ބަންގްލަދޭޝްގެ ރައްޔިތެއް ކަމަށްވާ އަލަމްގީރާއެކު ބަދުއަހުލާގީ އަމަލު ހިންގި ކަމަށް އެއްބަސްވެ، އެ ކުށަށް ތައުބާވެފައިވާ ކަމަށާއި ރައްޔިތުންގެ ކިބައިން މާފަށް އެދޭ ކަމަށް ގާނޫނީ ވަކީލު ނާޒިމް ސައްތާރު ވިދާޅުވެއްޖެ އެވެ.
ނާޒިމް ސައްތާރުގެ ފަރާތުން މިކަން ހާމަކޮށް މިއަދު ނޫސްބަޔާނެއް ނެރެފައިވަނީ އޭނާގެ މައްޗަށް ދައުލަތުން ކުރާ އެއް ޖިންސުން ގުޅުން ހިންގުމުގެ ކުށުގެ ދައުވާގެ ޝަރީއަތް މިއަދު ހަވީރަށް ތާވަލުކޮށްފައިވަނިކޮށެވެ. ކްރިމިނަލް ކޯޓުގައި އެ ޝަރީއަތް ފަށާނީ ހަވީރު 4:30 ގަ އެވެ.
ނާޒިމް ނެރުއްވި ބަޔާނުގައި ވިދާޅުވީ ކުށަށް އިއުތިރާފުވީ ކުށުގެ ކުށްވެރިއަކަށް ވުމުގެ އިތުރަށް އެ ކަމުގައި އޭނާ ބްލެކްމެއިލްކޮށް ފައިސާ އަތުލަން އުޅުމުގެ މައްސަލާގައި ވިކްޓިމްއަކަށް ވެސް ވެފައި ވަނިކޮށް ކަމަށެވެ.
"އަޅުގަނޑު ރާއްޖޭން ބޭރަށް ފިލައިގެން ނުގޮސް، ރާއްޖޭގައި ހުރެ، އަޅުގަނޑު އިއުތިރާފުވެ، މި ކުށުގެ އަދަބަށް ކުރިމަތިލާން އަޅުގަނޑު ބޭނުން ވާތީ އެވެ. އަޅުގަނޑު އެދެނީ މި ކުށަށް އިއުތިރާފުވެ ތައުބާވެ ރައްޔިތުންގެ އަރިހުން މާފެވެ." ނާޒިމް ސައްތާރު ނެރުއްވި ބަޔާނުގައިވެ އެވެ.
ނާޒިމް ސައްތާރުގެ މައްޗަށް އެއް ޖިންސުން ގުޅުން ހިންގުމުގެ ކުށުގެ ދައުވާ އުފުލީ ގާނޫނުލްއުގޫބާތުގެ ދަށުންނެވެ.
އެއީ މީހަކާ އިނދެ ހުރެ ކުރި ކުށަކަށް ވާނަމަ، އެ ގާނޫނުގައިވާ ގޮތުން، އެ ކުށުގެ އަސާސީ އަދަބަކީ ނުވަ މަހާއި 18 ދުވަހަށް ޖަލަށް ލުމެވެ.
އެއްޖިންސުން ގުޅުން ހިންގާ މަންޒަރު ފެންނަ ވީޑިއޯތަކެއް ޖޫން މަހުގެ ފަހުކޮޅު ވަނީ އާންމުވެފަ އެވެ. އޭގެ ތެރެއިން އެއް ވީޑިއޯއަކުން އަލަމްގީރާއެކު ފެންނަނީ ނާޒިމް އެވެ.
ނާޒިމްގެ މައްޗަށް ކުރާ ދައުވާގެ ޝަރީއަތުގައި ބޭއްވި ފުރަތަމަ އަޑުއެހުމުގައި ދައުލަތުން ވަނީ ދައުވާ އިއްވައިފަ އެވެ. އަދި ނާޒިމް ވަނީ ދައުވާގައި ހިމެނޭ އެއް ޖިންސުގެ މިހާކާއެކު ބަދުއަހުލާގީ އަމަލު ހިންގި ކަމަށް އިއުތިރާފުވެފަ އެވެ.
ނާޒިމަކީ ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކޮއްކޯފުޅެވެ.
ނަޝީދު ވަނީ ނާޒިމް ހައްޔަރު ކުރުމާ ގުޅިގެން، އެއީ ސިޔާސީ ބޭނުމެއްގައި ވަކި ބަޔެއްގެ މައްސަލަ އެކަނި ބެލުމުގެ ތެރެއިން ކުރާ ކަމެއް ކަމަށް ތުހުމަތު ކުރައްވައިފަ އެވެ.
އަލަމްގީރަށް ކުރި ހުކުމް
އެ މައްސަލައިގައި ގިނަ އަދަދެއްގެ މީހުނާ އެކު އެއް ޖިންސުން ގުޅުން ހިންގި ކަމަށް އިއުތިރާފުވެފައިވާ ބަންގްލަދޭޝްގެ ރައްޔިތެއް ކަމަށްވާ އެމްޑީ އަލަމްގީރު ޝަރީއަތުގެ މަޖިލީހުގައި ތައުބާވުމުން އަދަބު ކުޑަކުރުމަށްފަހު އޭނާގެ މައްޗަށް ވަނީ ޖަލު ހުކުމެއް އިއްވާފަ އެވެ.
ކުށަށް ތައުބާވުމަކީ, އެ ކުށާ މެދު ދެރަވެ މާފަށް އެދި އަދި އެ ކުށް ދެން އިތުރަށް ތަކުރާރު ނުކުރާނެ ކަމަށް އެއްބަސްވުމެވެ.
އަލަމްގީރްގެ އިއުތިރާފާއި ތައުބާއަށް ރިއާޔަތްކުރުމަށްފަހު އަދަބު ލުއި ކުރުމަށްފަހު މައްސަލަ ބައްލަވާ ގާޒީ އިއްވެވީ ހަތް މަހާއި ހަ ދުވަހުގެ ޖަލު ހުކުމެކެވެ. އަވަސް ނިޔާގައި މައްސަލަ އެއް ހަފުތާގެ ތެރޭ ކުރިމިނަލް ކޯޓުން މި ނިންމީ, އިއުތިރާފުވާ މައްސަލަތަކުގައި އެގޮތަށް އަމަލުކުރުމަށް ޖިނާއީ އިޖުރާއަތުގެ ގާނޫނުގައި ބަޔާންކޮށްފައިވާތީ އެވެ.
