މިނިސްޓްރީ އޮފް އިކޮނޮމިކް ޑިވެލޮޕްމަންޓުން ދިވެހި ފުލުހުންގެ ހިދުމަތުގެ ދަށުން ހިންގާ ނޭޝަނަލް ކޮލެޖް އޮފް ޕޮލިސިން އެންޑް ލޯ އެންފޯސްމަންޓް އާ ގުޅިގެން ސެކިއުރިޓީ އޮފިސަރުން ތަމްރީނު ކުރުމުގެ ޕްރޮގްރާމެއް އަންނަ މަހު ފެށުމަށް ނިންމައިފި އެވެ.
ސެކިއުރިޓީ އޮފިސާސް އިނިޝިއަލް ޓްރެއިނިން (އެސްއޯއައިޓީ) ޕްރޮގްރާމުގެ މަގުސަދަކީ ސެކިއުރިޓީ ދާއިރާއިން ކުރިއަށްދާން ބޭނުންވާ ފަރާތްތަކަށް ފުރުސަތު ހުޅުވައިދީ، އެ ދާއިރާގައި ދިވެހީންގެ ބައިވެރިވުން އިތުރުކޮށް އިތުރަށް ކުރިއެރުވުން ކަމަށް އިކޮނޮމިކް މިނިސްޓްރީން މައުލޫމާތު ދެ އެވެ.
މި ޕްރޮގްރާމުގެ ދަށުން ފުރަތަމަ ފިޔަވަހީގައި 30 ސެކިއުރިޓީ އޮފިސަރުން ތަމްރީން ކުރާ ގޮތަށް ހަމަޖެހިފައިވެ އެވެ. ދ.ވާނީގައި، 14 ދުވަހުގެ މުއްދަތަކަށް ކުރިއަށްގެންދިޔުމަށް ހަމަޖެހިފައިވާ މި ޕްރޮގްރާމަކީ ސަރުކާރުން ފަންޑުކޮށްގެން ކުރިއަށް ގެންދިޔުމަށް ހަމަޖެހިފައިވާ ޕްރޮގްރާމެކެވެ.
މިނިސްޓްރީން ބުނީ އެ ދާއިރާއަށް ބޭނުންވާ ދިވެހި މުވައްޒަފުން ތަމްރީނުކޮށް އަދި ދިވެހި މުވައްޒަފުންނަށް ފުރުސަތު ލިބުމުގައި ހުރި ދަތިތައް ނައްތާލުމަކީވެސް މި ތަމްރީނު ޕްރޮގްރާމުގެ އަމާޒެއް ކަމަށެވެ.
އަދި، ސެކިއުރިޓީ ދާއިރާއަކީ ޕްރޮފެޝަންއެއްގެ ގޮތުގައި ދިވެހިރާއްޖޭގައި ކުރިއަރަމުން އަންނަ އަދި ގިނަ ފުރުސަތުތަކެއް ހުރި ދާއިރާއެއް ކަމުން، މި ދާއިރާއަށް ބޭނުންވާ ދިވެހި މަސައްކަތްތެރިން ތަމްރީނުކޮށް، ވަޒީފާގެ ބާޒާރަށް ނެރުމަކީ ސަރުކާރުގެ ވަރަށް ބޮޑު އަމާޒެއް ކަމަށް ވެސް އިކޮނޮމިކް މިނިސްޓްރީން ބުންޏެވެ.
އެގޮތުން، މިނިސްޓްރީން ބުނީ މި ޕްރޮގްރާމް ފުރިހަމަ ކުރާ ފަރާތްތައް މި ދާއިރާއިން އިތުރަށް ކުރިއަށް ދިޔުމުގެ ފުރުސަތު ފަހި ވެގެންދާނެ ކމަށެވެ.
މި ޕްރޮގްރާމަށް އެދި އެޕްލިކޭޝަން ހުށަހެޅުމުގެ ފުރުސަތު ޖޮބް ސެންޓަރު ޕޯޓަލް މެދުވެރިކޮށް މިހާރު ވަނީ ހުޅުވާލާފަ އެވެ. އަދި, އެޕްލިކޭޝަން ހުށަހެޅުމުގެ ފުރުސަތު ވަނީ އަންނަ މަހުގެ 13 ވަނަ ދުވަހުގެ ނިޔަލަށް ހުޅުވާލާފަ އެވެ.
