މުޅި ރާއްޖޭގެ ބޯހިމެނުގެ މަސައްކަތް މޯލްޑިވްސް ބިއުރޯ އޮފް ސްޓެޓިސްޓިކްސްގެ ފަރާތުން ފެށީ އިއްޔެ އެވެ.

އެންމެ ފަހުން ރާއްޖޭގައި ބޯހިމެނުމުގެ މަސައްކަތް ކުރިއަށް ގެންގޮސްފައި ވަނީ 2014 ވަނަ އަހަރު އެވެ. މިއީ އެފަހުން ބޯހިމަނާނެ ފުރަތަމަ ފަހަރެވެ.

މިފަހަރުގެ ބޯހިމެނުމަށް މައުލޫމާތު އެއްކުރާއިރު ގޭގޭގެ އިތުރުން ވިޔަފާރިތަކާއި އެކި މަސައްކަތްތަކާ ގުޅޭ މައުލޫމާތު ވެސް އެއްކުރާނެ އެވެ.

ބޯހިމެނުމުގެ މަސައްކަތުގައި އަމަލީގޮތުން ބައިވެރިވާފަރާތްތަކާ އިއްޔެ ހެނދުނު ރައީސް އިބްރާހިމް މުހައްމަދު ސޯލިހު ވަނީ ބައްދަލުކުރައްވާފަ އެވެ.

އެ ބައްދަލުކުރެއްވުމުފައި ވާހަކަފުޅު ދައްކަވަމުން ރައީސް ވިދާޅުވީ މުޅި ރާއްޖޭގައި މިއަދު ފެށިގެން މި ދާ މަސައްކަތަކީ ރާއްޖޭގެ ކުރިމަގު ރޭވުމަށް ވަރަށް މުހިންމު މައުލޫމާތުތަކެއް އެއްކުރެވޭ މަސައްކަތެއް ކަމަށެވެ.

އަދި ބޯހިމެނުމުގައި އެއްކުރެވޭ މައުލޫމާތުތަކުގެ އަލީގައި ރާއްޖޭގެ ތަރައްގީގެ މަޝްރޫއުތަކާ އިޖުތިމާއީ ހުރިހާ ބޮޑެތި މައްސަލަތައް ފާހަގަވުމުގެ އިތުރުން އެކަންތައްތައް ހައްލުކުރުމަށް ވަރަށް ބޮޑަށް ފަސޭހަވާނެ ކަމަށް ވެސް އެމަނިކުފާނު ވިދާޅުވި އެވެ.

ބޯހިމެނުމުގެ އަމަލީ މަސައްކަތްތައް ކުރިއަށްގެންދާތަނަށް ރައީސް ވަޑައިގެން އެމަނިކުފާނު ވަނީ ވަކިވަކީން މަސައްކަތްތައް ކުރިއަށްދާ ގޮތް ބައްލަވައިފަ އެވެ.

މި އަހަރުގެ ބޯހިމެނުމުގެ ލިސްޓިންގެ މަސައްކަތްތައް ކުރިއަށްދާނީ މިއަދު އާއި މާދަމާ އެވެ. އަދި ބޯހިމެނުމުގެ ތަފްސީލް މައުލޫމާތު ނެގުމުގެ މަސައްކަތްތައް ކުރިއަށްދާނީ މި މަހުގެ 17 އިން 25 ގެ ނިޔަލަށެވެ.

މިފަހަރުގެ ބޯހިމެނުމުގެ ޢަމަލީ މަސައްކަތުގައި 4000 އަށް ވުރެ ގިނަ އޮފިޝަލުން ބައިވެރިވާނެ އެވެ.

ބައެއް މުހިންމު ހަބަރުތައް

• މާލޭގައި މިހާރު މިނީ ބަހުގެ ހިދުމަތް ފެށި ނަމަވެސް ޓެކްސީ ތަކަށް ލިބޭ އާމްދަނީ ދަށް ނުވާ ކަމަށް ޓެކްސީ އެސޯސިއޭޝަނުން ބުނީ އިއްޔެ އެވެ.

• ސަރުކާރު ހިންގާ ކޯލިޝަން ރަސްމީ ސިފައެއްގައި ދެމިއޮތް ނަމަވެސް، ވެރިކަމަށް އައުމުގެ ކުރިން އެއްބަސްވި މިންވަރާ ގާތަށް ވެސް ސަރުކާރުގެ ހިއްސާ ނުލިބޭ ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވީ އިއްޔެ އެވެ.

• ގދ. މަޑަވެއްޔާއި އެ އަތޮޅު ހޯނޑެއްދޫއާ ހަމައަށް ކޯޒްވޭއަކުން ގުޅައިލުމުގެ އާ މަޝްރޫއުގެ އަމަލީ މަސައްކަތް މިއަދު ފެށީ އިއްޔެ އެވެ.

ދުވަހުގެ ކޯޓޭޝަން

ނުހައްގު މުއްސަނދި ކަމުގެ ގާނޫނާ ގުޅޭގޮތުން އޭސީސީގެ ރައީސް ޝާމިލް ވިދާޅުވީ:

އަޅުގަނޑުމެން، މުއައްސަސާތަކުގެ އެންމެ މަތީ ލެވެލް އިން، ޓެކްނިކަލް ލެވެލްގައި ވެސް ކުރެވުނު މަޝްވަރާތަކުގެ އަލީގައި އަޅުގަނޑުމެންނަށް އަންޑަސްޓޭންޑްވި އެކައްޗަކީ މިހާރު އެ ކުށް [ގާނޫނުގައި] ލިޔެވިފައި އޮތް ގޮތުން އޭގައި ދައުވާ ކުރުމާ މެދުގައި ކޮންމެވެސް ކަހަލަ ގޮންޖެހުންތަކެއް، ކަންބޮޑުވުންތަކެއް އެބަހުއްޓޭ،

ދުވަހުގެ ފޮޓޯ

އަމީނީ މަގު ހެދުމުގެ މަސައްކަތް އިއްޔެ ރޯޑް ޑިވެލޮޕްމަންޓު ކޯޕަރޭޝަން (އާރުޑީސީ) އިން ވަނީ ފަށާފައި. އަމީނީ މަގު ތަރައްގީ ކުރުމުގެ މަސައްކަތް އާރްޑީސީއާ ހަވާލުކޮށްފައިވަނީ 210 ދުވަހުގެ ތެރޭގައި ނިންމާ ގޮތަށް 84 މިލިއަން ރުފިޔާއަށް --- ފޮޓޯ: މުހައްމަދު ޝާބިން/އަދަދު