން މީޑިޔާއަށް
- އަ ޑޭ ވިދް ޕާޓްނާސް
- ޕްލާސްޓިކް ކްލީނިންގް އިވެންޓް
- ޕާކްތަކަށް ޒިޔާރަތްކުރުން
- އަވަށްޓެރި ފުލުުހުންގެ ހަވީރެއް
