ދިވެހި ދައުލަތުގެ ސިޔާދަތުގެ އިތުރަށް އިންޑިއާ ކަނޑުގެ ސަރަހައްދީ ސުލްހަ ދަމަހައްޓަން ވެސް ދިވެހި އަސްކަރިއްޔާގެ ސިފައިން އަދާކުރަމުން ދަނީ ވަރަށް ފުރިހަމަ ދައުރެއް ކަމަށް ރައީސް އިބްރާހީމް މުހައްމަދު ސޯލިހް މިރޭ ވިދާޅުވެއްޖެ އެވެ.
ދިވެހި ސިފައިންގެ 130 ވަނަ އަހަރީ ދުވަހުގެ ހާއްސަ ޖަލްސާގައި ރައީސް ސޯލިހު ވިދާޅުވީ ސިފައިންގެ އެންމެ މުގައްދަސް ވާޖިބަކީ ރާއްޖޭގެ ސިޔާދަތީ މިނިވަންކަމާއި އިސްތިގުލާލު ހިމާޔަތްކޮށް ރައްކާތެރިކަން ކަށަވަރު ކުރުން ކަމަށްވާއިރު އެ ކަން ކުރެވޭނީ ސަރަހައްދީ ސުލްހަ ދެމި އޮތް މިންވަރަކުން ކަމަށެވެ.
.. އެހެންކަމުން އިންޑިއާ ކަނޑުގެ ސަލާމަތާއި ރައްކާތެރިކަން ކަށަވަރުކުރުމުގައި، އަޅުގަނޑުމެން ދިވެހިން ވެސް އަދާކުރަން ޖެހޭ ދައުރެއް އެބަ އޮވޭ، މިއަދުގެ ދިވެހި އަސްކަރިއްޔާއިން އެ ޒިންމާ ވަރަށް ފުރިހަމައަށް އަދާކުރަމުން އަންނަކަން އަޅުގަނޑު ގަބޫލުކުރަން،" ރައީސް ސޯލިހު ވިދާޅުވި އެވެ.
ޒަމާނީ ވަސީލަތްތަކާއި ޓެކްނޮލޮޖީއާ އެކު ޓެރަރިޒަމްގެ އުކުޅުތައް ވެސް ބަދަލުވަމުން އަންނައިރު، އެތެރެއިންނާއި ބޭރުން ވެސް އެ ނުރައްކާތައް ރާއްޖެ ކުރިމަތިވަމުން އަންނަ ކަން ރައީސް ފާހަގަ ކުރެއްވި އެވެ. އެފަދަ ކޮންމެ ނުރައްކަލަކުން ދިވެހިންނާއި ދިވެހިރާއްޖެ ސަލާމަތްކޮށްދިނުމަށް ތައްޔާރުވެ ތިބެނީ، ކަމަށާއި އެކަމަށްޓަކައި، އަސްކަރިއްޔާގެ އިތުރުކުރުމަށް އަބަދުވެސް ހާއްސަ ސަމާލުކަމެއް ދޭ ކަމަށް ރައީސް ވިދާޅުވި އެވެ.
ދިވެހިން ކުރިމަތިލާފައިވާ މި ނާޒުކު އިގުތިސޯދީ އަދި އިޖުތިމާއީ ހާލަތުގައި ދިވެހި އަސްކަރިއްޔާގެ ބާރުގަދަކަން ދެމެހެއްޓުމަށްޓަކައި، މި ވެރިކަމުގައި ވޭތުވެދިޔަ ހަތަރު އަހަރު ގިނަ މަސައްކަތްތަކެއް ކުރެވިފައިވާ ކަން ވެސް އެ މަނިކުފާނު ފާހަގަ ކުރެއްވި އެވެ.
