މެންޗެސްޓާ (ސެޕްޓެމްބަރު 9) - ޔުއެފާ ޔޫރޮޕާ ލީގުގައި މިރޭ މެންޗެސްޓާ ޔުނައިޓެޑް ދަނޑުގައި އެ ޓީމު އަތުން 1-0 އިން ރެއާލް ސޮސިއެޑާޑުން ތާރީހީ މޮޅެއް ހޯދިއިރު، ރަށުންބޭރުގައި ޒިއުރިކް އެފްސީ އަތުން 2-1 އިން މޮޅުވެ، އާސެނަލުން މުބާރާތުގެ ފެށުން ރަނގަޅުކޮށްފި އެވެ.
ޔުނައިޓެޑް އަތުން ސޮސިއެޑާޑް މި ހޯދި މޮޅަކީ އެ ކްލަބްގެ ތާރީހުގައި ރަށުންބޭރުގައި އިނގިރޭސި ކްލަބެއް އަތުން ހޯދި ފުރަތަމަ މޮޅެވެ. އަނެއްކޮޅުން، މި ނަތީޖާއާ އެކު ޔޫރޮޕާ ލީގުގައި އަމިއްލަ ދަނޑުގައި ޔުނައިޓެޑުން ބަލިނުވެ، ދަމަހައްޓަމުން އައި ރެކޯޑަށް 19 މެޗަށް ފަހު މި ވަނީ ނިމުން އަތުވެފަ އެވެ. އެންމެ ފަހުން ކުޅުނު ހަތަރު މެޗުން މޮޅުވެގެން މި މެޗަށް ފޯމުގައި ނުކުތް ޔުނައިޓެޑަށް މާ ރަނގަޅު ކުޅުމެއް ނުދެއްކުނެވެ.
މިރޭގެ މެޗަށް ޔުނައިޓެޑް ނުކުތީ ފުރަތަމަ އެގާރައިގައި ހެރީ މެގުއާ އާއި ކްރިސްޓިއާނޯ ރޮނާލްޑޯ ހިމަަނައިގެންނެވެ. ފުރަތަމަ ހާފުގައި ޔުނައިޓެޑްގެ ޑިއޯގޯ ޑަލޯ ނެގި ހުރަހަކުން ރޮނާލްޑޯ ބޮލުން ގޯލެއް ޖެހި ނަމަވެސް ވީޑިއޯ އެސިސްޓަންޓް ރެފްރީ (ވީއޭއާރް) އިން ވެސް ބެލުމަށް ފަހު ނިންމީ އޮފްސައިޑް ކަމަށެވެ.
ދެ ވަނަ ހާފްގެ ކުޅުން ފެށިގެން ވެސް ރޮނާލްޑޯ އަށް ވަނީ ރަނގަޅު ފުރުސަތެއް ލިބި ބޭނުން ނުކުރެވިފަ އެވެ. ސޮސިއެޑާޑުން މެޗުގައި ޖެހި ހަމައެކަނި ގޯލު 60 ވަނަ މިނިޓްގައި ޖެހީ ބްރައިސް މެންޑޭޒް ޕެނަލްޓީ އަކުންނެވެ. މިއީ ސޮސިއެޑާޑްގެ ޑޭވިޑް ސިލްވާ ޖެހި ޝޮޓެއް ޔުނައިޓެޑްގެ ޑިފެންޑަރު ލިސަންދްރޯ މާޓީނޭޒް އަތުގައި ޖެހުނު ކަމަށް ނިންމައި، ދިން ޕެނަލްޓީ އެކެވެ.
ނަތީޖާ ހަމަހަމަކުރަން ޔުނައިޓެޑުން ކުރި މަސައްކަތުގައި އެ ޓީމުގެ މިޑްފީލްޑަރު، ކަސެމީރޯ ޖެހި ދެ ޝޮޓެއް ސޮސިއެޑާޑްގެ ކީޕަރު އަލެކްސް ރެމީރީޯ ގަގާލޯ ވަނީ މަތަކޮށްފަ އެވެ.
ޔުނައިޓެޑްގެ ގްރޫޕްގައި ހިމެނޭ އަނެއް މެޗުގައި މިރޭ މޮލްޑޯވާގެ ޝެރިފް ޓިރާސްޕޯލް ވަނީ 3-0 އިން ސައިޕްރަސްގެ އޮމޯނިއާ ބަލިކޮށްފަ އެވެ. ޔުނައިޓެޑުން އަންނަ ހަފްތާގައި ކުޅޭނީ ރަށުންބޭރުގައި ޝެރިފްއާ ދެކޮޅަށެވެ.
ގްރޫޕް އޭގައި މިރޭ އާސެނަލުން ޒިއުރިކް ދަނޑުގައި ކުޅުނު މެޗުގެ 16 ވަނަ މިނިޓްގައި ލީޑުނެގި އެވެ. މި ގޯލު ޖެހީ އެޑީ އެންކެޓިއޭ ދިން ބޯޅައަކުން ބްރެޒިލްގެ ވިންގް، މާކުއީނިއޯސް އެވެ. މިއީ މި ފަހަރުގެ ޓްރާންސްފާގައި އާސެނަލަށް ގެނައި މާކުއީނިއޯސް އެ ޓީމަށް ޖަހައިދިން ފުރަތަމަ ގޯލެވެ.
ފުރަތަމަ ހާފު ނިމުމުގެ ކުރިން ޒިއުރިކުން ވަނީ ޕެނަލްޓީ އަކުން އެއްވަރުކޮށްފަ އެވެ. މި ގޯލު ޖެހީ މާލިން ކްރިޒޭއޫ އެވެ، މިއީ އެންކެޓިއޭ އޭރިއާތެރެއިން ޒިއުރިކްގެ އޮލާ ސެލްނައޭސަށް ކުރި ފައުލަކަށް ދިން ޕެނަލްޓީ އެކެވެ. އާސެނަލް މޮޅުކޮށްދިން ގޯލު ޖެހީ 62 ވަނަ މިނިޓްގައި އެންކެޓިއޭ އެވެ. މި ގޯލު ޖަހަން ފުރުސަތު ހޯދައިދިނީ މާކުއީނިއޯސް އެވެ.
އާސެނަލް ގްރޫޕްގައި ހިމެނޭ ނެދަލެންޑްސްގެ ޕީއެސްވީ އައިންދޯވަން އާއި ނޯވޭގެ ބޯޑޯ/ގިލްމްޑް މިރޭ ކުޅުނު މެޗު ނިމުނީ 1-1 އިން އެއްވަރުވެގެންނެވެ.
ޔޫރޮޕާ ލީގުގައި ދެން މިރޭ ކުޅުނު ފާހަގަކޮށްލެވޭ މެޗުތަކަށް ބަލާއިރު، ލާޒިއޯ އިން ވަނީ އަމިއްލަ ދަނޑުގައި 4-2 އިން ފެޔަނޫޑް ބަލިކޮށްފަ އެވެ. ހޯސޭ މޮރީނިއޯގެ ކޯޗުކަމުގައި ކުޅޭ ރޯމާ އަތުން ބަލްގޭރިއާގެ ލުޑޮގޮރެޓްސް މޮޅުވީ 2-1 އިންނެވެ.
