އިނގިރޭސިވިލާތުގެ ރާނީ، ކުއީން އެލިޒަބަތު ދެ ވަނަ އަވަހާރަވެއްޖެ އެވެ.
އެކަމަނާ އަވަހާރަވީ ސްކޮޓްލޭންޑުގެ ބަލްމޯރަލް ކާސަލްގައި ސިއްހީ ހާލުކޮޅު މޮނީޓާކޮށް ފަރުވާދެމުން ދަނިކޮށެވެ. އެކަމަނާގެ ސިއްހީ ހާލުކޮޅާ މެދު ޑޮކްޓަރުން ކަންބޮޑުވާކަން މިއަދު ހެނދުނު އެކަމަނާގެ އާއިލާ މެމްބަރުންނާ ވަނީ ހިއްސާކޮށްފަ އެވެ.
ބަކިންހަމް ޕެލަސް އިން ހާމަކޮށްފައިވާ ގޮތުގައި އެކަމަނާ އަވަހާރަވީ މިއަދު މެންދުރުފަހުގެ ވަގުތެއްގަ އެވެ.
ރާނީ އެލިޒަބަތު އަދި ޕްރިންސް ފިލިޕް 1970 ގައި އޮސްޓްރޭލިއާގެ ސިޑްނީއަށް ވަޑައިގަންނަވަނީ. --- ފޮޓޯ: ރެކްސް ފީޗާސް
ރާނީ އަވަހާރަވުމާ އެކު އިނގިރޭސި ރަސްކަމާ ހަވާލުވެވަޑައިގަންނަވާނީ އެކަމަނާގެ ދޮށީ ދަރިކަލުން ޕްރިންސް ޗާލްސް އެވެ. އެމަނިކުފާނު މާދަމާ ލަންޑަނަށް ވަޑައިގަންނަވާނެ ކަމަށް ބަކިންހަމް ޕެލަސްއިން ވަނީ ހާމަކޮށްފަ އެވެ.
އިނގިރޭސި ރަސްކަމާ ޗާލްސް ހަވާލުވެވަޑައިގެންފައިވާއިރު ދާދި ދެންމެއަކު ނެރުއްވި ކުރު ބަޔާނެއްގައި ވަނީ ރާނީ އަވަހާރަވުމަކީ މުޅި އާއިލާއަށް ލިބުނު ފުން ހިތާމައެއް ކަމަށް ވިދާޅުވެފަ އެވެ. އަދި، އެކަމަނާ އަވަހާރުވުމުގެ ހިތާމަައިގައި މުޅި އިނގިރޭސިވިލާތާއި އަދި ދުނިޔޭގެ އެކި ކަންކޮޅުތަކުގައި ތިބި މީހުން ވެސް ބައިވެރިވާނެ ކަމަށް އެމަނިކުފާނުގެ ބަޔާނުގައި ވިދާޅުވި އެވެ.
އަވަހާރަވިއިރު، އަރިހުގައި އާއިލާގެ ގިނަ މެމްބަރުންތަކެއް ތިއްބެވި އެވެ. އެކަމަނާ އަވަހާރަވިއިރު އުމުރުފުޅުން 96 އަހަރެވެ. އެކަމަނާ އުފަންވެވަޑައިގަތީ އެޕްރީލް 21، 1926 ގަ އެވެ.
ކުއީން އެލިޒަބަތު އެކަމަނާގެ އާއިލާގެ ބޭފުޅުންނާ އެކު ޕެރޭޑެއް ބައްލަވާލައްވަނީ --- ފޮޓޯ: ގެޓީ އިމޭޖަސް
މީގެ 70 އަހަރު ކުރިން، 1952 އިން ފެށިގެން އިނގިރޭސި ރަނިކަން ކުރައްވަމުން ގެންދަވަނީ އެލިޒަބަތު އެވެ. އެކަމަނާއަކީ އިނގިރޭސި ރަސްކަމުގެ ތަހުތުގައި އެންމެ ގިނަ ދުވަހު އިންނެވި ރާނީ އެވެ.
އެކަމަނާގެ ދިގު ރަނިކަމުގެ ތާރީހުގައި ވެފައިވަނީ މުޅި ދުނިޔޭގެ ވެސް ސަމާލުކަން ލިބުނު ލީޑަރަކަށެވެ. އަދި، 15 ބޮޑުވަޒީރަކު އެކަމަނާއަށް ހިދުމަތްކުރެއްވި އެވެ. މިހާރުގެ ބޮޑުވަޒީރު ލިޒް ޓްރަސްއާ ބޮޑުވަޒީރުކަމުގެ ފަތްކޮޅު ރާނީ ހަވާލުކުރެއްވީ ބަލްމޯރަލް ކާސަލްގައި ހުންނަވައިގެންނެވެ.