"ގައުމުގެ ދިފާއުގެ އެންމެ ކުރީ ސަފުގައި ހަރަކާތްތެރިވާ ސިފައިންނަށް ބޭނުންވާ އެންމެ ޒަމާނީ ހަތިޔާރާއި އާލާތްތައް މިހާރުވަނީ ހޯދިފައި، ސިފައިންގެ ސިފަވަންތަކަން ދަމަހައްޓައިދޭ އިލްމީ އަދި ފަންނީ ތަމްރީނުތައް ދަނީ ސިފައިންނަށް ބަރާބަރަށް ދެމުން." ރައީސް ސޯލިހުވިދާޅުވި އެވެ.
ދިވެހި ސިފައިންގެ އަސްކަރީ ގާބިލްކަން އިތުރު ކުރުމަށް އެކުވެރި ގައުމުތަކުން ދެވޭ އެހީތެރިކަން އަބަދުވެސް ހަނދުމަ ކުރައްވާނެ ކަމަށް ވެސް އެ މަނިކުފާނު ވިދާޅުވި އެވެ.
ރައީސް ސޯލިހުގެ ދިފާއީ އަދި ހާރިޖީ ސިޔާސަތުތަކަށް ވާދަވެރި ފަރާތްތަކުގެ ފާޑުކިއުން އަމާޒުވެފައި އޮތްއިރު، އެ ވާހަކަތައް ރައްދު ދެއްވައި ވެސް ވާހަކަފުޅު ދެއްކެވި އެވެ.
"ރާއްޖޭގެ ހާރިޖީ ސިޔާސަތަށް އަޅުގަނޑުމެން ގެނައި ހެޔޮ ބަދަލުގެ ސަބަބުން، ރާއްޖޭގެ އަސްކަރީ ގާބިލުކަން އިތުރުވެ، ރާއްޖޭގެ ސިޔާދަތީ މިނިވަންކަމަށް މިވަނީ ވަރަށް ބޮޑު ރައްކާތެރިކަމަކާއި ޔަގީންކަމެއް ލިބިފައި" ރައީސް ވިދާޅުވި އެވެ.
ރައީސް ވަނީ ދިވެހި އަސްކަރިއްޔާއަކީ އަސްކަރީ ވާޖިބުތަކުގެ އިތުރުން މަދަނީ އެތައް ހިދުމަތްތަކެއް ވެސް އާންމު ރައްޔިތުންނަށް ފޯރުކޮށްދޭ ވަރުގަދަ މުއައްސަސާއެއްގެ ގޮތުގައި ސިފަކުރައްވާފަ އެވެ.
އެ ގޮތުން ކަނޑުމަތި ޕެޓްރޯލް ކުރުމާއި ކަނޑުމަތީ ހާދިސާތަކުގައި ފުރާނައާއި މުދާ ރައްކާތެރިކުރުމަށާއި، ރާއްޖޭގެ ރަށްރަށަށް އުދަ އެރުމާއި ވާރޭގެ ސަބަބުން ފެން ބޮޑުވެގެން ކުރިމަތިވާ ހާދިސާތަކުގައި ފުރާނައާއި މީހުންގެ ގެދޮރާއި މުދާ ރައްކާތެރި ކުރުމަށް ސިފައިން އަދާކުރާ ދައުރު ރައީސް ފާހަގަ ކުރެއްވި އެވެ.
ކޮވިޑް-19 ގެ ބަލިމަޑުކަމުގެ ހާލަތު ކުރިމަތިވެގެން ދިޔައިރު އެންމެ ލޮޖިސްޓިކް ހިދުމަތެއް ދެވިގެން ދިޔަ މުއައްސަސާއަކީ ވެސް ދިވެހި އަސްކަރިއްޔާކަން ރައީސް ފާހަގަ ކުރެއްވި އެވެ. މި ގޮތުން ސެނެހިޔާ ހޮސްޕިޓަލްގައި ގާއިމް ކުރި ފްލޫ ކްލިނިކަކީ އެންމެ ދިގު މުއްދަތަށް ދެމިދިޔަ ކްލިނިކްކަން އެމަނިކުފާނު ފާހަގަ ކުރެއްވި އެވެ.
