ރާއްޖޭގައި ވަޒީފާ އަދާކުރުމަށް ފާއިތުވި ދެ އަހަރެއްހާ ދުވަހުގެ ތެރޭގައި ތަފާތު 130 ގައުމުގެ މީހުނަށް ވާކް ޕާމިޓު ދޫކޮށްފައިވާ ކަމަށް ތަފާސްހިސާބުތަކުން ދައްކައިފި އެވެ.
މައުލޫމާތު ހޯދާ ލިބިގަތުމުގެ ހައްގުގެ ދަށުން "އަދަދު"އިން އެދިގެން އިކޮނޮމިކް މިނިސްޓްރީން ހިއްސާކުރި މައުލޫމާތަށް ބަލާއިރު، 2020 ވަނަ އަހަރުގެ ނޮވެމްބަރު މަހުގެ ތެރޭގައި ވާކް ޕާމިޓު ދޫކުރުން އެ މިނިސްޓްރީއާ ހަވާލުވުމަށްފަހު، މިހާތަނަށް ތަފާތު 130 ގައުމަކުން ޖުމްލަ 171،099 މީހުނަށް ވާކް ޕާމިޓު ވަނީ ދޫކޮށްފަ އެވެ.
މި ތަފާސްހިސާބުތަކަށް އިތުރަށް ބަލާއިރު، ވާކް ޕާމިޓު ދޫކުރި ގައުމުތަކުގައި ދުނިޔޭގެ މައިގަނޑު ހުރިހާ ބައްރުތަކެއް ތަމްސީލުވެ އެވެ.
މިގޮތުން، އޭޝިއާ، މެދުއިރުމަތި، އެމެރިކާ، މެދުއިރުމަތި، އެފްރިކާ އަދި ޔޫރަޕުގެ ގިނަ ގައުމުތައް ހިމެނެ އެވެ.
ވަކިވަކި ގައުމުތަކަށް ބަލާއިރު، ޖުމްލަ ވާކް ޕާމިޓު ދޫކުރި އަދަދުގެ ދެބައިކުޅަ އެއް ބަޔަށް ވުރެ ގިނަ އަދަދެއް ދޫކޮށްފައިވަނީ ބަންގްލަދޭޝްއަށެވެ.
އެ މުއްދަތުގެ ތެރޭގައި ބަންގްލަދޭޝަށް 91،108 ވާކް ޕާމިޓު ވަނީ ދޫކޮށްފަ އެވެ.
ދެވަނައަށް އެންމެ ގިނައިން ރާއްޖޭގައި ވަޒީފާ އަދާކުރަނީ އަވައްޓެރި އިންޑިއާ މީހުންނެވެ.
އިންޑިއާއަށް 45،818 ވާކް ޕާމިޓު ދޫކޮށްފައިވާއިރު، ތިން ވަނައިގައި އޮތް ސްރީލަންކާއަށް ދޫކޮށްފައިވަނީ 15،023 ވާކް ޕާމިޓެވެ.
ބިދޭސީންގެ ބޮޑު އާބާދީއެއް
ސްޓެޓިސްޓިސް ބިއުރޯއިން އެންމެ ފަހުން އާންމުކުރި ތަފާސްހިސާބުތަކުން ދައްކާ ގޮތުގައި, ރާއްޖޭގައި ގާތްގަނޑަކަށް 579,000 މީހުން ދިރިއުޅެވެ.
އޭގެ ތެރެއިން ގާތްގަނޑަކަށް ދެބައިކުޅަ އެއް ބަޔަކީ ބިދޭސީން މަސައްކަތްތެރިންނެވެ.
ސައްހަ ވާކް ޕާމިޓުގައި ވަޒީފާ އަދާކުރާ މީހުންގެ އިތުރުން، އިމިގްރޭޝަންގެ ތަފާސްހިސާބުތަކުން ދައްކާ ގޮތުގައި ރާއްޖޭގައި ގަވާއިދާ ހިލާފަށް އުޅޭ 63،000 ބިދޭސީން އުޅެ އެވެ.
ނަމަވެސް ނުރަސްމީ އަންދާޒާތަކުން މި އަދަދު އެއް ލައްކައާ ގާތްކުރާ ކަމަށްވެ އެވެ.
